କଲମ୍ବୋ,୧୪/୧୦: ଚଳିତ ମହିଳା ଦିନିକିଆ ବିଶ୍ୱକପ୍ର ୧୫ତମ ଲିଗ ମ୍ୟାଚରେ ନ୍ୟୁଜିଲାଣ୍ଡ ଓ ଶ୍ରୀଲଙ୍କା ପରସ୍ପରକୁ ଭେଟିବେ । ଉଭୟ ଦଳ ପାଇଁ ବିଜୟ ଜରୁରି ହୋଇ ପଡ଼ିଥିବାରୁ ମଙ୍ଗଳବାର ଏକ ସଂଘର୍ଷପୂର୍ଣ୍ଣ ମ୍ୟାଚ୍ ଦେଖିବାକୁ ମିଳିବ । ଶ୍ରୀଲଙ୍କା ୨ଟି ମ୍ୟାଚ୍ ହାରି ସାରିଛି । କେବଳ ଅଷ୍ଟ୍ରେଲିଆ ବିପକ୍ଷ ମ୍ୟାଚ୍ ବର୍ଷା ଯୋଗୁଁ ବାତିଲ ହେବାରୁ ଶ୍ରୀଲଙ୍କା ୧ ପଏଣ୍ଟ ଅର୍ଜନ କରିଥିଲା । ସେହିପରି ନ୍ୟୁଜିଲାଣ୍ଡ ପ୍ରଥମ ୨ଟି ମ୍ୟାଚ୍ରେ ଯଥାକ୍ରମେ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ବିପକ୍ଷରେ ପରାଜିତ ହେବା ପରେ ବାଂଲାଦେଶ ବିପକ୍ଷରେ ବିଜୟ ଖାତା ଖୋଲିଥିଲା ।
ମଙ୍ଗଳବାର ନ୍ୟୁଜିଲାଣ୍ଡର ପଲା ଭାରି ରହିବ । କିନ୍ତୁ ବିପର୍ଯ୍ୟୟ ଘଟାଇବାର କ୍ଷମତା ଶ୍ରୀଲଙ୍କା ନିକଟରେ ରହିଛି । ଉଭୟ ଦଳ ମଧ୍ୟରେ ୧୫ଟି ମ୍ୟାଚ୍ ଖେଳାଯାଇଛି । ଏଥିରୁ ନ୍ୟୁଜିଲାଣ୍ଡ ୧୩ଟି ମ୍ୟାଚ୍ ଜିତିଛି । ଶ୍ରୀଲଙ୍କା ୨ଟି ମ୍ୟାଚ୍ ବିଜୟୀ ହୋଇଛି । ୨୦୨୩ରେ ନ୍ୟୁଜିଲାଣ୍ଡ ଏକ ୩ମ୍ୟାଚ୍ ବିଶିଷ୍ଟ ସିରିଜ ଖେଳିବାକୁ ଶ୍ରୀଲଙ୍କା ଆସିଥିଲା । ଏହି ସିରିଜକୁ ଶ୍ରୀଲଙ୍କା ୨-୧ରେ ଜିତିଥିଲା । ବର୍ତ୍ତମାନ ଦଳର ଅଧିନାୟିକା ଥିବା ଚାମରି ଆଟ୍ଟାପଟୁ ଏକ ମ୍ୟାଚ୍ରେ ୮୦ଟି ବଲରୁ ଅପରାଜିତ ୧୪୦ ରନ କରି ଦଳକୁ ବିଜୟୀ କରାଇଥିଲେ ।
୨ବର୍ଷ ପରେ ଉଭୟ ଦଳ ମଙ୍ଗଳବାର ସାମ୍ନା ସାମ୍ନି ହେବେ । ତେଣୁ ଆଟ୍ଟାପଟୁ ମଙ୍ଗଳବାର ଫର୍ମକୁ ଫେରିଲେ ଶ୍ରୀଲଙ୍କାର ବିଜୟ ସମ୍ଭବ ହୋଇପାରିବ । ମଙ୍ଗଳବାର ଆମେଲିଆ କେର ଓ ଇନୋକା ରଣାବୀରାଙ୍କ ଉପରେ ନଜର ରହିବ । ନ୍ୟୁଜିଲାଣ୍ଡ ଅଲରାଉଣ୍ଡର ଆମେଲିଆ ଚମତ୍କାର ଫର୍ମରେ ରହିଛନ୍ତି । ସେହିପରି ଶ୍ରୀଲଙ୍କା ସ୍ପିନର ଇନୋକା ଗତ ୨ଟି ମ୍ୟାଚ୍ରେ ୭ଟି ୱିକେଟ୍ ନେଇ ସାରିଛନ୍ତି ।
ପ୍ରେମଦାସା ଷ୍ଟାଡ଼ିୟମ୍ ପିଚ୍ ସ୍ପିନରଙ୍କୁ ବେଶ୍ ସହାୟତା କରୁଛି । ମାତ୍ର ଟସ୍ ଏଠାରେ ନିର୍ଣ୍ଣାୟକ ଭୂମିକା ଗ୍ରହଣ କରିବ । ପିଚ୍ ମନ୍ଥର ଥିବାରୁ ବିସ୍ଫୋରକ ବ୍ୟାଟିଂ କଷ୍ଟକର ହେବ । ଉଭୟ ଭାଗରେ ସ୍ପିନର ସଫଳ ହେବେ । ତଥାପି ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଦଳ
ଶ୍ରୀଲଙ୍କା: ହାସିନି ପେରେରା, ଚାମରି ଆଟ୍ଟାପଟୁ (ଅଧିନାୟିକା), ହର୍ଷିତା ସମରବିକ୍ରମା, ଭିଷ୍ମୀ ଗୁଣରତ୍ନେ, କବିଶା ଦିଲହାରୀ, ନୀଳକ୍ଷିକା ସିଲଭା, ଅନୁଷ୍କା ସଞ୍ଜିବନୀ, ଦେଓମି ବିହଙ୍ଗା, ସୁଗନ୍ଧିକା କୁମାରୀ, ଉଦେଶିକା ପ୍ରବୋଧିନୀ, ଇନୋକା ରଣାବୀରା ।
ନ୍ୟୁଜିଲାଣ୍ଡ: ସୁଜି ବେଟ୍ସ, ଜର୍ଜିୟା ପ୍ଲିମର, ଆମେଲିଆ କେର, ଶୋଫି ଡିଭାଇନ (ଅଧିନାୟିକା), ବ୍ରୁକ ହାଲିଡେ, ମାଡି ଗ୍ରୀନ, ଇସାବେଲା ଗେଜ, ଜେସ କେର/ରୋଜମେରୀ ମାଇର, ଲି ତାହୁହୁ, ଏଡେନ କାର୍ସନ, ବ୍ରି ଇଲିଂ ।
