ନୂଆଦିଲ୍ଲୀ,୨୬/୦୯: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଗୁରୁବାର ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ରେ ଏକ ପୋଷ୍ଟ କରି ଔଷଧ କ୍ଷେତ୍ର ଉପରେ ୧୦୦% ଶୁଳ୍କ ଲାଗୁ କରିଛନ୍ତି। ଟ୍ରମ୍ପ ବ୍ରାଣ୍ଡେଡ୍ ଏବଂ ପେଟେଣ୍ଟ ଔଷଧ ଆମଦାନୀ ଉପରେ ଏହି ଶୁଳ୍କ ଲାଗୁ କରିଛନ୍ତି, ଯାହା ଭାରତର ଔଷଧ କ୍ଷେତ୍ର ଏବଂ ଆମେରିକାକୁ ଏହାର ରପ୍ତାନିକୁ ପୁଣି ଥରେ ଚର୍ଚ୍ଚାରେ ରଖିଛି। ଔଷଧ କ୍ଷେତ୍ର ଉପରେ ଟ୍ରମ୍ପଙ୍କ ଦ୍ୱାରା ଲାଗୁ ହୋଇଥିବା ଶୁଳ୍କ ଅକ୍ଟୋବର ୧ ରୁ କାର୍ଯ୍ୟକାରୀ ହେବ। ଆସନ୍ତୁ ଜାଣିବା ଭାରତ ଆମେରିକାକୁ ରପ୍ତାନି କରୁଥିବା ଔଷଧ ଏବଂ ଟ୍ରମ୍ପଙ୍କ ଶୁଳ୍କ ଦ୍ୱାରା କେଉଁ ଔଷଧ ପ୍ରଭାବିତ ହେବ।
କେଉଁ ଔଷଧ ଆମେରିକାକୁ ଭାରତ କରୁଛି ରପ୍ତାନି:
ଭାରତ ବିଶ୍ୱର ସବୁଠାରୁ ବଡ଼ ଔଷଧ ରପ୍ତାନିକାରୀ ଦେଶମାନଙ୍କ ମଧ୍ୟରୁ ଗୋଟିଏ, ଯିଏକି ଆମେରିକାକୁ ଜେନେରିକ ଏବଂ ବ୍ରାଣ୍ଡେଡ୍ ଔଷଧ ରପ୍ତାନି କରେ। ଭାରତୀୟ ଔଷଧ କମ୍ପାନୀଗୁଡ଼ିକ ଆମେରିକା, ୟୁରୋପ ଏବଂ ଅନ୍ୟାନ୍ୟ ଦେଶଗୁଡ଼ିକୁ ମଧ୍ୟ ଟୀକା ରପ୍ତାନି କରନ୍ତି। ଟ୍ରମ୍ପଙ୍କ ଟାରିଫ କେବଳ ବ୍ରାଣ୍ଡେଡ୍ ଔଷଧ ଉପରେ ଲାଗୁ ହେବ। ତେଣୁ, ଜେନେରିକ ଔଷଧ ପୂର୍ବ ପରି ରପ୍ତାନି ହେବ।
କେଉଁ ସବୁ ଔଷଧ ହେଉଛି ଅଧିକ ରପ୍ତାନୀ:
ଭାରତୀୟ ଔଷଧ କମ୍ପାନୀଗୁଡ଼ିକ ଆମେରିକାକୁ ସର୍ବାଧିକ ଜେନେରିକ୍ ଔଷଧ ରପ୍ତାନି କରନ୍ତି। କ୍ୟୁରେଟନ୍ ଡଟ୍ ଇନ୍ ର ଏକ ରିପୋର୍ଟ ଅନୁଯାୟୀ, ଭାରତରୁ ସର୍ବାଧିକ ରପ୍ତାନି ହେଉଥିବା ଜେନେରିକ୍ ଔଷଧ ହେଉଛି