ଡର୍ବାନ,୦୯/୧୧: ଘରୋଇ କ୍ରିକେଟ୍ରେ ବହୁ ସଫଳତା ସତ୍ତେ୍ୱ ଭାରତୀୟ ଦଳରେ ସ୍ଥାନ ହାସଲ କରିପାରୁନଥିବା ସଞ୍ଜୁ ସାମସନ ଡର୍ବାନ୍ରେ ଦମ ଦେଖାଇଛନ୍ତି । ପ୍ରଥମ ଭାରତୀୟ ଭାବେ ଟି-ଟ୍ୱେଣ୍ଟି ଅନ୍ତର୍ଜାତୀୟରେ କ୍ରମାଗତ ଦ୍ୱିତୀୟ ଶତକ ଅର୍ଜନ କରି ସାମସନ ସ୍ୱତନ୍ତ୍ର ରେକର୍ଡ ସ୍ଥାପନ କରିଛନ୍ତି । ଗତ ମାସ ୧୦ ତାରିଖରେ ସେ ବାଂଲାଦେଶ ବିପକ୍ଷ ତୃତୀୟ ଟି-ଟ୍ୱେଣ୍ଟିରେ ୧୧୧ ରନ୍ର ଇନିଂସ ଖେଳିଥିଲେ । ଶୁକ୍ରବାର ଅନୁଷ୍ଠିତ ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟି-ଟ୍ୱେଣ୍ଟିରେ ଆଉ ଏକ ବିସ୍ଫୋରକ ଶତକ ଅର୍ଜନ କରିବା ଫଳରେ ଭାରତ ୬୧ ରନ୍ରେ ବିଜୟ ହାସଲ କରିଥିଲା । ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଭାରତ ୮ ୱିକେଟ୍ ବିନିମୟରେ ୨୦୨ ରନ୍ ସଂଗ୍ରହ କରିଥିଲା । ଜବାବରେ ଦକ୍ଷିଣ ଆଫ୍ରିକା ୧୭.୫ ଓଭରରେ ୧୪୧ ରନ୍ କରି ଅଲ୍ ଆଉଟ୍ ହୋଇଯାଇଥିଲା । ସାମସନ ପ୍ଲେୟାର ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ ।
ଦକ୍ଷିଣ ଆଫ୍ରିକା ଏହି ମ୍ୟାଚ୍ରେ ଟସ ଜିତି ଭାରତକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା । ଦୁଇ ନୂଆ ଓପନିଂ ଯୋଡି ଅଭିଷେକ ଶର୍ମା ଓ ସଞ୍ଜୁ ସାମସନ ଦ୍ରୁତ ରନ୍ ସଂଗ୍ରହ କରିବାକୁ ପ୍ରୟାସ କରିଥିଲେ । ଅଭିଷେକ ମାତ୍ର ୭ ରନ୍ କରି ଆଉଟ୍ ହୋଇଥିଲେ ହେଁ ଦଳ ପ୍ରଭାବିତ ହୋଇନଥିଲା । ଅନ୍ୟ ଓପନର ସାମସନ ବିଧ୍ୱଂସୀ ବ୍ୟାଟିଂ କରି ଘରୋଇ ଦଳର ହୋସ୍ ଉଡ଼ାଇ ଦେଇଥିଲେ । ତାଙ୍କୁ ଅଟକାଇବା ସମ୍ଭବ ହୋଇ ନଥିଲା । ସୂର୍ଯ୍ୟକୁମାର ଯାଦବଙ୍କୁ ସାଥୀ କରି ସେ ଦଳୀୟ ସ୍କୋରକୁ ଦ୍ରୁତ ବେଗରେ ଆଗେଇ ନେଇଥିଲେ । ବିସ୍ଫୋରକ ସଟ୍ର ବର୍ଷା ହୋଇଥିଲା ।
