ନୂଆଦିଲ୍ଲୀ: ନୂତନ ଦଲାଇ ଲାମା ଚୟନକୁ ନେଇ ବିବାଦ ଘନେଇବା ପରେ ଭାରତ ସରକାର ଏକ ବଡ ଟିପ୍ପଣି ଜାରି କରିଛନ୍ତି। ଭବିଷ୍ୟତରେ ହେବାକୁ ଥିବା ଏହି ଧାର୍ମିକ ପ୍ରକ୍ରିୟାକୁ ନେଇ ଭାରତ କୌଣସି ମନ୍ତବ୍ୟ ରଖିବ ନାହିଁ ବୋଲି ଆନୁଷ୍ଠାନିକ ଭାବରେ ଘୋଷଣା କରାଯାଇଛି।
ଏନେଇ ବୈଦେଶିକ ମନ୍ତ୍ରଣାଳୟ(ଏମଇଏ)ର ମୁଖପାତ୍ର ରଣଧିର ଜୟସୁଆଲ ଏକ ସାମ୍ୱାଦିକ ସମ୍ମିଳନିରେ ଟିପ୍ପଣି ଦେଇ କହିଛନ୍ତି ଯେ “ନିକଟରେ ଦଲାଇ ଲାମାଙ୍କ ପକ୍ଷରୁ ନୂତନ ଦଲାଇ ଲାମା ଚୟନ ନେଇ ମନ୍ତବ୍ୟ ଆସିଛି। ଭାରତ ସରକାର ଏଭଳି ଧାର୍ମିକ କାର୍ଯ୍ୟକୁ ନେଇ କୌଣସି ପ୍ରକାରର ନିଷ୍ପତ୍ତି କିମ୍ୱା ଘୋଷଣା କରିନାହାନ୍ତି। ଏହା ସମ୍ପୂର୍ଣ୍ଣ ଭାବେ ବିଶ୍ୱାସ ଓ ଧର୍ମ ଉପରେ ନିର୍ଭର କରେ।” ସେ ଆହୁରି ମଧ୍ୟ କହିଛନ୍ତି ଯେ ଭାରତର ସମ୍ୱିଧାନ ଓ ଭାରତ ସରକାର ସମସ୍ତଙ୍କୁ ନିଜ ଧର୍ମ ପାଇଁ ସ୍ୱାଧିନତା ପ୍ରଦାନ କରିଛନ୍ତି, ଯାହା ଆଗକୁ ମଧ୍ୟ ଜାରି ରହିବ।
ଭବିଷ୍ୟତରେ ହେବାକୁ ଥିବା ତିବ୍ଦତର ଧାର୍ମିକ ନେତୃତ୍ତ୍ୱର ଓ ନୂଆ ଦଲାଇ ଲାମାଙ୍କ ଚୟନକୁ ନେଇ ସମଗ୍ର ବିଶ୍ୱର ନଜର ବର୍ତ୍ତମାନର ଦଲାଇ ଲାମାଙ୍କ ଉପରେ ରହିଛି। ଖାସକରି ଚୀନର ବିନା ହସ୍ତକ୍ଷେପରେ କିପରି ନୂଆ ଦଲାଇ ଲାମାଙ୍କୁ ଚୟନ କରାଯିବ ସେନେଇ ସମସ୍ତେ ଏହି ଘଟଣା ଉପରେ ତୀକ୍ଷ୍ଣ ନଜର ରଖିଛନ୍ତି। ତେବେ ଭାରତ ଦୁନିଆର ସବୁଠୁ ବଡ ତିବ୍ଦତିଆନ ଶରଣାର୍ଥି ଦେଶ ହୋଇଥିବାରୁ ଏହି ମାମଲାରେ ନିରପେକ୍ଷତା ଅବଲମ୍ୱନ କରୁଛି।
ତେବେ ପୂର୍ବରୁ କେନ୍ଦ୍ର ସଂଖ୍ୟା ଲଘୁ ମନ୍ତ୍ରୀ କିରଣ ରିଜ୍ଜୁ ଦଲାଇ ଲାମାଙ୍କ ନିଷ୍ପତ୍ତି କ୍ରମେ ନୂଆ ଦଲାଇ ଲାମା ଚୟନ ହେବା ଉଚିତ ବୋଲି ମନ୍ତବ୍ୟ ଦେଇଥିଲେ। ଯାହାକୁ ନେଇ ଚିହିଙ୍କି ଉଠିଥିଲା ଚୀନ। କାରଣ ଚୀନ ଚାହୁଁଛି ପରବର୍ତ୍ତୀ ଲାମା ଚୀନ ସରକାରଙ୍କ ସମର୍ଥନରେ ନିଯୁକ୍ତ ହୁଅନ୍ତୁ। ଯାହାଦ୍ୱାରା ତିବ୍ଦତରେ ବର୍ଷବର୍ଷ ଧରି ଚାଲି ଆସୁଥିବା ଅସୁବିଧା ଗୁଡିକୁ ଚୀନ ପ୍ରତିହତ କରିପାରିବ। କାରଣ ଦଲାଇ ଲାମା ହେଉଛନ୍ତି ତିବ୍ଦତର ସର୍ବଶ୍ରେଷ୍ଠ ଧର୍ମଗୁରୁ। ଯାହାଙ୍କ ଦ୍ୱାରା ଚାଇନା ନିଜ ସୀମା ଅସୁବିଧା ଗୁଡିକୁ ଠିକ କରିବାକୁ ଚାହୁଁଛି।
ତିବ୍ଦତର ଏହି ମହାନ ଧାର୍ମିକ ବିଶ୍ୱାସ ଉପରେ ଚାଇନା ଆରମ୍ଭରୁ ହସ୍ତକ୍ଷେପ କରିବାକୁ ଚାହୁଁଛି। ଯେଉଁଥିପାଇଁ ଭାରତରେ ଶରଣ ନେଇଥିବା ଚତୁର୍ଦଶ ଦଲାଇ ଲାମା ଏହାର ଘୋର ବିରୋଧ କରୁଛନ୍ତି। ତେବେ ଆଗକୁ ହେବାକୁ ଥିବା ପଞ୍ଚଦଶ ଦଲାଇ ଲାମା ଚୟନରେ ଆଗକୁ କଣ ହେଉଛି ତାହା ଦେଖିବା ବାକି ରହିଲା।
