ନୂଆଦିଲ୍ଲୀ,୧୫/୦୫: ଭାରତରେ ତେଲର ଚାହିଦା ନିରନ୍ତର ବୃଦ୍ଧି ପାଉଛି। ପେଟ୍ରୋଲିୟମ ରପ୍ତାନିକାରୀ ଦେଶମାନଙ୍କର ସଂଗଠନ OPECର ଏକ ନୂତନ ରିପୋର୍ଟ ଅନୁଯାୟୀ, ୨୦୨୫ ଏବଂ ୨୦୨୬ ରେ ବିଶ୍ୱରେ ସର୍ବାଧିକ ତେଲ ଚାହିଦା ଭାରତରୁ ଆସିବାକୁ ଯାଉଛି। ଏହା ଚୀନ୍ ତୁଳନାରେ ଦୁଇଗୁଣରୁ ଅଧିକ। ଭାରତ ବିଶ୍ୱର ଦ୍ରୁତତମ ଅଭିବୃଦ୍ଧିଶୀଳ ଅର୍ଥନୀତି ମଧ୍ୟରୁ ଗୋଟିଏ। ଏଠାରେ ଶକ୍ତିର ଚାହିଦା ମଧ୍ୟ ଦିନକୁ ଦିନ ବୃଦ୍ଧି ପାଉଛି। ଫଳସ୍ୱରୂପ, ଭାରତରେ ତୈଳ ଚାହିଦା ୨୦୨୪ ରେ ପ୍ରତିଦିନ ୫.୫୫ ନିୟୁତ ବ୍ୟାରେଲ (ବିପିଡି) ରୁ ୨୦୨୫ ରେ ୫.୭୪ ନିୟୁତ ବ୍ୟାରେଲକୁ ବୃଦ୍ଧି ପାଇବ ବୋଲି ଆକଳନ କରାଯାଇଛି, ଯାହାକି ୩.୩୯ ପ୍ରତିଶତ ବୃଦ୍ଧିକୁ ଦର୍ଶାଉଛି।

ସବୁଠୁ ଅଧିକ ତେଲ ଆମଦାନୀ କରୁଛି ଆମେରିକା: 

ସମ୍ବାଦ ସରବରାହ ସଂସ୍ଥା ପିଟିଆଇର ଏକ ରିପୋର୍ଟ ଅନୁଯାୟୀ, ଏହି ଅଭିବୃଦ୍ଧି ୨୦୨୬ ରେ ଜାରି ରହିବ ଏବଂ ଏହା ୫.୯୯ ନିୟୁତ ବିପିଡିରେ ପହଞ୍ଚିବ, ଯାହାକି ଗୋଟିଏ ବର୍ଷ ମଧ୍ୟରେ ୪.୨୮ ପ୍ରତିଶତ ବୃଦ୍ଧିକୁ ଦର୍ଶାଉଛି। ବିପରୀତରେ, ଚୀନରୁ ତୈଳ ଚାହିଦା ୨୦୨୫ ରେ କେବଳ ୧.୫ ପ୍ରତିଶତ ଏବଂ ୨୦୨୬ ରେ ୧.୨୫ ପ୍ରତିଶତ ବୃଦ୍ଧି ପାଇବ ବୋଲି ଆକଳନ କରାଯାଇଛି। ଏହା ଦର୍ଶାଉଛି ଯେ ଭାରତ ବିଶ୍ୱରେ ସର୍ବାଧିକ ତେଲ ବ୍ୟବହାର କରୁଛି।

ଏହା ସତ୍ତ୍ୱେ, ସର୍ବାଧିକ ତେଲ ଆମଦାନୀ କରୁଥିବା ଦେଶମାନଙ୍କ ମଧ୍ୟରେ ଆମେରିକା ଶୀର୍ଷରେ ଅଛି। ୨୦୨୫ରେ ଏହାର ଆକଳନ କରାଯାଇଥିବା ଚାହିଦା ୨୦.୫ ମିଲିୟନ ବିପିଡି ଅଛି। ଏହା ପରେ ଚୀନ୍ ୧୬.୯୦ ମିଲିୟନ ବିପିଡି ଏବଂ ୨୦୨୬ ମସିହାରେ ୧୭.୧୨ ମିଲିୟନ ବିପିଡି ସହିତ ଦ୍ବିତୀୟ ସ୍ଥାନରେ ରହିବ। ତୈଳର ଦ୍ରୁତ ବର୍ଦ୍ଧିତ ବ୍ୟବହାରକୁ ବିଚାରକୁ ନେଲେ, ଭାରତ ଏହି ତାଲିକାରେ ତୃତୀୟ ସ୍ଥାନରେ ଅଛି। ୨୦୨୫ ଏବଂ ୨୦୨୬ ରେ ଆମେରିକାରୁ ତୈଳ ଚାହିଦା ଯଥାକ୍ରମେ ୦.୦୯ ଏବଂ ୦.୬ ପ୍ରତିଶତ ବୃଦ୍ଧି ପାଇବାର ଆଶା କରାଯାଉଛି।

କେତେ ପ୍ରତିଶତ ତେଲ ଆମଦାନୀ କରୁଛି ଭାରତ?

ଓପେକ୍‌ର ପୂର୍ବ ଆକଳନ ଅନୁଯାୟୀ, ୨୦୨୫ ଏବଂ ୨୦୨୬ ରେ ବିଶ୍ୱ ତୈଳ ଚାହିଦା ମିଳିତ ଭାବରେ ୧.୩ ମିିଲିୟନ ବିପିଡି ବୃଦ୍ଧି ପାଇବାର ଆଶା କରାଯାଉଛି। ଓପେକ୍‌ କହିଛି ଯେ, ଭାରତର ଅର୍ଥନୀତି ଦ୍ରୁତ ଗତିରେ ବୃଦ୍ଧି ପାଉଛି। ଗ୍ରାହକଙ୍କ ଖର୍ଚ୍ଚ, ନିବେଶ ଏବଂ ପ୍ରମୁଖ କ୍ଷେତ୍ରଗୁଡ଼ିକ ପାଇଁ ସରକାରୀ ସମର୍ଥନ ଦ୍ୱାରା ଚାଳିତ ଶକ୍ତିଶାଳୀ ଅର୍ଥନୈତିକ ଅଭିବୃଦ୍ଧିର ବର୍ତ୍ତମାନର ଗତି ଜାରି ରହିବ ବୋଲି ଆଶା କରାଯାଉଛି।

ଭାରତ ବର୍ତ୍ତମାନ ଏହାର ଅଶୋଧିତ ତୈଳ ଆବଶ୍ୟକତାର ୮୫ ପ୍ରତିଶତରୁ ଅଧିକ ଆମଦାନୀ କରୁଛି। ଏହା ପରେ, ବିଶୋଧନ ମାଧ୍ୟମରେ ଏହାକୁ ପେଟ୍ରୋଲ ଏବଂ ଡିଜେଲ ଭଳି ଇନ୍ଧନରେ ପରିଣତ କରାଯାଏ। ଓପେକ୍‌ ରିପୋର୍ଟ ଅନୁଯାୟୀ, ମାର୍ଚ୍ଚ ମାସରେ ଭାରତର ଅଶୋଧିତ ତୈଳ ଆମଦାନୀ ୫.୪ ମିଲିୟନ ବିପିଡିର ରେକର୍ଡ ସର୍ବାଧିକ ସ୍ତରରେ ପହଞ୍ଚିଛି, ଏହା ଗୋଟିଏ ମାସରେ ୫ ପ୍ରତିଶତରୁ ଅଧିକ ବୃଦ୍ଧି ପାଇଛି।