ନୂଆଦିଲ୍ଲୀ,୩୧/୧୦: ବହୁଦିନ ପରେ ଶାନ୍ତ ପଡ଼ିଛି ଭାରତ-ଚୀନ୍ ସୀମା । ଡେପସାଙ୍ଗ ଓ ଡେମଚୋକରେ ଉଭୟ ଦେଶର ସୈନ୍ୟ ପଛକୁ ହଟିବା ପ୍ରକ୍ରିୟା ଶେଷ ହେବା ପରେ ସେଠାରେ ଶାନ୍ତି ବିରାଜମାନ କରିଛି । ଏମିତି କି ଖୁସିର ଝଲକ ବି ଦେଖିବାକୁ ମିଳିଲାଣି ।
ଗୁରୁବାର ଆଲୋକର ପର୍ବ ଦୀପାବଳି ପାଳନ ପରିପ୍ରେକ୍ଷୀରେ ଉଭୟ ଦେଶର ସୈନ୍ୟ ପରସ୍ପରକୁ ମିଠା ଖୁଆଇବେ । ପରସ୍ପରକୁ ଶୁଭେଚ୍ଛା ଜଣାଇବେ । ସେନା ଅପସାରଣ ପ୍ରକ୍ରିୟା ଶେଷ ହେବା ପରେ ପାଟ୍ରୋଲିଂ ଆରମ୍ଭ ପାଇଁ ପଥ ପରିଷ୍କାର ହୋଇଛି । ପାଟ୍ରୋଲିଂକୁ ନେଇ ଗ୍ରାଉଣ୍ଡ କମାଣ୍ଡରଙ୍କ ମଧ୍ୟରେ ଔପଚାରିକ ଭାବେ ଆଲୋଚନା ହେବ । ଗ୍ରାଉଣ୍ଡ କମାଣ୍ଡର ଭାବେ ବ୍ରିଗେଡିୟର ବା ତା’ଠାରୁ କମ୍ ର୍ୟାଙ୍କ୍ର ଅଧିକାରୀ ଦାୟିତ୍ୱ ନିର୍ବାହ କରିଥାନ୍ତି । ସେମାନଙ୍କ ମଧ୍ୟରେ ଆଲୋଚନା ହେବା ପରେ ଖୁବଶୀଘ୍ର ପାଟ୍ରୋଲିଂ ଆରମ୍ଭ ହେବ । ପ୍ରକୃତ ନିୟନ୍ତ୍ରଣରେଖା (ଏଲ୍ଏସି) ରେ ପାଟ୍ରୋଲିଂକୁ ନେଇ ହୋଇଥିବା ବୁଝାମଣା ସଂକ୍ରାନ୍ତରେ ବିଦେଶ ମନ୍ତ୍ରୀ ଏସ୍ ଜୟଶଙ୍କର ଗତ ୨୭ ତାରିଖରେ କହିଥିଲେ କି ପ୍ରଥମ ପର୍ଯ୍ୟାୟରେ ସେନା ଅପସାରଣକୁ ଗୁରୁତ୍ୱ ଦିଆଯିବ । ଏହାପରେ ବିବାଦ କମାଇବା ଲାଗି ଉଦ୍ୟମ ହେବ। ଚୀନ୍ ମଧ୍ୟ ଶାନ୍ତି ଚାହୁଁଥିବା ନେଇ ଭାରତର ଯେତେବେଳେ ବିଶ୍ୱାସ ହେବ, ସେତେବେଳେ ଯାଇ ବିବାଦ ଥମିବ । ବିବାଦ ଶେଷ ହେବା ପରେ ସୀମାକୁ କିଭଳି ପରିଚାଳନା କରାଯିବ, ତାହା ଉପରେ ଆଲୋଚନା ହେବ ।
ଉଲ୍ଲେଖଯୋଗ୍ୟ, ପୂର୍ବ ଲଦାଖରେ ଭାରତ ଓ ଚୀନ୍ ମଧ୍ୟରେ ୪ ବର୍ଷ ହେଲା ସୀମା ବିବାଦ ଲାଗିରହିଥିଲା । ଦୁଇବର୍ଷର ଲମ୍ବା ଆଲୋଚନା ପରେ ନିକଟରେ ଆପୋସ ବୁଝାମଣା ହୋଇଛି । ଏହାଦ୍ୱାରା ଉଭୟ ସେନା ବିବାଦୀୟ ପଏଣ୍ଟ ଡେପସାଙ୍ଗ ଓ ଡେମଚୋକରୁ ପଛକୁ ହଟିଯାଇଛନ୍ତି । ୨୦୨୦ ପୂର୍ବର ସ୍ଥିତି ଫେରିଆସିବା ନେଇ ଆଶା ଦେଖାଦେଇଛି । ଆଗକୁ କମାଣ୍ଡର ସ୍ତରୀୟ ବୈଠକ ଜାରି ରହିବ । ସୀମାରେ ଯାହା ବି ପରିସ୍ଥିତି ଉପୁଜିବ, ତାହାର ସମାଧାନ ଦିଗରେ ସକାରାତ୍ମକ ପଦକ୍ଷେପ ନିଆଯିବ । ଦୁଇଦେଶ ମଧ୍ୟରେ ସହମତି ହେବା ପରେ ଅକ୍ଟୋବର ୨୫ରେ ପୂର୍ବ ଲଦାଖସ୍ଥିତ ସୀମାଞ୍ଚଳରୁ ସେନା ଅପସାରଣ ପ୍ରକ୍ରିୟା ଆରମ୍ଭ ହୋଇଥିଲା । ବୁଧବାର ଏହା ଶେଷ ହୋଇଛି । ଏମିତି କି ଡେମଚୋକ ଓ ଡେପସାଙ୍ଗରେ ଉଭୟ ସେନା ଲଗାଇଥିବା ତମ୍ବୁଗୁଡ଼ିକୁ ବି ହଟାଇ ନେଇଛନ୍ତି । ଗାଡ଼ି ଓ ସେନା ଉପକରଣ ବି ପଛକୁ ସ୍ଥାନାନ୍ତର କରାଯାଇଛି । ପାଟ୍ରୋଲିଂ ନିମନ୍ତେ ସୀମିତ ସୈନ୍ୟଙ୍କ ସଂଖ୍ୟା ସ୍ଥିର ହୋଇଯାଇଛି । ଏହି ସଂଖ୍ୟା କେତେ ହେବ, ତାହା ନେଇ କିଛି ଜଣାପଡ଼ି ନାହିଁ ।
