ନୂଆଦିଲ୍ଲୀ,୨୧/୦୧:ବିନିର୍ମାଣ ହବ୍ରେ ରୂପାନ୍ତର ହେବା ପାଇଁ ଭାରତର ଉଦ୍ୟମକୁ ସାମାନ୍ୟ ଧୀମା ରେସ୍ପନ୍ସ ମିଳିଛି । ଏସିଆ ବିନିର୍ମାଣ ସୂଚକାଙ୍କ(ଏଏମ୍ଆଇ)-୨୦୨୬ ରିପୋର୍ଟରେ ଭାରତ ୧୧ ପ୍ରମୁଖ ଏସୀୟ ଦେଶଙ୍କ ତାଲିକାରେ ଷଷ୍ଠ ସ୍ଥାନରେ ରହିଛି । ୨୦୨୪ ରିପୋର୍ଟରେ ଭାରତ ୮ଟି ଦେଶ ମଧ୍ୟରେ ଚତୁର୍ଥ ସ୍ଥାନରେ ଥିଲା, କିନ୍ତୁ ଗତବର୍ଷରୁ ଏହା ଷଷ୍ଠ ସ୍ଥାନରେ ସ୍ଥିର ରହିଛି । ରିପୋର୍ଟ ମୁତାବକ, ଭାରତକୁ ଗ୍ଲୋବାଲ ମାନୁଫାକ୍ଚରିଂ ହବ୍ ବନାଇବା ଲାଗି ଏହାର ଭିତ୍ତିଭୂମି ଏବଂ ଟିକସ ନିୟମରେ ଆହୁରି ସୁଧାର ଆଣିବାର ଆବଶ୍ୟକତା ରହିଛି ।
ସୂଚକାଙ୍କ ମୁତାବକ, ଚୀନ୍ ଏବେ ଏସିଆରେ ବିନିର୍ମାଣ କ୍ଷେତ୍ରରେ ବିଶ୍ୱର ପ୍ରଥମ ପସନ୍ଦ ରହିଛି । ସେହିଭଳି ମାଲେସିଆ ଏଥର ବଡ଼ ସଫଳତା ହାସଲ କରିଛି । ଏହା ଭିଏତ୍ନାମକୁ ପଛରେ ପକାଇ ଦ୍ୱିତୀୟ ସ୍ଥାନ ହାସଲ କରିଛି । ଭିଏତ୍ନାମ ତୃତୀୟ, ସିଙ୍ଗାପୁର ଚତୁର୍ଥ ଏବଂ ଦକ୍ଷିଣ କୋରିଆ ପଞ୍ଚମ ସ୍ଥାନରେ ରହିଛି । ଭାରତ ଏହି ଦେଶଗୁଡ଼ିକଠାରୁ ପଛରେ ଷଷ୍ଠ ସ୍ଥାନରେ ରହିଛି । ଇଣ୍ଡୋନେସିଆ ସପ୍ତମ ଏବଂ ଥାଇଲାଣ୍ଡ୍ ଅଷ୍ଟମ ସ୍ଥାନରେ ରହିଛି । ଏହି ରିପୋର୍ଟ ଡିଜନ୍ ଶିରା ଏଣ୍ଡ୍ ଆସୋସିଏଟ୍ସ ଜାରି କରିଛି । ଏଥିରେ କୌଣସି ଦେଶର ବିନିର୍ମାଣ କ୍ଷମତାକୁ ୮ଟି ମୁଖ୍ୟ ଆଧାରକୁ ନେଇ ପରଖାଯାଇଥିଲା । ଏଥିରେ ଅର୍ଥନୀତି, ରାଜନୈତିକ ସଂକଟ, ବ୍ୟବସାୟିକ ବାତାବରଣ,ଅନ୍ତର୍ଜାତୀୟ ବ୍ୟାପାର,ଟିକସ ନୀତି,ଭିତ୍ତିଭୂମି,ଶ୍ରମବଳ ଏବଂ ଏନ୍ଭାଇରନ୍ମେଣ୍ଟ-ସୋସିଆଲ ଗଭର୍ଣ୍ଣାଂଶ(ଇଏସ୍ଜି) ସାମିଲ ଅଛି ।
