ନୂଆଦିଲ୍ଲୀ,୦୫/୦୭: ଭାରତ ବିପକ୍ଷ ଏଜବାଷ୍ଟନ ଟେଷ୍ଟ ମ୍ୟାଚରେ ଇଂଲଣ୍ଡ ବ୍ୟାଟର ହ୍ୟାରି ବ୍ରୁକ ବ୍ୟାଟିଂରେ ଚମତ୍କାର ପ୍ରଦର୍ଶନ କରିଥିଲେ। ଇଂଲଣ୍ଡର ପ୍ରଥମ ଇନିଂସରେ ବ୍ରୁକ ୨୩୪ ବଲ୍ ରେ ୧୭ ଚୌକା ଏବଂ ଗୋଟିଏ ଛକା ସହାୟତାରେ ୧୫୮ ରନ କରିଥିଲେ। ଏତିକିବେଳେ ବ୍ରୁକ ଜେମି ସ୍ମିଥଙ୍କ ସହିତ ମିଶି ଷଷ୍ଠ ୱିକେଟ ସୁଦ୍ଧା ୩୦୩ ରନର ପାର୍ଟନରସିପ୍ କରିଥିଲେ, ଯାହା ଫଳରେ ଇଂଲଣ୍ଡ ଦଳ ଫଲୋଅନ ଏଡାଇବାରେ ମଧ୍ୟ ସଫଳ ହୋଇଥିଲା।
ମ୍ୟାଚ୍ରେ ପଛୁଆ ନଜର ଆସୁଛି ଇଂଲଣ୍ଡ:
ହ୍ୟାରି ବ୍ରୁକ୍ ଏବଂ ଜେମି ସ୍ମିଥ୍ ଙ୍କ ଚମତ୍କାର ବ୍ୟାଟିଂ ସତ୍ତ୍ୱେ, ଏଜବାଷ୍ଟନ୍ ଟେଷ୍ଟ ମ୍ୟାଚ୍ରେ ଇଂଲଣ୍ଡ ଦଳ ପଛରେ ପଡ଼ିଥିବା ପରି ମନେ ହେଉଛି। ଏହି ମ୍ୟାଚ୍ରେ ଭାରତ ପ୍ରଥମ ଇନିଂସରେ ୫୮୭ ରନ୍ କରିଥିଲା, ଯାହାର ଜବାବରେ ଇଂଲଣ୍ଡର ପ୍ରଥମ ଇନିଂସ ୪୦୭ ରନ୍ରେ ସୀମିତ ରହିଥିଲା। ଅର୍ଥାତ୍ ପ୍ରଥମ ଇନିଂସ ଆଧାରରେ ଭାରତୀୟ ଦଳ ୧୮୦ ରନ୍ରେ ଅଗ୍ରଣୀ ହାସଲ କରିଥିଲା। ଭାରତ ଏକ ଦୃଢ଼ ସ୍ଥିତିରେ ଅଛି, କିନ୍ତୁ ଇଂଲଣ୍ଡକୁ ହାଲୁକା ଭାବରେ ନେବା ଠିକ୍ ହେବ ନାହିଁ। ଚତୁର୍ଥ ଦିନର ଖେଳ ସାରା ମ୍ୟାଚ୍ର ଦିଗ ନିର୍ଣ୍ଣୟ କରିବାକୁ ଯାଉଛି।
ଏବେ ଶତକ ହାସଲକାରୀ ହ୍ୟାରି ବ୍ରୁକ୍ ଭାରତୀୟ ଦଳକୁ ଏକ ଚେତାବନୀ ଦେଇଛନ୍ତି। ବ୍ରୁକ୍ କହିଛନ୍ତି ଯେ, ତାଙ୍କ ଦଳ ଚତୁର୍ଥ ଇନିଂସରେ ଯେକୌଣସି ଟାର୍ଗେଟକୁ ପିଛା କରିବାକୁ ପ୍ରସ୍ତୁତ। ତୃତୀୟ ଦିନର ଖେଳ ଶେଷ ସୁଦ୍ଧା ଭାରତର ମୋଟ ଲିଡ୍ ୨୪୪ ରନ ଥିଲା ଏବଂ ହାତରେ ୯ ୱିକେଟ୍ ବାକି ଥିଲା। ବର୍ତ୍ତମାନ ଦେଖାଯାଉଛି ଯେ ଯଦି ଭାରତୀୟ ଦଳ ଚତୁର୍ଥ ଦିନରେ ଦୁଇରୁ ଅଢ଼େଇ ସେସନ୍ ବ୍ୟାଟିଂ କରେ, ତେବେ ଇଂଲଣ୍ଡକୁ ୫୦୦ ରୁ ଅଧିକ ଟାର୍ଗେଟ ପିଛା କରିବାକୁ ପଡ଼ିପାରେ।
ବିବିସି ସହିତ ଏକ ସ୍ୱତନ୍ତ୍ର ସାକ୍ଷାତକାରରେ ହ୍ୟାରି ବ୍ରୁକ୍ କହିଛନ୍ତି, 'ମୁଁ ଏବେ ବି ଭାବୁଛି ଆମେ ଏହି ଟେଷ୍ଟ ମ୍ୟାଚ୍ ଜିତିପାରିବୁ। ସମସ୍ତେ ଜାଣନ୍ତି ଯେ ଟାର୍ଗେଟ ଯେତେ ବଡ଼ ହେଉ ନା କାହିଁ, ଆମେ ଏହାକୁ ପିଛା କରିବୁ। ଆମେ ପୂର୍ବରୁ ଏହା କରିଛୁ ଏବଂ ପୁଣି ଚେଷ୍ଟା କରିବୁ। ସ୍ମଜ୍ (ଜେମି ସ୍ମିଥ୍)ଙ୍କ ସହିତ କ୍ରିଜ୍ରେ ସମୟ ବିତାଇବା ଭଲ ଲାଗିଲା। ଆଶା କରୁଛି ଆମେ ମ୍ୟାଚ୍କୁ ଫେରିବୁ।'
ଭାରତୀୟ ବୋଲରମାନଙ୍କୁ ପ୍ରଶଂସା କରି ହ୍ୟାରି ବ୍ରୁକ୍ କହିଛନ୍ତି ଯେ ତାଙ୍କ ଆଉଟ୍ ହେବା ପରେ ହିଁ ମ୍ୟାଚ୍ର ଦିଗ ବଦଳିଗଲା। ବ୍ରୁକ୍ କୁହନ୍ତି, 'ଯଦି ମୁଁ ଆଉଟ୍ ନ ହୋଇଥାନ୍ତି, ତେବେ ଆମେ ଏହି ସ୍ଥିତିରେ ନଥାନ୍ତୁ। ଆକାଶ ଦୀପ ଏବଂ ମହମ୍ମଦ ସିରାଜ ଭଲ ବୋଲିଂ କରିଥିଲେ। ସେମାନେ ୱିକେଟ୍ ନେବା ପାଇଁ ସମସ୍ତ ପଦ୍ଧତି ଗ୍ରହଣ କରୁଛନ୍ତି।"
