ମୁମ୍ବାଇ ୧୩/୧୧: ଅଲ୍ଲୁ ଅର୍ଜୁନ ଷ୍ଟାରର୍ ବହୁ ପ୍ରତୀକ୍ଷିତ ଫିଲ୍ମ ‘ପୁଷ୍ପା-୨’ରେ ନଜର ଆସିବେ ସାଉଥ୍ ନାୟିକା ଶ୍ରୀଲୀଲା । ଫିଲ୍ମରେ ଆଇଟମ୍ ନମ୍ବର ପାଇଁ ତାଙ୍କୁ କାଷ୍ଟ୍ କରାଯାଇଛି । ତାଙ୍କ ଦମ୍ଦାର ନୃତ୍ୟ କେବଳ ଫିଲ୍ମରେ ଉତ୍ସାହ ଭରିବ ତାହା ନୁହେଁ, ଫ୍ୟାନ୍ଙ୍କୁ ମଧ୍ୟ ମନୋରଞ୍ଜନର ଭରପୂର ଖୋରାକ ଦେବ ବୋଲି ଆଶା କରାଯାଉଛି । ରିପୋର୍ଟ ଅନୁସାରେ, ଏହି ଖାସ୍ ଗୀତ ପାଇଁ ଶ୍ରୀଲୀଲାଙ୍କୁ ୨ କୋଟି ଟଙ୍କା ପାରିଶ୍ରମିକ ଦିଆଯାଇଛି । ‘ଗୁଣ୍ଟୁର କାରମ’ରେ ତାଙ୍କ ପାରିଶ୍ରମିକର ଏହା ଅଧା । ମହେଶ ବାବୁଙ୍କ ଅଭିନୀତ ଏହି ଫିଲ୍ମରେ ଲିଡ୍ ଲେଡି ଭୂମିକାରେ ନଜର ଆସିଥିବା ଶ୍ରୀଲୀଲାଙ୍କୁ ୪ କୋଟି ପାରିଶ୍ରମିକ ମିଳିଥିଲା । ଯଦି ‘ପୁଷ୍ପା-୧’ରେ ଆଇଟମ୍ ନମ୍ବର ପାଇଁ ସାମନ୍ଥା ନେଇଥିବା ପାରିଶ୍ରମିକ ସହ ଶ୍ରୀଲୀଲାଙ୍କ ପାରିଶ୍ରମିକ ତୁଳନା କରାଯାଏ, ତେବେ ତା’ ଖୁବ୍ କମ୍ ।
‘ଓଃ ଅଣ୍ଟାୱା’ ଗୀତରେ ନୃତ୍ୟ ଲାଗି ସାମନ୍ଥା ୫ କୋଟି ନେଇଥିଲେ । ତାଙ୍କ ଦମ୍ଦାର ନୃତ୍ୟ ଫିଲ୍ମର ମୁଖ୍ୟ ଆକର୍ଷଣ ଥିଲା । ସେହି ଦୃଷ୍ଟିରୁ ଶ୍ରୀଲୀଲାଙ୍କ ପାରିଶ୍ରମିକ ତାଙ୍କଠୁ ୬୦ ପ୍ରତିଶତ କମ୍ । ପୂର୍ବରୁ ଗୁଜବ ଉଠିଥିଲା ଯେ ଏହି ଆଇଟମ୍ ନମ୍ବର ଲାଗି ବଲିଉଡ୍ ଅଭିନେତ୍ରୀ ଶ୍ରଦ୍ଧା କପୁରଙ୍କୁ ନିର୍ମାତା କାଷ୍ଟ୍ କରିବାକୁ ଚାହୁଁଥିଲେ । କିନ୍ତୁ ସେ ୫ କୋଟି ଦାବି କଲେ । ତେଣୁ ତାଙ୍କ ବଦଳରେ ଶ୍ରୀଲୀଲାଙ୍କୁ କାଷ୍ଟ୍ କରାଗଲା । ନିର୍ମାତାଙ୍କର ଏହି ନିଷ୍ପତ୍ତିକୁ ନେଇ ମିଶ୍ର ପ୍ରତିକ୍ରିୟା ମିଳୁଛି । କିଛି କହୁଛନ୍ତି, ଅନ୍ୟ କଳାକାରଙ୍କ ତୁଳନାରେ ଶ୍ରୀଲୀଲା ଏତେ ଲୋକପ୍ରିୟ ନୁହନ୍ତି । ଆଉ କିଛି ତାଙ୍କ ଏଣ୍ଟ୍ରିକୁ ନେଇ ଉତ୍ସାହିତ ଅଛନ୍ତି । ଅଲ୍ଲୁ ଅର୍ଜୁନ ଓ ଶ୍ରୀଲୀଲାଙ୍କ ଗୀତ ସୁଟିଂ ସମୟର ଏକ ଫଟୋ ରିଲିଜ୍ ହେବା ପରଠୁ ଫ୍ୟାନ୍ଙ୍କ ଉତ୍ସାହ ବଢ଼ିଯାଇଛି । ଅଲ୍ଲୁଙ୍କୁ ତାଙ୍କର ସିଗ୍ନେଚର ନାରଙ୍ଗୀ ରଙ୍ଗର ପୋଷାକରେ ଦେଖିବାକୁ ମିଳିଛି । ଶ୍ରୀଲୀଲା କଳା ରଙ୍ଗର ଲମ୍ବା ସ୍କର୍ଟ ଓ ବ୍ଲାଉଜ୍ରେ ନଜର ଆସିଛନ୍ତି । ଫଟୋରେ ଉଭୟଙ୍କ କେମିଷ୍ଟ୍ରି ଫ୍ୟାନ୍ଙ୍କ ଉତ୍ସାହ ବଢ଼ାଇଛି । ବଡ଼ ପରଦାରେ ଉଭୟଙ୍କ ଯୋଡ଼ି କି କମାଲ୍ କରିବ, ତାହା ଦେଖିବାକୁ ଅପେକ୍ଷା ।
