ଭୁବନେଶ୍ୱର, ୦୧/୦୩: ଏଥର ବି ଭୀଷଣ ତାତି । ଜଳାଇବ ମାର୍ଚ୍ଚରୁ ମେ’ ଖରା । କଲବଲ କରିବ ଜନଜୀବନକୁ । ଉଭୟ ଦିନ ଓ ରାତି ତାପମାତ୍ରା ଅସ୍ୱାଭାବିକ ଭାବେ ବୃଦ୍ଧି ପାଇବ । ବଡ଼ କଥା ହେଲା, ମାର୍ଚ୍ଚରୁ ଆରମ୍ଭ ହୋଇଯିବ ଗ୍ରୀଷ୍ମ ଲହରୀ । ପାଣିପାଗ ବିଭାଗ ଏମିତି ପୂର୍ବାନୁମାନ ଦେଖାଇଛି ।
ମାର୍ଚ୍ଚରୁ ମେ’ ପର୍ଯ୍ୟନ୍ତ ସମ୍ଭାବ୍ୟ ପାଣିପାଗକୁ ନେଇ ଆଇଏମ୍ଡି ପୂର୍ବାନୁମାନ ଜାରି କରିଛି । ଏହି ଆକଳନ ଅନୁସାରେ ଦେଶର ଅଧିକାଂଶ ସ୍ଥାନରେ ମାର୍ଚ୍ଚ ମାସ ଓ ମାର୍ଚ୍ଚରୁ ମେ’ ମାସ ପର୍ଯ୍ୟନ୍ତ ତାପମାତ୍ରା ସ୍ୱାଭାବିକଠାରୁ ଅଧିକ ରହିବ । ଗ୍ରୀଷ୍ମ ଲହରୀ ଦିନ ସଂଖ୍ୟା ବି ସ୍ୱାଭାବିକଠାରୁ ଅଧିକ ଲମ୍ବିବ । ଓଡ଼ିଶାରେ ବି ଏଭଳି ପ୍ରଚଣ୍ଡ ଗରମରୁ ତ୍ରାହି ମିଳିବ ନାହିଁ ।
ଆଇଏମ୍ଡି ଜାରି କରିଥିବା ସମ୍ଭାବ୍ୟ ପୂର୍ବାନୁମାନ ଚିତ୍ର ଅନୁସାରେ ମାର୍ଚ୍ଚରୁ ହିଁ ଗରମ ପ୍ରକୋପ ଦେଖାଇବ ଓଡ଼ିଶାରେ । ଦିନ ତାପମାତ୍ରା ସ୍ୱାଭାବିକଠାରୁ ଅଧିକ ରହିବା ସହ ରାତିରେ ବି ଗରମ ବଢ଼ିବ । ବିଶେଷ କରି ଉତ୍ତର-ପଶ୍ଚିମ ଓଡ଼ିଶାରେ ତାପମାତ୍ରା ଅଧିକ ରହିବ । କେନ୍ଦ୍ରୀୟ ଓ ପଶ୍ଚିମ ଓଡ଼ିଶାରେ ଗ୍ରୀଷ୍ମ ଲହରୀ ଅନଭୂତ ହେବା ଆଶଙ୍କା ରହିଛି ।
ମାର୍ଚ୍ଚରୁ ମେ’ ପର୍ଯ୍ୟନ୍ତ ପାଣିପାଗ ଏ ବର୍ଷ ପୁଣି ଉତ୍ତପ୍ତ ରହିବ । ରାଜ୍ୟ ସାରା ସ୍ୱାଭାବିକଠାରୁ ତାପମାତ୍ରା ଅଧିକ ରହିବ । ପଶ୍ଚିମ ଓଡ଼ିଶାରେ ଏ ପ୍ରକୋପ ବେଶି ହେବ । ରାତିବେଳା ବି ଗରମରୁ ନିସ୍ତାର ମିଳିବନି । ଗ୍ରୀଷ୍ମ ପ୍ରବାହ ଏ ବର୍ଷ ବି କଲବଲ କରିବ । ବିଶେଷ କରି ଉପକୂଳ ଓଡ଼ିଶାରେ ଲମ୍ବା ଓ ସାଂଘାତିକ ଗ୍ରୀଷ୍ମ ଲହରୀ ଛଟପଟ କରିପାରେ ।
କେନ୍ଦ୍ରୀୟ ଓ ଦକ୍ଷିଣ ଓଡ଼ିଶାରେ ମଧ୍ୟ ଗ୍ରୀଷ୍ମ ଲହରୀ ପ୍ରବାହିତ ହୋଇପାରେ । ପାଣିପାଗ ବିଭାଗର ପୂର୍ବାନୁମାନ କହୁଛି, ଏ ବର୍ଷ ମାର୍ଚ୍ଚରେ ରାଜ୍ୟରେ କିଛି ବର୍ଷା ସମ୍ଭାବନା ଅଛି । ଦକ୍ଷିଣ ଏବଂ ଉତ୍ତରରେ କିଛି ବର୍ଷା ଥିବାବେଳେ ଉପକୂଳରେ ବି ହାଲୁକା ବର୍ଷା ହୋଇପାରେ ।
