ଭୁବନେଶ୍ୱର, ୨୪।୮: ଅନ୍ତ୍ୟୋଦୟ ଗୃହ ଯୋଜନାର ପ୍ରୋତ୍ସାହନ ରାଶି ପ୍ରଦାନ ନିୟମ ଆଂଶିକ ବଦଳିଛି । ପୂର୍ବରୁ ୪ ମାସରେ ଘର ସାରିଲେ ୨୦ ହଜାର ଟଙ୍କା ମିଳୁଥିଲା । ଏଣିକି ୪ ମାସ ବଦଳରେ ୬ ମାସରେ ଘର ନିର୍ମାଣ ସାରିଲେ ବି ୨୦ ହଜାର ଟଙ୍କାର ପ୍ରୋତ୍ସାହନ ରାଶି ଦିଆଯିବ । ସେହିଭଳି ୬ ମାସ ବଦଳରେ ୮ ମାସରେ ଘର ସାରିଲେ ୧୦ ହଜାର ଟଙ୍କାର ପ୍ରୋତ୍ସାହନ ରାଶି(ଇନସେନଟିଭ୍) ମିଳିବ ବୋଲି ପଞ୍ଚାୟତିରାଜ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ଆଧାର ପେମେଣ୍ଟ୍ ବ୍ରିଜ୍ ସିଷ୍ଟମ୍ରେ ସମସ୍ୟା ଯୋଗୁ ଅନ୍ତ୍ୟୋଦୟ ଗୃହ ଯୋଜନାର ହିତାଧିକାରୀଙ୍କୁ ଘର ନିର୍ମାଣ ସହାୟତା ମିଳି ପାରୁନଥିଲା । ବହୁ ହିତାଧିକାରୀ ବିଳମ୍ବରେ ଦ୍ୱିତୀୟ କିସ୍ତି ଟଙ୍କା ପାଇଥିଲେ । ଏଥିପାଇଁ ଅନେକ ସ୍ଥାନରେ ଘର ନିର୍ମାଣ ଅଧାରେ ଅଟକିଥିଲା । ସେହିଭଳି ମନରେଗା ଅଧୀନରେ ନିର୍ମାଣ ପାଇଁ ମିଳିବାକୁ ଥିବା ଶ୍ରମ ଟଙ୍କା ପାଇବାରୁ ବଞ୍ଚିତ ହେବାର ଆଶଙ୍କା ସୃଷ୍ଟି ହୋଇଥିଲା । ମନରେଗାରେ ଶ୍ରମ ଟଙ୍କା ବାବଦରେ ପ୍ରାୟ ୨୫ ହଜାର ଟଙ୍କା ପାଇଥାଆନ୍ତେ । କିନ୍ତୁ ମନରେଗା ଟଙ୍କା ପାଇବାକୁ ପଞ୍ଚାୟତସ୍ତରରେ ଆଇଡି ଖୋଲିନଥିବାରୁ ଏହି ଟଙ୍କା ହରାଇବାର ଆଶଙ୍କା ଥିଲା ।
ଯଦି ଆଇଡିକୁ ଅପେକ୍ଷା କରି ରହିଥାଆନ୍ତେ ତେବେ ପ୍ରୋତ୍ସାହନ ରାଶି ହାତରୁ ଖସିଥାଆନ୍ତା । ଗୋଟିଏ ପଟେ ମନରେଗା ଟଙ୍କା ଓ ଅପରପକ୍ଷେ ୪ ମାସ ଭିତରେ ପ୍ରୋତ୍ସାହନ ମିଳିବାକୁ ନେଇ ବିରାଟ ଦ୍ୱନ୍ଦ୍ୱ ସୃଷ୍ଟି ହୋଇଥିଲା । ଏହାକୁ ନେଇ ହିତାଧିକାରୀମାନେ ବହୁତ ଚିନ୍ତାରେ ଥିଲେ । ସରକାର ପ୍ରୋତ୍ସାହନ ରାଶି ଦେବାର ସମୟସୀମା ବଢ଼ାଇବା ସହ ୪ ମାସ ବଦଳରେ ୬ ମାସରେ ଘର ସାରିଥିଲେ ବି ପ୍ରୋତ୍ସାହନ ରାଶି ଦେବାକୁ ନିର୍ଦ୍ଦେଶନାମା ଜାରି କରିଛନ୍ତି । ପଞ୍ଚାୟତିରାଜ ଓ ପାନୀୟ ଜଳ ବିଭାଗର ସ୍ୱତନ୍ତ୍ର ପ୍ରକଳ୍ପ ନିର୍ଦ୍ଦେଶକ ସିଦ୍ଧାର୍ଥ ଶଙ୍କର ସ୍ୱାଇଁ ସମସ୍ତ ଜିଲ୍ଲାପାଳ ଓ ଜିଲ୍ଲା ପରିଷଦର କାର୍ଯ୍ୟନିର୍ବାହୀ ଅଧିକାରୀଙ୍କୁ ଚିଠି କରି ଏହି ସଂଶୋଧିତ ଗାଇଡଲାଇନ୍ ସମ୍ପର୍କରେ ଅବଗତ କରାଇଛନ୍ତି । ସେପଟେ ମନରେଗା ଶ୍ରମ ଟଙ୍କା ଦେବାକୁ ଆଇଡି ଖୋଲିବା ପ୍ରକ୍ରିୟା ବି ଆରମ୍ଭ ହୋଇଛି । ଏହି ନିୟମକୁ ଛାଡ଼ି ଗାଇଡଲାଇନରେ ଥିବା ବାକି ସମସ୍ତ ମୂଳ ନିୟମ ଅପରିବର୍ତ୍ତିତ ରହିବ ବୋଲି ପଞ୍ଚାୟତିରାଜ ବିଭାଗ ପକ୍ଷରୁ କୁହାଯାଇଛି ।
