ନୂଆଦିଲ୍ଲୀ,୨୫/୦୪: ପହଲ୍ଗାମ ହମ୍ଲା ପରେ ଭାରତ ପାକିସ୍ତାନ ବିରୋଧରେ ନେଇଛି କଡ଼ା ପଦକ୍ଷେପ । ପାକିସ୍ତାନରୁ ଯିବା ଆସିବା ବାଟ ବନ୍ଦ କରିଦେଇଛି । ଏହାସହିତ ସାର୍କ ଭିସା ଛାଡ଼ ଯୋଜନାକୁ ବି ରଦ୍ଦ କରିଦେଇଛି । ଏହାର ଉଦ୍ଦେଶ୍ୟ ହେଉଛି ପାକିସ୍ତାନରୁ ଆସୁଥିବା ଲୋକଙ୍କ ଉପରେ ରୋକ୍ ଲଗାଇବା । ଅଟାରୀରେ ଇଣ୍ଟିଗ୍ରେଟେଡ୍ ଚେକ୍ ପୋଷ୍ଟ୍କୁ ତତ୍କାଳ ବନ୍ଦ କରିଦିଆଯାଇଛି । ଉଦ୍ଦେଶ୍ୟ ହେଉଛି ଆର୍ଥିକ ଚାପରେ ସନ୍ତୁଳି ହେଉଥିବା ତଥା ଆତଙ୍କବାଦକୁ ପ୍ରଶୟ ଦେଉଥିବା ପାକିସ୍ତାନକୁ ଶାସ୍ତି ଦେବା । ଅନ୍ୟପକ୍ଷରେ, ଭାରତ ସହିତ ପଙ୍ଗା ପାକିସ୍ତାନ ଅର୍ଥନୀତିକୁ ଭୁଶୁଡ଼ିବ କରିଦେବ ବୋଲି ପ୍ରକାଶ କରିଛନ୍ତି ବିଶେଷଜ୍ଞ ।
ଅଟାରୀ-ୱାଘା ବର୍ଡର ବନ୍ଦ କରାଯିବା ଦ୍ୱାରା ଭାରତ ଏବଂ ପାକିସ୍ତାନ ମଧ୍ୟରେ ବ୍ୟାପାର ବନ୍ଦ ହୋଇଯିବ । ଏହି ବର୍ଡର ଉଭୟ ଦେଶ ମଧ୍ୟରେ ବ୍ୟାପାରର ଏକମାତ୍ର ରାସ୍ତା । ଭାରତରୁ ସୋୟାବିନ, ଫଳମୂଳ, ନାଲି ଲଙ୍କା, ପ୍ଲାଷ୍ଟିକ୍ ଦାନା ଏବଂ ଅନ୍ୟାନ୍ୟ ସାମଗ୍ରୀ ରପ୍ତାନି ହେଉଥିବାବେଳେ ପାକିସ୍ତାନରୁ ଖଜୁରୀ, ଜିପ୍ସମ, ସିମେଣ୍ଟ, କାଚ ଏବଂ ଜଡ଼ିବୁଟି ଭାରତକୁ ଆସୁଥିଲା ।
ଏହି ରାସ୍ତାର ବ୍ୟବହାର ଭାରତ ଏବଂ ଆଫ୍ଗାନିସ୍ତାନ ମଧ୍ୟରେ ବ୍ୟାପାର ପାଇଁ ମଧ୍ୟ ହେଉଥିଲା । ଅଟାରୀ ଲ୍ୟାଣ୍ଡ୍ ପୋର୍ଟ ଜାତୀୟ ରାଜପଥ ସହ ଲାଗିଛି । ଏହା ବନ୍ଦ ହେବା ଦ୍ୱାରା ଉଭୟ ଦେଶ ମଧ୍ୟରେ ବ୍ୟାପାର ବନ୍ଦ ହୋଇଯିବ । ୨୦୨୩-୨୪ରେ ଏହି ପୋର୍ଟ ମାଧ୍ୟମରେ ୩୮୮୬.୫୩ କୋଟି ଟଙ୍କାର କାରବାର ହୋଇଥିଲା । ଏ ସମୟରେ ୬,୮୭୧ କାର୍ଗୋ ପରିବହନ ଏବଂ ୭୧,୫୬୩ ଯାତ୍ରୀ ଆସିଥିଲେ ଏବଂ ଯାଇଥିଲେ । ଭାରତର ଏ ପଦକ୍ଷେପ ପାକିସ୍ତାନ ବିରୋଧରେ ଏକ କଡ଼ା ସନ୍ଦେଶ । ଦ୍ୱିପାକ୍ଷିକ ଉତ୍ତେଜନା ସତ୍ତେ୍ୱ ୨୦୨୪ରେ ପାକିସ୍ତାନକୁ ଭାରତର ରପ୍ତାନି ଥିଲା ୫ ବର୍ଷର ସର୍ବୋଚ୍ଚ ସ୍ତର ।
