ଭୁବନେଶ୍ୱର,୧୫/୦୫: କଂଗ୍ରେସକୁ ଫେରିବେ କି ବରିଷ୍ଠ ନେତା ଚିରଞ୍ଜୀବ ବିଶ୍ୱାଳ? ଏ ଚର୍ଚ୍ଚା ଏବେ କଂଗ୍ରେସ ମହଲ ସହ ଜଗତସିଂହପୁର ପର୍ଯ୍ୟନ୍ତ ଘୂରି ବୁଲୁଛି । ଦୀର୍ଘ ଦିନ ପରେ କଂଗ୍ରେସ ଭବନରେ ବରିଷ୍ଠ ନେତା ତଥା ପୂର୍ବତନ ସାଂସଦ ରଞ୍ଜୀବ ବିଶ୍ୱାଳଙ୍କୁ ଦେଖିବାକୁ ମିଳିଛି । ପିସିସି ସଭାପତି ଭକ୍ତ ଚରଣ ଦାସଙ୍କ ସହ ରଞ୍ଜୀବ ବୈଠକ କରିଛନ୍ତି । ପଛୁଆବର୍ଗଙ୍କୁ ନେଇ ଚାଲିଥିବା ବୈଠକରେ ସାମିଲ ହୋଇଛନ୍ତି । ଖାଲି ସେତିକି ନୁହେଁ, କଂଗ୍ରେସ ନେତାଙ୍କ ସହ ରାଜଭବନ ବି ଯାଇ ଦାବିପତ୍ର ଦେଇଛନ୍ତି । ଦୀର୍ଘଦିନ ପରେ କଂଗ୍ରେସ ନେତାଙ୍କ ମେଳିରେ ରଞ୍ଜୀବଙ୍କ ଏଭଳି ସକ୍ରିୟତା ଦେଖିବା ପରେ ତାଙ୍କ ଭାଇ ଚିରଞ୍ଜୀବ ମଧ୍ୟ କଂଗ୍ରେସକୁ ଫେରିବା ନେଇ ଚର୍ଚ୍ଚା ଆରମ୍ଭ ହୋଇଛି ।
ଶରତ ପଟ୍ଟନାୟକ ପିସିସି ସଭାପତି ଥିବାବେଳେ ଏକ ବୈଠକ ଆୟୋଜନ ନେଇ ଚିରଞ୍ଜୀବ ବିଶ୍ୱାଳଙ୍କୁ ଦଳ ନିଲମ୍ବିତ କରିଥିଲା । ପରେ ନିଲମ୍ବନ ଉଠିଥିଲା । ହେଲେ ୨୦୨୪ ନିର୍ବାଚନ ପୂର୍ବରୁ ଚିରଞ୍ଜୀବ କଂଗ୍ରେସ ସହ ବିଶ୍ୱାଳ ପରିବାରର ଦୀର୍ଘ ଦଶନ୍ଧିର ସମ୍ପର୍କ ତୁଟାଇ ବିଜେଡିରେ ମିଶିଥିଲେ । ମାତ୍ର ବିଜେଡି ତାଙ୍କୁ ନିର୍ବାଚନ ଲଢ଼ିବାକୁ ଟିକଟ ଦେଇନଥିଲା । ନିର୍ବାଚନରେ ବିଜେଡି କ୍ଷମତାଚ୍ୟୁତ ହେବା ପରଠାରୁ ଚିରଞ୍ଜୀବଙ୍କ ସକ୍ରିୟତା କମିଯାଇଥିଲା ବିଜେଡିରେ । ଭକ୍ତ ପିସିସି ସଭାପତି ହେବା ପରେ ପୁରୁଣା କଂଗ୍ରେସ ନେତାମାନଙ୍କୁ ଦଳକୁ ଫେରାଇ ଆଣିବାକୁ ଉଦ୍ୟମ ଆରମ୍ଭ ହୋଇଛି । ଏହି ପରିପ୍ରେକ୍ଷୀରେ ବିଶ୍ୱାଳ ପରିବାର ଦୁଇ ଭାଇ ରଞ୍ଜୀବ ଓ ଚିରଞ୍ଜୀବଙ୍କୁ ନେଇ ଦଳ ଜଗତସିଂହପୁର ଜିଲ୍ଲାରେ ଦଳକୁ ମଜବୁତ କରିବାକୁ ଯୋଜନା ଚଳାଇଥିବା ସୂତ୍ରରୁ ଖବର ମିଳିଛି । ରଞ୍ଜୀବ ପୁଣି ଦଳରେ ସକ୍ରିୟ ହୋଇଥିବାବେଳେ ଆଗକୁ ଚିରଞ୍ଜୀବ ବିଜେଡି ଛାଡ଼ି କଂଗ୍ରେସକୁ ଫେରିପାରନ୍ତି ବୋଲି ଚର୍ଚ୍ଚା ଶୁଣିବାକୁ ମିଳୁଛି ।