ପାରାସିଟାମଲ୍। ରପ୍ତାନି ହେଉଥିବା ଅନ୍ୟ ଜେନେରିକ୍ ଔଷଧଗୁଡ଼ିକ ମଧ୍ୟରେ ଆଇବୁପ୍ରୋଫେନ, ମେଟଫାର୍ମିନ୍ (ଏକ ମଧୁମେହ ଔଷଧ), ଆଟୋରଭାଷ୍ଟେଟିନ୍ (ଏକ କୋଲେଷ୍ଟ୍ରଲ୍-କମକାରୀ ଔଷଧ), ଏବଂ ଓମେପ୍ରାଜୋଲ୍ (ଏସିଡ୍ ରିଫ୍ଲକ୍ସ ଏବଂ ଅଲସର ଚିକିତ୍ସା) ଆଦି ଔଷଧ ରପ୍ତାନୀ ହୁଏ।
ଜେନେରିକ୍ ଔଷଧ ବ୍ୟତୀତ, ଆମେରିକା ଭାରତରୁ ଅନେକ ଜୀବନ ରକ୍ଷାକାରୀ ବ୍ରାଣ୍ଡେଡ୍ ଔଷଧ ଆମଦାନୀ କରେ, ଯେଉଁଥିରେ ଆଣ୍ଟିବାୟୋଟିକ୍, ହୃଦରୋଗ ଔଷଧ, ମଧୁମେହ ଔଷଧ, ପେନ୍ କିଲର୍, କ୍ୟାନ୍ସର ଔଷଧ, ଆଣ୍ଟିଭାଇରାଲ୍ ଏଚ୍ଆଇଭି ଔଷଧ ଏବଂ ଟିକା ଅନ୍ତର୍ଭୁକ୍ତ। ଉଲ୍ଲେଖଯୋଗ୍ୟ ଯେ କୋଭିଡ୍ ମହାମାରୀ ସମୟରେ, ଭାରତ ସରକାର ଭାରତର ଅତ୍ୟାବଶ୍ୟକ ଔଷଧର ଷ୍ଟକ୍ ଆବଶ୍ୟକତାକୁ ଗୁୁରୁତ୍ବ ଦେଇ କିଛି ଔଷଧର ରପ୍ତାନି ଉପରେ ରୋକ୍ ଲଗାଇଥିଲେ।
କେଉଁ ଦେଶକୁ ସବୁଠାରୁ ଅଧିକ ଔଷଧ ରପ୍ତାନୀ କରେ ଭାରତ?
ଯଦି ଆମେ ଭାରତର ଔଷଧ କ୍ଷେତ୍ରର ବାର୍ଷିକ ରପ୍ତାନିକୁ ବିଚାର କରିବା, ତେବେ ଭାରତୀୟ ଔଷଧ କମ୍ପାନୀଗୁଡ଼ିକ ବାର୍ଷିକ ପ୍ରାୟ ୨୫ ବିଲିୟନ ଡଲାର ମୂଲ୍ୟର ଔଷଧ ରପ୍ତାନି କରନ୍ତି, ଯେଉଁଥିରେ ସର୍ବାଧିକ ରପ୍ତାନି ଆମେରିକାକୁ ହୁଏ। ଏହା ପରେ, ଭାରତୀୟ ଔଷଧ କମ୍ପାନୀଗୁଡ଼ିକ ବ୍ରିଟେନ, ଜର୍ମାନୀ, ରୁଷିଆ, ବ୍ରାଜିଲ ଏବଂ ଦକ୍ଷିଣ ଆଫ୍ରିକାକୁ ଔଷଧ ରପ୍ତାନି କରନ୍ତି। ଭାରତୀୟ ଔଷଧ କମ୍ପାନୀଗୁଡ଼ିକ ମଧ୍ୟରେ, ସନ୍ ଫାର୍ମା, ଡକ୍ଟର ରେଡ୍ଡିଜ୍ ଲାବୋରେଟୋରୀ, ସିପ୍ଲା, ଲୁପିନ୍, ଅରବିନ୍ଦ ଫାର୍ମା ଏବଂ ଜାଇଡସ୍ ଲାଇଫ୍ଲାଇନ୍ସ ବ୍ରାଣ୍ଡେଡ୍ ଔଷଧ ଗୁଡ଼ିକର ପ୍ରମୁଖ ନିର୍ମାତା ଅଟନ୍ତି।
