ନୂଆଦିଲ୍ଲୀ, ୧୨/୨ : ନାମିବିୟା ବିପକ୍ଷ ମ୍ୟାଚରେ ଭାରତର ବଡ଼ ବିଜୟ । ୯୩ ରନରେ ହରାଇଲା ଟିମ ଇଣ୍ଡିଆ । ଟି-୨୦ ବିଶ୍ବକପ ୨୦୨୬ରେ ଭାରତର ଦ୍ବିତୀୟ ବିଜୟ । ଆଗାମୀ ମ୍ୟାଚରେ ପାକିସ୍ତାନକୁ ଭେଟିବ ଭାରତ । ବିଜୟ ଅଭିଯାନ ଜାରି ରଖିଥିବାବେଳେ ଭାରତ ପୁଣି ଜିତିବ ବୋଲି ଆଶା ରଖିଛନ୍ତି ଫ୍ୟାନ୍ସ । ହାର୍ଦ୍ଧିକ ପାଣ୍ଡ୍ୟା ୨୮ ବଲରୁ ୫୨ ରନ କରିବା ସହ ୨ ଓ୍ବିକେଟ୍ ଅକ୍ତିଆର କରିଥିବାବେଳେ ମ୍ୟାନ ଅଫ୍ ଦ ମ୍ୟାଚ୍ ବିବେଚିତ ହୋଇଛନ୍ତି ।

ଆଜିର ମ୍ୟାଚରେ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା ନାମିବିୟା । ପ୍ରଥମେ ବ୍ୟାଟିଂ କରିଥିବା ଭାରତ ନିର୍ଦ୍ଧାରିତ ଓଭର ମଧ୍ୟରେ ୯ ଓ୍ବିକେଟ ବିନିମୟରେ ୨୦୯ ରନ୍ କରିଥିଲା । ଭାରତ ପକ୍ଷରୁ ପ୍ରଥମରୁ ସଞ୍ଜୁ ସାମସନ ଏବଂ ଇଶାନ କିଷନ ଘାତକ ବ୍ୟାଟିଂ କରିଥିଲେ । ସଞ୍ଜୁ ୮ ବଲରେ ୨୨ ରନ୍ କରିଥିଲେ । ପରେ ଇଶାନ କିଷନ ୨୪ ବଲରୁ ୬୧ ଏବଂ ପାଣ୍ଡ୍ୟା ୨୮ ବଲରୁ ୫୨ ରନ କରିଥିଲେ ।

ଭାରତ ପକ୍ଷରୁ ଏହି ଦୁଇ ଖେଳାଳି ଅର୍ଦ୍ଧଶତକୀୟ ପାଳି ଖେଳିଛନ୍ତି । ବାକି ଖେଳାଳିଙ୍କ ମଧ୍ୟରେ ସୂର୍ଯ୍ୟକୁମାର ଯାଦବ ୧୨ ଏବଂ ଶିଭମ ଦୁବେ ୨୩ ରନ୍ କରିଥିଲେ । ୧୯ ତମ ଓଭରରେ ଭାରତ ୩ ଓ୍ବିକେଟ୍ ହରାଇଥିଲା । ଗୋଟିଏ ଓଭରରେ ପାଣ୍ଡ୍ୟା, ଅକ୍ଷର ପଟେଲ ଏବଂ ଶିଭମ ଦୁବେ ଆଉଟ୍ ହୋଇ ପାଭିଲିୟନ ଫେରିଥିଲେ ।

​​​​​​​

୨୧୦କୁ ପିଛା କରିବାକୁ ଯାଇ ନାମିବିୟା ଭଲ ଆରମ୍ଭ କରିଥିଲା । ମାତ୍ର ପରବର୍ତ୍ତୀ ସମୟରେ ଏହାକୁ ସମ୍ଭାଳିପାରିନଥିଲା । ଭାରତ ପକ୍ଷରୁ ବରୁଣ ଚକ୍ରବର୍ତ୍ତୀ ୩ ଓ୍ବିକେଟ୍ ଅକ୍ତିଆର କରିଥିବାବେଳେ ପାଣ୍ଡ୍ୟା ଏବଂ ଅକ୍ଷର ୨ଟି ଲେଖାଏ ଓ୍ବିକେଟ୍ ଅକ୍ତିଆର କରିଥିଲେ । ଏହାସହ ଅର୍ଶଦୀପ, ବୁମରା ଏବଂ ଶିଭମ ଦୁବେ ଗୋଟିଏ ଲେଖାଏଁ ଓ୍ବିକେଟରେ ସନ୍ତୁଷ୍ଟ ହୋଇଛନ୍ତି ।

ଏହାସହ ପଢ଼ନ୍ତୁ : ଏମିତି କହିଲେ କାହିଁକି , ଭାଲେଣ୍ଟାଇନ୍ ଡେ’ରେ ହେବ କି ବିବାହ ?