୨୦୨୪ରେ ଭାରତ ପାକିସ୍ତାନକୁ ୧୨୧ କୋଟି ଡଲାର ମୂଲ୍ୟର ସାମଗ୍ରୀ ରପ୍ତାନି କରିଥିଲା । ଏହା ୨୦୨୩ରେ ଥିଲା ୫୪ କୋଟି ଡଲାର । ବର୍ତ୍ତମାନ ଉଭୟ ଦେଶ ମଧ୍ୟରେ ବାଣିଜ୍ୟିକ ସମ୍ପର୍କ ଛିନ୍ନ ହୋଇଛି । ପାକିସ୍ତାନକୁ ଭାରତରୁ ଆଉ ଯିବନି ଜରୁରୀ ସାମଗ୍ରୀ । ଏପ୍ରିଲ ୨୨ରେ ଜମ୍ମୁ କାଶ୍ମୀରର ପହଲଗାମଠାରେ ପର୍ଯ୍ୟଟକଙ୍କ ଉପରେ ଆତଙ୍କବାଦୀ ହମ୍ଲା ଉଭୟ ରାଷ୍ଟ୍ର ମଧ୍ୟରେ ତିକ୍ତତାକୁ ଆହୁରି ତେଜିଛି ।
ଭାରତ ମଧ୍ୟ ସିନ୍ଧୁ ଚୁକ୍ତିକୁ ବାତିଲ କରି ପାକିସ୍ତାନର ନିଦ ହଜାଇଦେଇଛି । ଅନ୍ୟପଟେ ତୃତୀୟ ରାଷ୍ଟ୍ର ଦେଇ ଯାଉଥିବା ରୁଟ୍ଗୁଡ଼ିକ ସମେତ ଭାରତ ସହ ସମସ୍ତ କାରବାର ବନ୍ଦ କରିଛି ପାକ୍ । ପାକିସ୍ତାନର ଏ ନିଷ୍ପତ୍ତିକୁ ନେଇ ରପ୍ତାନି ସଂଘ ଫିଓ ସଭାପତି ଏସ୍.ସି. ରାଲହନ୍ କହିଛନ୍ତି ଯେ, ପାକିସ୍ତାନ ସହ ଭାରତର ଦ୍ୱିପାକ୍ଷିକ ବ୍ୟାପାର ଅତି କମ୍ । ଦେଶର ମୋଟ ବାଣିଜ୍ୟରେ ପାକ୍ର ଯୋଗଦାନ ମାତ୍ର ୦.୦୬% । ୨୦୨୪-୨୫ ଏପ୍ରିଲ-ଜାନୁଆରୀରେ ଏହା ୫୦ କୋଟି ଡଲାର ବି ନ ଥିଲା । ବର୍ତ୍ତମାନ ଏହା ଶୂନ ହୋଇଯିବ । ପାକିସ୍ତାନକୁ ଅନେକ ପ୍ରମୁଖ ସାମଗ୍ରୀ ରପ୍ତାନି ବନ୍ଦ ହୋଇଯିବ । ସେଠାରେ ଦରଦାମ ସମସ୍ୟା ଆହୁରି ତେଜିବ । ଏହା ସେମାନଙ୍କ ଅର୍ଥନୀତିକୁ ବର୍ବାଦ କରିଦେବ ।
୨୦୨୪-୨୫ ଏପ୍ରିଲ-ଜାନୁଆରୀରେ ପାକିସ୍ତାନକୁ ଭାରତରୁ ଯାଇଥିଲା ୪୫ କୋଟି ଡଲାର ମୂଲ୍ୟର ସାମଗ୍ରୀ ଏବଂ ସେଠାରୁ ଆସିଥିଲା ମାତ୍ର ୦.୪୨ ନିୟୁତ ଡଲାର ମୂଲ୍ୟର ସାମଗ୍ରୀ । ୨୦୨୩-୨୪ରେ ଭାରତରୁ ପାକିସ୍ତାନକୁ ଯାଇଥିଲା ୧୧୮ କୋଟି ଡଲାର ମୂଲ୍ୟର ସାମଗ୍ରୀ ଏବଂ ସେଠାରୁ ଆସିଥିଲା ମାତ୍ର ୨୮.୮ ଲକ୍ଷ କୋଟି ଡଲାରର ସାମଗ୍ରୀ । ଏଭଳି ସ୍ଥିତିରେ ପାକିସ୍ତାନର କଟକଣା ଭାରତକୁ ନୁହେଁ ବରଂ ପାକ୍କୁ ବାଧିବ ବୋଲି କୁହନ୍ତି ଫିଓ ଅଧ୍ୟକ୍ଷ ।