ଉଭୟ ମାତ୍ର ୩୫ଟି ବଲ୍ରୁ ୬୬ ରନ୍ର ଭାଗିଦାରୀ ଗଢିଥିଲେ । କ୍ଷଣକ ମଧ୍ୟରେ ଦଳୀୟ ସ୍କୋର ୯୦ରେ ପହଞ୍ଚି ଯାଇଥିଲା । ନବମ ଓଭରରେ ସୂର୍ଯ୍ୟକୁମାର ବ୍ୟକ୍ତିଗତ ୨୧ ରନ କରି ଆଉଟ୍ ହୋଇଥିଲେ ହେଁ ସାମସନଙ୍କ ବିସ୍ଫୋରଣ ଜାରି ରହିଥିଲା । ଦକ୍ଷିଣ ଆଫ୍ରିକା ୭ଜଣ ବୋଲରଙ୍କୁ ନିୟୋଜିତ କରିଥିଲେ ହେଁ କିଛି ଫଳ ମିଳି ନଥିଲା ।
ସୂର୍ଯ୍ୟକୁମାରଙ୍କ ୱିକେଟ୍ ପରେ ବ୍ୟାଟିଂ ପାଇଁ ଓହ୍ଲାଇଥିବା ତିଳକ ବର୍ମା ମଧ୍ୟ ଦର୍ଶନୀୟ ସଟ୍ ଖେଳିଥିଲେ । ଉଭୟ ତୃତୀୟ ୱିକେଟ୍ରେ ୭୭ ରନ୍ ଯୋଗ କରିଥିଲେ । ସାମସନ ଚତୁର୍ଥ ବ୍ୟାଟର ଭାବେ କ୍ରମାଗତ ଦ୍ୱିତୀୟ ଟି-ଟ୍ୱେଣ୍ଟି ଶତକ ଅର୍ଜନ କରିଥିଲେ । ସାମସନଙ୍କ ପୂର୍ବରୁ ୨୦୨୨ରେ କେବଳ ଗୁସ୍ତାଭ ମ୍ୟାକ୍କିୟନ ଓ ରାଇଲି ରସୋ, ୨୦୨୩ରେ ଫିଲ ସଲ୍ଟ କ୍ରମାନ୍ୱୟରେ ୨ଟି ଲେଖାଏଁ ଟି-ଟ୍ୱେଣ୍ଟି ଶତକ ଅର୍ଜନ କରିଥିଲେ ।
ଦଳୀୟ ସ୍କୋର ୧୬୭ ବେଳେ ତିଳକ ୧୮ଟି ବଲ୍ରୁ ୩୩(୨ଚୌକା, ୨ଛକା) ରନ୍ କରି ଆଉଟ୍ ହୋଇଥିଲେ । ପରେ ପରେ ସାମସନଙ୍କ ୱିକେଟ୍ର ପତନ ଘଟିଥିଲା । ସେ ୫୦ଟି ବଲ୍ର ସାମ୍ନା କରି ୭ଚୌକା ଓ ୧୦ଛକା ବଳରେ ୧୦୭ ରନ୍ କରିଥିଲେ । ନିମ୍ନ ଭାଗ ବ୍ୟାଟରମାନେ ଦ୍ରୁତ ରନ୍ ସଂଗ୍ରହ କରିବାକୁ ଯାଇ ବିଫଳ ହୋଇଥିଲେ । ଶେଷରେ ଭାରତ ୮ ୱିକେଟ ହରାଇ ୨୦୨ ରନ କରିଥିଲା । ଦକ୍ଷିଣ ଆଫ୍ରିକା ପକ୍ଷରୁ ଗେରାଲ୍ଡ କୋଏଜି ସର୍ବାଧିକ ୩ଟି ୱିକେଟ୍ ନେଇଥିଲେ ।