ରାଜ୍ୟରେ ବର୍ତ୍ତମାନ ଖରା ପ୍ରକୋପ ବଢ଼ିବା ସହ ଗରମ ବଢ଼ିଛି । ରାଜ୍ୟର ୧୫ଟି ସ୍ଥାନରେ ଦିନ ତାପମାତ୍ରା ୩୫ ଡିଗ୍ରୀ ପାର୍ କରିଥିବାବେଳେ ସେଥିରୁ ୭ଟି ସହର ୩୬ ଡିଗ୍ରୀ ଉପରେ ଥିଲା । ଝାରସୁଗୁଡ଼ା ସର୍ବାଧିକ ୩୭ ଡିଗ୍ରୀ ତାଉରେ ସିଝିଛି । ସୁନ୍ଦରଗଡ଼ ୩୬.୯, ଭବାନୀପାଟଣା ୩୬, ସମ୍ବଲପୁର ୩୬.୪, ବଲାଙ୍ଗୀର ୩୬.୫, ଟିଟିଲାଗଡ଼ ୩୬.୫, ବୌଦ୍ଧ ୩୬.୫ ଡିଗ୍ରୀ ଛୁଇଁଥିଲା । ଉପକୂଳ ଓଡ଼ିଶାର ଭୁବନେଶ୍ୱର ଓ ଚାନ୍ଦବାଲିରେ ପାରଦ ୩୪ ଡିଗ୍ରୀ ଛୁଇଁଛି ।
ସୋଆ ଜଳବାୟୁ ଓ ପରିବେଶ କେନ୍ଦ୍ର ନିର୍ଦ୍ଦେଶକ ଡକ୍ଟର ଶରତ ଚନ୍ଦ୍ର ସାହୁଙ୍କ କହିବାନୁସାରେ ବର୍ତ୍ତମାନ ଦିନ ତାପମାତ୍ରା ବଢ଼ିବ ଆସନ୍ତା ୬ ତାରିଖ ପର୍ଯ୍ୟନ୍ତ । ଆସନ୍ତା ଦିନେ ଦୁଇଦିନରେ କେତେକ ସ୍ଥାନରେ ପାରଦ ୩୭ ଓ ୩୮ ଡିଗ୍ରୀ ପହଞ୍ଚିପାରେ । ଚଳିତବର୍ଷ ଗ୍ରୀଷ୍ମକୁ ନେଇ ଡ. ସାହୁ କହିଛନ୍ତି, ଗ୍ଲୋବାଲ ୱାର୍ମିଂ ଯୋଗୁ କ୍ରମଶଃ ତାପମାତ୍ରା ବୃଦ୍ଧି ପାଉଛି । ୨୦୨୩ରେ ଭୀଷଣ ଗ୍ରୀଷ୍ମ ପ୍ରକୋପ ଥିଲା । ୨୦୨୪ରେ ତା’ଠାରୁ ଅଧିକ ଗରମ ହେଲା । ଏ ବର୍ଷ ପୂର୍ବବର୍ଷଠାରୁ ଆହୁରି ଅଧିକ ଗରମ ପ୍ରକୋପ ରହିପାରେ । ପୂର୍ବ ବର୍ଷ ତୁଳନାରେ ହାରାହାରି ତାପମାତ୍ରା ୦.୨ରୁ ୦.୫ ଡିଗ୍ରୀ ଅଧିକ ରହିବା ଆଶଙ୍କା ଅଛି । ଏପ୍ରିଲ ମାସ ଏବଂ ମେ’ର ଦ୍ୱିତୀୟାର୍ଦ୍ଧରେ ସର୍ବାଧିକ ଗ୍ରୀଷ୍ମ ପ୍ରକୋପ ରହିପାରେ । ଚିନ୍ତାର ବିଷୟ ହେଲା, ମାର୍ଚ୍ଚ ମାସରୁ ଗ୍ରୀଷ୍ମ ଲହରୀ ସମ୍ଭାବନା ରହିଛି ।
ଆଇଏମ୍ଡି ପୂର୍ବାନୁମାନ ଅନୁସାରେ ଚଳିତ ବର୍ଷ ମାର୍ଚ୍ଚରୁ ମେ’ ପର୍ଯ୍ୟନ୍ତ ଦେଶର ଅଧିକାଂଶ ସ୍ଥାନରେ ଦିନ ଓ ରାତି ତାପମାତ୍ରା ସ୍ୱାଭାବିକଠାରୁ ଅଧିକ ରହିବା ସମ୍ଭାବନା ଅଛି । ଅଧିକାଂଶ ସ୍ଥାନରେ ଗ୍ରୀଷ୍ମ ଲହରୀ ଦିନ ସଂଖ୍ୟା ସ୍ୱାଭାବିକଠାରୁ ବଢ଼ିପାରେ । ମାର୍ଚ୍ଚ ମାସରେ ଦେଶର ଅଧିକାଂଶ ସ୍ଥାନରେ ଦିନ ଓ ରାତି ତାପମାତ୍ରା ସ୍ୱାଭାବିକଠାରୁ ଅଧିକ ରହିବ । କେନ୍ଦ୍ରୀୟ ଭାରତର ଅଧିକାଂଶ ଅଞ୍ଚଳ, ଉତ୍ତର ପଶ୍ଚିମ ଏବଂ ପୂର୍ବ ଭାରତର କିଛି ସ୍ଥାନରେ ଗ୍ରୀଷ୍ମ ଲହରୀ ଦିନ ସଂଖ୍ୟା ସ୍ୱାଭାବିକଠାରୁ ଅଧିକ ରହିପାରେ । ମାର୍ଚ୍ଚରେ ଦେଶରେ ବର୍ଷା ସ୍ୱାଭାବିକ ସମ୍ଭାବନା ଅଛି । ଏପଟେ ପାଣିପାଗ ବିଭାଗ କହିଛନ୍ତି, ବର୍ତ୍ତମାନ ରାଜ୍ୟରେ ପାଗ ଶୁଖିଲା ରହିବା ସହ ରାତି ତାପମାତ୍ରା ୨ରୁ ୩ ଡିଗ୍ରୀ ବୃଦ୍ଧି ପାଇବ ।
