ଆଡିଲେଡ,୦୩/୧୨: ଦ୍ୱିତୀୟ ଟେଷ୍ଟରେ ଭାରତୀୟ ଦଳ ଚୂଡ଼ାନ୍ତ ଏକାଦଶ ପରିବର୍ତ୍ତନ କରିବା ନିଶ୍ଚିତ । କେବଳ ସେତିକି ନୁହେଁ, ବ୍ୟାଟିଂ କ୍ରମରେ ମଧ୍ୟ ପରିବର୍ତ୍ତନ ହେବାର ଯଥେଷ୍ଟ ସମ୍ଭାବନା ରହିଛି । ପ୍ରଥମ ଟେଷ୍ଟ ଖେଳି ନଥିବା ଅଧିନାୟକ ରୋହିତ ଶର୍ମା ଏକାଦଶକୁ ଫେରୁଥିବାବେଳେ ପ୍ରଥମ ଟେଷ୍ଟ ପୂର୍ବରୁ ଆହତ ହୋଇଥିବା ଶୁଭମନ ଗିଲ୍ ମଧ୍ୟ ଫିଟ୍ ହୋଇ ସାରିଛନ୍ତି । ଉଭୟ ଦ୍ୱିତୀୟ ଟେଷ୍ଟ ଖେଳିବେ । ଯାହା ଫଳରେ ଦେବଦତ୍ତ ପାଡ଼ିକଲ ଓ ଧ୍ରୁବ ଜୁରେଲ ଏକାଦଶରୁ ବାଦ ପଡ଼ିବେ । ଗିଲ୍ଙ୍କ ଅନୁପସ୍ଥିତିରେ ପାଡ଼ିକଲଙ୍କୁ ଖେଳିବାକୁ ସୁଯୋଗ ମିଳିଥିଲା ଓ ସେ ନିରାଶ କରିଥିଲେ । ଗିଲ ଗତ ଅଭ୍ୟାସ ମ୍ୟାଚ୍ ଜରିଆରେ ପ୍ରତ୍ୟାବର୍ତ୍ତନ କରି ଅର୍ଦ୍ଧଶତକ ଅର୍ଜନ କରିଛନ୍ତି ।
ରୋହିତ ମଧ୍ୟ କ୍ରମରେ ବ୍ୟାଟିଂ କରିବା ଆଶା କରାଯାଉଛି । ଅଭ୍ୟାସ ମ୍ୟାଚ ଜରିଆରେ ଏହାର ପୂର୍ବାଭାସ ମିଳିଯାଇଛି । ଅଭ୍ୟାସ ମ୍ୟାଚ୍ରେ ସେ ୪ନଂ ସ୍ଥାନରେ ବ୍ୟାଟିଂ କରିଥିଲେ । ଅବଶ୍ୟ ବିରାଟ କୋହଲି ଏହି ମ୍ୟାଚରୁ ବିଶ୍ରାମ ନେଇଥିଲେ ।
ଆଡିଲେଡ୍ରେ କୋହଲି ନିଜ ସ୍ଥାନକୁ ପ୍ରତ୍ୟାବର୍ତ୍ତନ କରିବେ । ଗିଲ୍ ମଧ୍ୟ ପୂର୍ବ ଭଳି ୩ନଂ ସ୍ଥାନରେ ଖେଳିବେ । ଫଳରେ ରୋହିତ ମଧ୍ୟକ୍ରମରେ ଅଥବା ୬ନଂ ସ୍ଥାନରେ ବ୍ୟାଟିଂ କରିବା ଆଶା କରାଯାଉଛି ।
ପ୍ରଥମ ଟେଷ୍ଟରେ ଓପନ୍ କରି ରାହୁଲ ପୂର୍ବ ଫର୍ମ ଫେରି ପାଇଛନ୍ତି । ଉଭୟ ଇନିଂସରେ ସେ ଧୈର୍ଯ୍ୟପୂର୍ଣ୍ଣ ବ୍ୟାଟିଂ କରିଥିଲେ । ଦ୍ୱିତୀୟ ଇନିଂସରେ ଯଶସ୍ୱୀ ଜୈସ୍ୱାଲ ଓ ରାହୁଲ ୨୦୧ ରନ୍ର ଓପନିଂ ଭାଗିଦାରୀ ଗଠନ କରିଥିଲେ । ଯାହା ଭାରତର ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିଲା । ଏହି ପ୍ରଦର୍ଶନ ବଳରେ ରାହୁଲ ଓପନିଂ ପାଇଁ ପ୍ରମୁଖ ଦାବିଦାର ହୋଇଛନ୍ତି । ରୋହିତ ମଧ୍ୟ ଦଳର ସ୍ୱାର୍ଥ ପାଇଁ ନିଜ ବ୍ୟାଟିଂ ସ୍ଥାନକୁ ଉତ୍ସର୍ଗ କରିବାକୁ ପ୍ରସ୍ତୁତ ଅଛନ୍ତି ।
ରାହୁଲ ଓପନ କଲେ ରୋହିତଙ୍କ ପାଇଁ କେବଳ ୬ନଂ ସ୍ଥାନ ଖାଲି ରହିବ । କାରଣ କୋହଲି ୪ ଓ ପନ୍ତ ୫ନଂ ସ୍ଥାନରେ ବ୍ୟାଟିଂ କରିବେ । ଗୌତମ ଗମ୍ଭୀର ଦଳରେ ଯୋଗ ଦେବା ପରେ ଏକାଦଶ ଉପରେ ଚୂଡ଼ାନ୍ତ ନିଷ୍ପତ୍ତି ନିଆଯିବ ।
