ନୂଆଦିଲ୍ଲୀ,୨୩/୦୨: କେନ୍ଦ୍ର ସରକାର ସିଗାରେଟ୍ ଏବଂ ତମାଖୁ ଭଳି ଅବଗୁଣକାରୀ ସାମଗ୍ରୀ ଉପରେ ସାମଗ୍ରୀ ଓ ସେବା ଟିକସ (ଜିଏସ୍ଟି) ବଢ଼ାଇବା ନେଇ ବିଚାର କରୁଛନ୍ତି । ଏବେ ଏହି ସାମଗ୍ରୀ ଗୁଡ଼ିକ ଉପରେ ୨୮% ଜିଏସ୍ଟି ଲାଗୁଛି । ଏହାକୁ ୪୦%କୁ ବଢ଼ାଯାଇପାରେ । ତେବେ କ୍ଷତିପୂରଣ ସେସ୍ ଏବଂ ଅନ୍ୟ ଟିକସ ମିଶାଇଲେ ଏହି ସାମଗ୍ରୀ ଗୁଡିକ ଉପରେ ଟିକସ ୫୩% ଯାଏ ବୃଦ୍ଧି ହେବାର ଢ଼େର ସମ୍ଭାବନା ରହିଛି । ଆଗକୁ କ୍ଷତିପୂରଣ ସେସ୍ ହଟିଲେ ମଧ୍ୟ ତମାଖୁ ଜାତୀୟ ସାମଗ୍ରୀରୁ ମିଳୁଥିବା ଟିକସ ଅଂଶ ଯେଭଳି ନ ହ୍ରାସ ହୁଏ ତାକୁ ଧ୍ୟାନରେ ରଖି ସରକାରଏଭଳି ନିଷ୍ପତ୍ତି ନେଇ ପାରନ୍ତି ବୋଲି କୁହାଯାଉଛି ।
୨୦୨୬ ମାର୍ଚ୍ଚ ୩୧ରେ ଶେଷ ହେବାକୁ ଯାଉଛି କ୍ଷତିପୂରଣ ସେସ୍ । ଏହି ସେସ୍ ବଦଳରେ ଅନ୍ୟ କୌଣସି ଟିକସ ଆଣିବାକୁ ଚାହୁଁନାହାନ୍ତି ସରକାର । ୨୦୨୬ ମାର୍ଚ୍ଚ ପରେ କ୍ଷତିପୂରଣ ସେସ୍ର ଭବିଷ୍ୟତ କଣ ହେବ ସେ ନେଇ ଏକ ମନ୍ତ୍ରୀସ୍ତରୀୟ ଗୋଷ୍ଠୀ ବିଚାର କରୁଛି । ରିପୋର୍ଟ ଦେବା ପୂର୍ବରୁ କମିଟି ଏହାର ବିକଳ୍ପ କଣ ହେବ ସେ ନେଇ ମଧ୍ୟ ବିଚାର କରିବ । ଏ ନେଇ ଚୂଡାନ୍ତ ନିଷ୍ପତ୍ତି ଜିଏସ୍ଟି ପରିଷଦ ଗ୍ରହଣ କରିବ ବୋଲି ପ୍ରକ୍ରିୟା ସହ ଜଡ଼ିତ ଜଣେ ଅଧିକାରୀ କହିଛନ୍ତି।