୧୨୦ ବଲ୍ରେ ୨୦୩ ରନ୍ର ଲକ୍ଷ୍ୟ ହାସଲ କରିବା କଷ୍ଟକର ଥିଲା । ଭାରତୀୟ ଦଳର ଶୃଙ୍ଖଳିତ ବୋଲିଂର ମୁକାବିଲା କରିପାରି ନଥିଲା ଦକ୍ଷିଣ ଆଫ୍ରିକା । ଓପନର ଆଡେନ ମାରକ୍ରମ ୮ ରନ୍ କରି ପ୍ରଥମେ ଆଉଟ୍ ହୋଇଥିଲେ । ଅନ୍ୟ ଓପନର ର୍ୟାନ ରିକେଲଟନଙ୍କ ସହ ଟ୍ରିଷ୍ଟନ ଷ୍ଟବ୍ସ ମିଶି ଦଳୀୟ ସ୍କୋରକୁ ୩୦ରେ ପହଞ୍ଚାଇଥିଲେ । ଷ୍ଟବ୍ସ ୧୧ ରନ୍ କରି ଆଉଟ୍ ହୋଇଥିଲେ ।
ସ୍ପିନର ବୋଲିଂ ଭାର ସମ୍ଭାଳିବା ପରେ ଦକ୍ଷିଣ ଆଫ୍ରିକାର ବ୍ୟାଟିଂ ବିଭାଗ ଟଳମଳ ହୋଇଥିଲା । ୧୧ଟି ବଲ୍ରୁ ୨୧ ରନ୍ କରିଥିବା ରିକେଲଟନଙ୍କୁ ଷଷ୍ଠ ଓଭରରେ ଆଉଟ୍ କରିଥିଲେ ବରୁଣ ଚକ୍ରବର୍ତ୍ତୀ । ଘରୋଇ ଦଳର ଦୁଇ ଅଭିଜ୍ଞ ବ୍ୟାଟର ଡେଭିଡ୍ ମିଲର ଓ ହେନରିକ କ୍ଲାସେନ କିଛି ଦର୍ଶନୀୟ ସଟ୍ ଖେଳି ୪୨ ରନ୍ର ଭାଗିଦାରୀ ଗଠନ କରିଥିଲେ । ୧୨ତମ ଓଭରରେ ବରୁଣ ଉଭୟଙ୍କୁ ଆଉଟ୍ କରି ବିଜୟ ପାଇଁ ପଥ ପରିଷ୍କାର କରିଥିଲେ । କ୍ଲାସେନ ୨୫(୨ଚୌକା, ୧ଛକା) ଓ ମିଲର ୧୮(୧ଚୌକା, ୧ଛକା) ରନ୍ କରି ପାଭିଲିୟନ ଫେରିବା ପରେ ଦକ୍ଷିଣ ଆଫ୍ରିକା ବିପର୍ଯ୍ୟୟର ସମ୍ମୁଖୀନ ହୋଇଥିଲା ।
ରବି ବିଷ୍ଣୋଇ ଏହାପରେ ପ୍ୟାଟ୍ରିକ କ୍ରୁଗର, ଆଣ୍ଡିଲ ସିମେଲିନ ଓ ମାର୍କୋ ଜାନସେନଙ୍କୁ ପାଭିଲିୟନ ପଠାଇଥିଲେ । ୧୧୪ ରନ୍ରେ ଦଳ ୮ଟି ୱିକେଟ୍ ହରାଇଥିଲା । ଅନ୍ତିମ ଭାଗରେ ଗେରାଲ୍ଡ କୋଏଜି ୩ଟି ବିଶାଳ ଛକା ମାରିଥିଲେ ହେଁ ଏହା ବିଜୟ ପାଇଁ ଯଥେଷ୍ଟ ନଥିଲା । ଶେଷରେ ଦକ୍ଷିଣ ଆଫ୍ରିକା ୧୩ଟି ବଲ୍ ବାକି ଥାଇ ୧୪୧ ରନ୍ କରି ଅଲ୍ ଆଉଟ୍ ହୋଇ ଯାଇଥିଲା ।
