ନୂଆଦିଲ୍ଲୀ,୧୮/୦୭: ଆସନ୍ତା ୨୧ ତାରିଖରୁ ଆରମ୍ଭ ହେବାକୁ ଯାଉଥିବା ସଂସଦର ମୌସୁମୀ ଅଧିବେଶନ ସମୟରେ ‘ଇଣ୍ଡିଆ’ର ସହଯୋଗୀଙ୍କ ମଧ୍ୟରେ ଏକତା ବଢ଼ାଇବାକୁ କଂଗ୍ରେସ ବିରୋଧୀ ନେତାମାନଙ୍କର ଏକ ସ୍ୱତନ୍ତ୍ର ବୈଠକ ଡାକିଛି । ଶନିବାର ଅର୍ଥାତ୍ ଜୁଲାଇ ୧୯ ତାରିଖ ସନ୍ଧ୍ୟା ୭ଟାରେ ଅନ୍ଲାଇନ ମାଧ୍ୟମରେ ସେହି ବୈଠକ ଅନୁଷ୍ଠିତ ହେବ । ଶୁକ୍ରବାର ନିଜ ସୋସିଆଲ ମିଡିଆ ଏକ୍ସରେ ଏହି ସୂଚନା ଦେଇଛନ୍ତି କଂଗ୍ରେସ ନେତା କେସି ବେଣୁଗୋପାଳ ।
ସେଥିରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, ସୋନିଆ ଗାନ୍ଧୀ ସାମିଲ ହେବେ । ସଂସଦର ମୌସୁମୀ ଅଧିବେଶନ ସମୟରେ କିଭଳି ବିଭିନ୍ନ ପ୍ରସଙ୍ଗରେ ସରକାରଙ୍କୁ ଘେରାଯିବ ସେଥିନେଇ ବୈଠକରେ ରଣନୀତି ପ୍ରସ୍ତୁତ ହେବ । ବିହାରରେ ଭୋଟର ତାଲିକାର ରିଭିଜନ୍କୁ ନେଇ ରାଜନୀତି ସରଗରମ ଥିବା ସମୟରେ ଏହି ବୈଠକକୁ ମହତ୍ତ୍ୱପୂର୍ଣ୍ଣ ଭାବେ ଦେଖାଯାଉଛି ।
ସୂଚନା ଅନୁସାରେ, ଲୋକସଭାରେ ବିରୋଧୀ ଦଳର ନେତା ତଥା କଂଗ୍ରେସ ସାଂସଦ ରାହୁଲ ଗାନ୍ଧୀ ତାମିଲନାଡୁର ମୁଖ୍ୟମନ୍ତ୍ରୀ ଏମ୍କେ ଷ୍ଟାଲିନ୍ଙ୍କ ସମେତ ଅନେକ ନେତାଙ୍କ ସହ ଏ ସଂପର୍କରେ କଥା ହୋଇଛନ୍ତି । ତେବେ ବୈଠକରେ ଟିଏମ୍ସି ଓ ଆପ୍ ସାମିଲ ହେବେ ନାହିଁ। ଟିଏମ୍ସି ଜୁଲାଇ ୨୧ରେ ସହିଦ ଦିବସ ପାଳନ କରୁଛି । ତା’ର ପ୍ରସ୍ତୁତି ଲାଗି ଦଳୀୟ ନେତା ବ୍ୟସ୍ତ ରହିବେ । ସେହିପରି ଆପ୍ ଗୁଜରାଟ ଓ ଅନ୍ୟ ରାଜ୍ୟରେ ନିଜର ପ୍ରଭାବ ବିସ୍ତାର ଅଭିଯାନରେ ଲାଗିଛି ।
