ନୂଆଦିଲ୍ଲୀ: ଭାରତକୁ ଆଉ କେହି ଶତ୍ରୁ ଦେଶ ଦେଖାଇ ପାରିବେ ନାହିଁ ନାଲିଆଖି । ପ୍ରତିରକ୍ଷା କ୍ଷେତ୍ରକୁ ନେଇ ଭାରତ ଓ ଜାପାନ ମଧ୍ୟରେ ଏକ ଚୁକ୍ତି ସ୍ବାକ୍ଷରିତ ହୋଇଛି । ୧୫ ନଭେମ୍ବର ୨୦୨୪ ରେ ଟୋକିଓ ସ୍ଥିତ ଭାରତୀୟ ଦୁତାବାସରେ ନୈସେନା ଜହାଜରେ ଲାଗୁଥିବା ୟୁନିକର୍ଣ୍ଣ ମାସ୍ଟକୁ ମିଳିତ ସହଯୋଗରେ ବନେଇବା ପାଇଁ ଉଭୟ ଦେଶ ମଧ୍ୟରେ ଏକ ସ୍ମାରକ ପତ୍ର ସ୍ବାକ୍ଷରିତ ହୋଇଛି ।
ଟୋକିଓରେ ଆୟୋଜିତ ଏକ ସମାରୋହରେ ଭାରତର ରାଷ୍ଟ୍ରଦୁତ ସିବି ଜର୍ଜ ଓ ଜାପାନର ରକ୍ଷା ମନ୍ତ୍ରଣାଳୟ ଅଧିନରେ ଥିବା ପ୍ରୟୁକ୍ତିବିଦ୍ୟା ଅଧିଗ୍ରହଣ ଓ ଲଜିଷ୍ଟିକ ଏଜେନ୍ସି (ଏଟିଏଲଏ)ର କମିଶନର ଇଶିକାଓ୍ବା ତାକେଶିଙ୍କ ମଧ୍ୟରେ ସ୍ମାରକ ପତ୍ରରେ ଦସ୍ତଖତ କରାଯାଇଥିଲା ।
ୟୁନିଫାଏଡ କମ୍ଲେକ୍ସ ରେଡିଓ ଆଣ୍ଟିନା(ୟୁନିକର୍ଣ୍ଣ) ଏକ ଏକିକୃତ ଯୋଗାଯୋଗ ପ୍ରଣାଳି ବିଶିଷ୍ଟ ମାସ୍ଟ ଯାହା ନୈସେନାର ଷ୍ଟିଲ୍ଥ ବିଶେଷତାକୁ ମଜବୁତ ବନେଇବାରେ ସାହାଯ୍ୟ କରିବ । ଭାରତୀୟ ନୈସେନା ଏହି ଉନ୍ନତ ପ୍ରଣାଳିକୁ ନିଜର କରିବାକୁ ଚେଷ୍ଟା କରୁଛି, ଯାହାକୁ ଭାରତରେ ଭାରତ ଇଲେକ୍ଟ୍ରୋନିକ୍ସ ଲିମିଟେଡ ତରଫରୁ ଜାପାନ ସହଯୋଗରେ ମିଳିତ ଭାବେ ତିଆରି କରାଯିବ। ଏହା କାର୍ଯ୍ୟକାରୀ ହେଲେ, ଏହା ଭାରତ ଓ ଜାପାନ ମଧ୍ୟରେ ପ୍ରତିରକ୍ଷା ଉପକରଣର ସହ-ବିକାଶ/ସହ-ଉତ୍ପାଦନର ପ୍ରଥମ ମାମଲା ହବାକୁ ଯାଉଛି ।