ଭାରତ କେତେକ କ୍ଷେତ୍ରରେ ମଜଭୁତ ଥିବାବେଳେ କେତେକ କ୍ଷେତ୍ରରେ ଏହାକୁ ସୁଧାର ଆଣିବାକୁ ପଡ଼ିବ ବୋଲି ରିପୋର୍ଟରେ କୁହାଯାଇଛି । ଭାରତ ପାଖରେ ବଡ଼ କାର୍ଯ୍ୟଶକ୍ତି ବା ଶ୍ରମିକ ଉପଲବ୍ଧତା ରହିଛି । ବର୍ଦ୍ଧିତ ଘରୋଇ ଚାହିଦା ଏହାର ବଡ଼ ଶକ୍ତି । ସରକାରଙ୍କ ଉତ୍ପାଦନ ସଂଯୁକ୍ତ ପ୍ରୋତ୍ସାହନ(ପିଏଲ୍ଆଇ) ସ୍କିମ୍ ଭଳି ନୀତି ଯୋଗୁ ଇଲେକ୍ଟ୍ରୋନିକ୍ସ ଏବଂ ଫାର୍ମା କ୍ଷେତ୍ରରେ ବଡ଼ ମାତ୍ରାରେ ନିବେଶ ଆସୁଛି । ତେବେ ଭିତ୍ତିଭୂମି କ୍ଷେତ୍ରରେ ଭାରତ ଏବେ ବି ସିଙ୍ଗାପୁର ଏବଂ ଚୀନ୍ ଭଳି ଦେଶଠାରୁ ବହୁ ପଛରେ ରହିଛି । ଏହାବ୍ୟତୀତ ଭ୍ରଷ୍ଟାଚାରକୁ ନେଇ ଧାରଣା ଏବଂ ସଂସ୍ଥାଗତ ସ୍ଥିରତା ମାମଲାରେ ଭାରତକୁ କମ୍ ଅଙ୍କ ମିଳିଛି । ଟିକସ ନୀତି ଏବଂ ଲଜିଷ୍ଟିକ୍ ଖର୍ଚ୍ଚ କମ୍ କରିବା ଭାରତ ପାଇଁ ବଡ଼ ଆହ୍ୱାନ ।
ରିପୋର୍ଟରେ କୁହାଯାଇଛି ଯେ, ଭ୍ରଷ୍ଟାଚାର ମାମଲାରେ ଭାରତ ଏହାର ୬ ପ୍ରତିସ୍ପର୍ଦ୍ଧୀ ଦେଶଙ୍କଠାରୁ ପଛରେ ଅଛି । ସିଙ୍ଗାପୁର ଏ ମାମଲାରେ ସବୁଠୁ ପାରଦର୍ଶୀ ଏବଂ ସୁରକ୍ଷିତ ବୋଲି ରିପୋର୍ଟରେ କୁହାଯାଇଛି । ବିଶେଷଜ୍ଞଙ୍କ କହିବାନୁସାରେ, ମେକ୍ ଇନ୍ ଇଣ୍ଡିଆକୁ ସମ୍ପୂର୍ଣ୍ଣ ରୂପେ ସଫଳ କରିବା ପାଇଁ ଭାରତକୁ ନିଜର ଆଇନଗତ ପ୍ରକ୍ରିୟାକୁ ଅଧିକ ସରଳ କରିବାକୁ ପଡ଼ିବ । ୨୦୨୬ ସୁଦ୍ଧା ୧ ଟ୍ରିଲିୟନ ଡଲାରର ବିନିର୍ମାଣ ଅର୍ଥନୀତି ପାଲଟିବା ଭାରତର ଲକ୍ଷ୍ୟ । ରିପୋର୍ଟରେ ପରାମର୍ଶ ଦିଆଯାଇଛି ଯେ, ଭାରତକୁ କେବଳ ଶ୍ରମ ଉପଲବ୍ଧତା ଉପରେ ନିର୍ଭର ରହିବା ବଦଳରେ ଦକ୍ଷତା ବିକାଶ ଏବଂ ଡିଜିଟାଲ ଭିତ୍ତିଭୂମି ଉପରେ ଧ୍ୟାନ ଦେବାକୁ ପଡ଼ିବ । ଯଦି ଭାରତ ଏହାର ଲଜିଷ୍ଟିକ୍ସ ଖର୍ଚ୍ଚକୁ କମ୍ କରିଦିଏ ତେବେ ଆଗାମୀ କିଛି ବର୍ଷରେ ଏହା ଭିଏତ୍ନାମ ଏବଂ ମାଲେସିଆ ଆଦି ରାଷ୍ଟ୍ରକୁ କଡ଼ା ଟକ୍କର ଦେବ ।
