ଜଗତସିଂହପୁର,୦୬/୧୦: ଜଗତସିଂହପୁର ଜିଲାରେ ମୂର୍ତ୍ତି ଚୋରି ରାକେଟ ସକ୍ରିୟ ହୋଇ ଉଠିଛି । ଏହି ମୂର୍ତ୍ତୀ ଚୋରିରେ ୩ ଭାଇ ଲିପ୍ତ ଥିବାବେଳେ ଚଢେଇ ଗାଁ ରେ ଗତକାଲି ଜଗତସିଂହପୁର ସଦର ପୋଲିସ ଚଢ଼ାଉ କରି ଜଣେ ମୂର୍ତ୍ତୀ ଚୋର ଓ ତାର ବୃଦ୍ଧା ମାଆଙ୍କୁ ଅଟକ ରଖିଥିବା ସହ ଅଭିଯୁକ୍ତ ଘରୁ ୫୦ରୁ ଉର୍ଦ୍ଧ୍ୱ ବିଭିନ୍ନ ଧାତୁର ମୂର୍ତ୍ତୀ ସହ ପିତଳ ନାଗ ମୂର୍ତ୍ତୀ, ଘଣ୍ଟ ଓ ଅନ୍ୟାନ୍ୟ ବହୁ ମୂଲ୍ୟବାନ ସାମଗ୍ରୀ ଜବତ କରିଛି । ଚୋର ତିନିଜଣ ବରଦା ପ୍ରସନ୍ନ ଆଚାର୍ଯ୍ୟ, ଅନ୍ନଦା ପ୍ରସନ୍ନ ଆଚାର୍ଯ୍ୟ ଏବଂ ସାରଦା ଆଚାର୍ଯ୍ୟ ବୋଲି ଜଣାପଡ଼ିଛି । ତନ୍ମଧ୍ୟରୁ ସାରଦା ଆଚାର୍ଯ୍ୟ ଏବଂ ତାଙ୍କ ମାଙ୍କୁ ଅଟକ ରଖିଛି ପୋଲିସ ।
ସୂଚନା ମୁତାବକ, ଅକ୍ଟୋବର ୪ ତାରିଖରେ ଚଢେଇ ଗାଁର ଦୁଇ ଭାଇ ବରଦା ପ୍ରସନ୍ନ ଆଚାର୍ଯ୍ୟ ଓ ଅନ୍ନଦା ପ୍ରସନ୍ନ ଆଚାର୍ଯ୍ୟ ଏକ ମନ୍ଦିରରୁ ଚୋରି କରୁଥିଲେ । ଏହି ସମୟରେ ଗ୍ରାମବାସୀଙ୍କ ସହଯୋଗରେ ସେମାନଙ୍କୁ ପୋଲିସ ଗିରଫ କରିଥିଲା । ତେବେ ରବିବାର ପୋଲିସ ଚଢେଇ ଗାଁ ସ୍ଥିତ ସେମାନଙ୍କ ଘର ଉପରେ ଚଢ଼ାଉ କରି ଲକ୍ଷାଧିକ ଟଙ୍କା ମୂଲ୍ୟର ବିଭିନ୍ନ ଧାତୁ ନିର୍ମିତ ମୂର୍ତ୍ତୀ ସହ ପିତ୍ତଳ ନାଗ ମୂର୍ତ୍ତୀ, ଘଣ୍ଟ ବାସନ କୁସନ ଆଦି ଜବତ କରିଛି । ଅଭିଯୁକ୍ତ ମାନଙ୍କର ବଡ଼ ଭାଇ ସାରଦା ଆଚାର୍ଯ୍ୟକୁ ଓ ତାଙ୍କ ମାଆଙ୍କୁ ଥାନାକୁ ଆଣି ଅଟକ ରଖିବା ସହ ତଦନ୍ତ ଚଳାଇଛି ପୋଲିସ ।
ଅଭିଯୁକ୍ତ ୩ଭାଇ ଜିଲ୍ଲା ତଥା ଜିଲ୍ଲା ବାହାରୁ ବିଭିନ୍ନ ମନ୍ଦିରରୁ ମୂର୍ତ୍ତୀ ଚୋରି କରି ଆସୁଥିଲେ । ଏମାନଙ୍କ ସହିତ ଆଉ କିଛି ସହଯୋଗୀ ରହିଥିବାର ତଦନ୍ତରୁ ଜଣାପଡ଼ିଛି । ଏମାନେ ଜିଲ୍ଲା ତଥା ରାଜ୍ୟର ବିଭିନ୍ନ ମନ୍ଦିରରୁ ଦୀର୍ଘ ବର୍ଷ ହେଲା ବହୁ ମୂଲ୍ୟବାନ ମୂର୍ତ୍ତୀ ଚୋରି କରି ସେହୁଡ଼ିକୁ ବାହାରକୁ ଚୋରା ଚାଲାଣ କରିବାରେ ଲିପ୍ତ ଥିଲେ ବୋଲି ଜଣାପଡ଼ିଛି । ଏମାନଙ୍କ ସହିତ ଆଉ କେଉଁମାନେ ସମ୍ପୃକ୍ତ ଅଛନ୍ତି ସେ ବାବଦରେ ପୋଲିସ ତଦନ୍ତ ଚଳାଇଛି ।
