କଲମ୍ବୋ, ୧୧/୧୦: ଚଳିତ ମହିଳା ଦିନିକିଆ ବିଶ୍ୱକପ୍ର ୧୨ତମ ଲିଗ୍ ମୁକାବିଲାରେ ଶନିବାର ଶ୍ରୀଲଙ୍କା ଓ ଇଂଲଣ୍ଡ ସାମ୍ନା ସାମ୍ନି ହେବେ । ଇଂଲଣ୍ଡ ପ୍ରଥମ ୨ଟି ମ୍ୟାଚ୍ରେ ଯଥାକ୍ରମେ ଦକ୍ଷିଣ ଆଫ୍ରିକା ଓ ବାଂଲାଦେଶକୁ ପରାସ୍ତ କରି ସାରିଛି । ଶନିବାର ଶ୍ରୀଲଙ୍କାକୁ ହରାଇ ପଏଣ୍ଟ ତାଲିକାର ଶୀର୍ଷକୁ ଉଠିବାକୁ ଇଂଲଣ୍ ପ୍ରୟାସ କରିବ । ଶ୍ରୀଲଙ୍କା ଏପର୍ଯ୍ୟନ୍ତ ବିଜୟ ଖାତା ଖୋଲନାହିଁ । ଶନିବାର ଘରୋଇ ଗ୍ରାଉଣ୍ଡ୍ରେ ଖେଳୁଥିବାରୁ ବିପର୍ଯ୍ୟୟ ଘଟାଇବାର ସୁଯୋଗ ରହିଛି । ପୂର୍ବ ରେକର୍ଡକୁ ଦେଖିଲେ ଇଂଲଣ୍ଡର ପଲା ଭାରି ରହିବା ନିଶ୍ଚିତ । ଉଭୟ ଦଳ ଦିନିକିଆରେ ପରସ୍ପରକୁ ୧୮ଥର ଭେଟିଛନ୍ତି । ଏଥିରୁ ଶ୍ରୀଲଙ୍କା କେବଳ ଗୋଟିଏ ମ୍ୟାଚ୍ ଜିତିଛି । ୨୦୧୩ ବିଶ୍ୱକପ୍ରେ ଶ୍ରୀଲଙ୍କା ବିଜୟୀ ହୋଇଥିଲା ।
ଇଂଲଣ୍ଡକୁ ବିଜୟ ପାଇଁ ସଂଘର୍ଷ କରିବାକୁ ପଡ଼ିବ । ଶ୍ରୀଲଙ୍କାର ସ୍ପିନ ପରୀକ୍ଷାରେ ଉତ୍ତୀର୍ଣ୍ଣ ହେବା ଇଂଲଣ୍ଡ ପାଇଁ ସହଜ ହେବ ନାହିଁ । ପ୍ରେମଦାସା ଷ୍ଟାଡ଼ିୟମ୍ର ପିଚ୍ ସ୍ପିନରଙ୍କୁ ଭରପୁର ସହାୟତା କରୁଛି । ଏହା ଶ୍ରୀଲଙ୍କାର ଘରୋଇ ଗ୍ରାଉଣ୍ଡ । ବର୍ଷ ସାରା ଶ୍ରୀଲଙ୍କା ଦଳ ଏଠାରେ ଥିବା ଏକାଡେମୀରେ ଅଭ୍ୟାସ କରିଥାଏ । ତେଣୁ ପିଚ୍ ଓ ଆଉଟ୍ ଫିଲ୍ଡ ସହ ଦଳ ଭଲ ଭାବେ ପରିଚିତ । ଇଂଲଣ୍ଡ ଗତ ବାଂଲାଦେଶ ବିପକ୍ଷରେ ବିଜୟ ହାସଲ କରିଥିଲେ ହେଁ ପ୍ରାରମ୍ଭିକ ବିପର୍ଯ୍ୟୟର ସମ୍ମୁଖୀନ ହୋଇଥିଲା । ତେଣୁ ଶ୍ରୀଲଙ୍କାକୁ ଦୁର୍ବଳ ଭାବିବା ମହଙ୍ଗା ସାବ୍ୟସ୍ତ ହୋଇପାରେ । ଶ୍ରୀଲଙ୍କାକୁ ବିଜୟ ଖାତା ଖୋଲିବାକୁ ହେଲେ ବ୍ୟାଟିଂରେ ଉନ୍ନତି ଆଣିବାକୁ ହେବ ।
ଉଭୟ ଦଳ ଏକାଦଶରେ ପରିବର୍ତ୍ତନ କରିବା ସମ୍ଭାବନା ନାହିଁ । ମାତ୍ର ଶ୍ରୀଲଙ୍କା ବ୍ୟାଟିଂ କ୍ରମରେ ପରିବର୍ତ୍ତନ କରିପାରେ । ଭିଷ୍ମୀ ଗୁଣରତ୍ନେଙ୍କ ସ୍ଥାନରେ ହାସିନୀ ପେରେରା ଓପନ କରିବା ଆଶା କରାଯାଉଛି । ଇଂଲଣ୍ଡ ପକ୍ଷରୁ ହିଥର ନାଇଟଙ୍କ ଉପରେ ନଜର ରହିବ । ସେ ଶ୍ରୀଲଙ୍କାରେ ପୂର୍ବରୁ ୨ଟି ଅର୍ଦ୍ଧଶତକ ଅର୍ଜନ କରିସାରିଛନ୍ତି । ପ୍ରେମଦାସା ଷ୍ଟାଡ଼ିୟମ୍ ପିଚ୍ ବ୍ୟାଟିଂ ପାଇଁ ଅନୁକୂଳ ଥିଲେ ହେଁ ସ୍ପିନରଙ୍କୁ ସହାୟତା କରିବା ନିଶ୍ଚିତ । ପ୍ରଥମ ଭାଗ ତୁଳନାରେ ଦ୍ୱିତୀୟ ଭାଗରେ ବ୍ୟାଟିଂ ସହଜ ହେବ । ତେଣୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଆଶା କରାଯାଉଛି ।
ସମ୍ଭାବ୍ୟ ଦଳ
ଶ୍ରୀଲଙ୍କା: ହାସିନୀ ପେରେରା, ଚାମରି ଆଟ୍ଟାପଟୁ (ଅଧିନାୟିକା), ହର୍ଷିତା ସମରବିକ୍ରମା, ଭିଷ୍ମୀ ଗୁଣରତ୍ନେ, କବିଶା ଦିଲହାରୀ, ନୀଳକ୍ଷୀକା ଡି ସିଲଭା, ଅନୁଷ୍କା ସଞ୍ଜିବନୀ, ସୁଗନ୍ଧିକା କୁମାରୀ, ଅଚିନି କୂଳସୂରିୟା, ଉଦେଶିକା ପ୍ରବୋଧିନୀ, ଇନୋକା ରଣାବୀରା ।
ଇଂଲଣ୍ଡ: ତାମି ବ୍ୟୁମୋଣ୍ଟ, ଆମି ଜୋନ୍ସ, ହିଥର ନାଇଟ, ନାତାଲି ସ୍କିଭର-ବ୍ରଣ୍ଟ (ଅଧିନାୟିକା), ଶୋଫିଆ ଡଙ୍କଲି, ଏମା ଲାମ୍ବ, ଆଲିସ କ୍ୟାପସୀ, ଚାର୍ଲି ଡିନ, ଶୋଫି ଏକ୍ଲେଷ୍ଟୋନ, ଲିନସେ ସ୍ମିଥ, ଲାଉରେନ ବେଲ ।
