ଦାରିଙ୍ଗବାଡି,୨୭/୧୦(ଆପ୍ର): ଦାରିଙ୍ଗବାଡି ଅଞ୍ଚଳରେ ଦିନ କୁ ଦିନ ବୃଦ୍ଧି ପାଉଛି ବେଆଇନ ପଥର ଖାଦାନ ସହ ବ୍ଲାଷ୍ଟିଙ୍ଗ । ହେଲେ ଚିର ନିଦ୍ରା ରେ ସ୍ଥାନୀୟ ପ୍ରଶାସନ । ବେଆଇନ ପଥର ଖାଦାନ ସହ ବ୍ଲାଷ୍ଟିଙ୍ଗ ଫଳରେ ସରକାର ଙ୍କ କୋଟି କୋଟି ଟଙ୍କାର ରାଜସ୍ବ ହାନି ହେଉଛି। ହେଲେ ବିଭାଗୀୟ ଅଧିକାରୀ ଙ୍କ ନଜର ପଡୁ ନାହିଁ । ପଥର ଖାଦାନ ନିମନ୍ତେ ଖଣି ବିଭାଗ ଠାରୁ ଅନୁମତି ନେବାର ପ୍ରାବଧାନ ରହିଥିବା ବେଳେ ବ୍ଲାଷ୍ଟିଙ୍ଗ ପାଇଁ ଜିଲ୍ଲାପାଳ କାର୍ଯ୍ୟାଳୟ ରୁ ଅନୁମତି ନେବାକୁ ନିୟମ ରହିଛି । ହେଲେ କୌଣସି ଅନୁମତି ନନେଇ ଚାଲିଛି ବେଆଇନ କାର୍ଯ୍ୟ । ହେଲେ ଏଥି ପ୍ରତି ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆ ଯାଉନାହିଁ ।
ଦାରିଙ୍ଗବାଡି ଥାନା ଅନ୍ତର୍ଗତ ପର୍ତମାହା ପଞ୍ଚାୟତର ଡ଼ଲାବାଡ଼ି ଗ୍ରାମରେ ବେଆଇନ ପଥର ଖାଦାନ ହୋଇଥିବା ନେଇ ଖବର ପ୍ରକାଶ ପାଇବା ପରେ ତହସିଲଦାର ତଦନ୍ତ ନିର୍ଦ୍ଦେଶ ଦେଇଥିବା ବେଳେ ପୁଣି ଆଉ ଏକ ବେଆଇନ ପଥର ଖାଦାନ ଦେଖିବାକୁ ମିଳିଛି । ବାଡାବାଙ୍ଗା ପଞ୍ଚାୟତ ଅନ୍ତର୍ଗତ ପିଅବାଡି ନିକଟ ପାହାଡ଼ ରେ ବେଆଇନ ପଥର ଖାଦାନ ସହ ପଥର ବ୍ଲାଷ୍ଟିଙ୍ଗ ହେଉଥିବା ଦେଖିବାକୁ ମିଳିଛି। ଅଧା ପାହାଡ଼ ରୁ ପଥର ବ୍ଲାଷ୍ଟିଙ୍ଗ ହୋଇ ଚୋରା ଚାଲାଣ କରାଯାଇଥିବା ବେଳେ ସରକାରଙ୍କ ଲକ୍ଷାଧିକ ଟଙ୍କାର ରାଜସ୍ବ ହାନି ହୋଇଛି । ଜିଲ୍ଲା ବାହାରର କିଛି ଠିକାଦାର ସ୍ଥାନୀୟ ପ୍ରଶାସନ ସହ ସଲା ସୁତରା ହୋଇ ଏଭଳି ବେଆଇନ କାର୍ଯ୍ୟ କୁ ପ୍ରଶୟ ଦେଉଥିବା ବେଳେ କାର୍ଯ୍ୟାନୁଷ୍ଠାନ ନେବାକୁ ପଛାଉଛନ୍ତି ଅଧିକାରୀ । ଦୁଇ ଦୁଇଟି ସ୍ଥାନରେ ବେଆଇନ ଖାଦାନ ସହ ବ୍ଲାଷ୍ଟିଙ୍ଗ ହେବା ସହ ସହ ଗାଡ଼ିରେ ପଥର ଚୋରା ଚାଲାଣ ହେଉଥିବା ଯୋଗୁଁ ସରକାରଙ୍କ ରାଜସ୍ବ ହାନି ହେଉଛି । ଏଣୁ ଏହାର ସଠିକ୍ ତଦନ୍ତ କରି ବେଆଇନ ଭାବେ କାର୍ଯ୍ୟ କରୁଥିବା ଠିକାଦାରଙ୍କ ଉପରେ କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି ।
