ନୂଆଦିଲ୍ଲୀ,୧୭/୦୩: ୨୦୨୮ ସୁଦ୍ଧା ଭାରତ ପାଲଟିବ ବିଶ୍ୱର ତୃତୀୟ ବୃହତ୍ ଅର୍ଥବ୍ୟବସ୍ଥା । ମୋର୍ଗାନ ଷ୍ଟାନ୍ଲି ପକ୍ଷରୁ ଏହି ପୂର୍ବାନୁମାନ କରାଯାଇଛି । ଉକ୍ତ ସମୟରେ ଭାରତ ବିଶ୍ୱର ଅନ୍ୟତମ ଅଗ୍ରଣୀ ଉପଭୋକ୍ତା ବଜାର ପାଲଟିବ । ମାକ୍ରୋ ଅର୍ଥନୈତିକ ସ୍ଥିରତା ଦ୍ୱାରା ସମର୍ଥିତ ନୀତି ଏବଂ ଉନ୍ନତ ଭିତ୍ତିଭୂମି ଯୋଗୁ ଏହା ସମ୍ଭବ ହେବ ବୋଲି ରିପୋର୍ଟରେ ଉଲ୍ଲେଖ କରାଯାଇଛି ।
ମୋର୍ଗାନ ଷ୍ଟାନ୍ଲି ପ୍ରକାଶ କରିଛି ଯେ, ୨୦୨୩ରେ ଭାରତୀୟ ଅର୍ଥବ୍ୟବସ୍ଥାର ଆକାର ୩.୫ ଟ୍ରିଲିୟନ ଡଲାର ରହିଛି । ଏଥିସହିତ ଏହା ବର୍ତ୍ତମାନ ବିଶ୍ୱର ପଞ୍ଚମ ବୃହତ୍ ଅର୍ଥବ୍ୟବସ୍ଥା । ତେବେ ୨୦୨୬ ସୁଦ୍ଧା ଭାରତୀୟ ଅର୍ଥନୀତିର ଆକାର ୪.୭ ଟ୍ରିଲିୟନ ଡଲାରକୁ ବୃଦ୍ଧି ପାଇବ ଏବଂ ଏହା ଆମେରିକା, ଚୀନ୍ ଓ ଜର୍ମାନି ପରେ ବିଶ୍ୱର ଚତୁର୍ଥ ବୃହତ୍ ଅର୍ଥବ୍ୟବସ୍ଥା ପାଲଟିବ ।
୨୦୨୮ରେ ଏହା ୫.୭ ଟ୍ରିଲିୟନ ଡଲାର ଆକାର ସହ ଜର୍ମାନିକୁ ପଛରେ ପକାଇ ବିଶ୍ୱର ତୃତୀୟ ବୃହତ୍ ଅର୍ଥନୀତି ପାଲଟିବ ବୋଲି ମୋର୍ଗାନ ଷ୍ଟାନ୍ଲି ଏହାର ରିପୋର୍ଟରେ ଉଲ୍ଲେଖ କରିଛି ।
ଏହା ପ୍ରକାଶ କରିଛି ଯେ,୧୯୯୦ରେ ଭାରତ ବିଶ୍ୱର ଦ୍ୱାଦଶ ବୃହତ୍ ଅର୍ଥନୀତି ଥିଲା । ୨୦୦୦ ମସିହାରେ ଏହା ୧୩ ତମ ସ୍ଥାନକୁ ଖସିଯାଇଥିଲା । ୨୦୨୦ରେ ଏହା ନବମ ବୃହତ୍ ଅର୍ଥନୀତି ପାଲଟିଲା ଏବଂ ୨୦୨୩ରେ ବିଶ୍ୱର ପଞ୍ଚମ ବୃହତ୍ ଅର୍ଥନୀତି । ବର୍ତ୍ତମାନ ବିଶ୍ୱ ଜିଡିପିରେ ଭାରତର ଅଂଶ ୩.୫% ଥିବାବେଳେ ୨୦୨୯ରେ ଏହା ୪.୫%କୁ ବୃଦ୍ଧି ପାଇବ ବୋଲି ମୋର୍ଗାନ ଷ୍ଟାନ୍ଲି ପ୍ରକାଶ କରିଛି ।
ଅନ୍ୟପକ୍ଷରେ, ମୁଣ୍ଡ ପିଛା ଜିଡିପି ୨୦୨୫ରେ ୨,୫୧୪ ଡଲାର ଥିବାବେଳେ ୨୦୩୫ରେ ଏହା ୪,୨୪୭ ଡଲାରକୁ ବଢ଼ିବ ବୋଲି ଅନୁମାନ ରହିଛି । ଆଗାମୀ ଦଶନ୍ଧିରେ ବିଶ୍ୱ ଜିଡିପିରେ ବଡ଼ ଯୋଗଦାନ ଦେବ ଭାରତ । ଦୃଢ଼ ଜନସଂଖ୍ୟା ଅଭିବୃଦ୍ଧି, ମାକ୍ରୋ ଅର୍ଥନୈତିକ ସ୍ଥିରତା ସମର୍ଥିତ ନୀତି, ଉନ୍ନତ ଭିତ୍ତିଭୂମି ଏବଂ ଔଦ୍ୟୋଗିକତା ବିକାଶ ଦ୍ୱାରା ଭାରତୀୟ ଅର୍ଥନୀତି ଦ୍ରୁତ ବେଗରେ ଅଗ୍ରସର ହେବ ବୋଲି ମୋର୍ଗାନ ଷ୍ଟାନ୍ଲି ଏହାର ରିପୋର୍ଟରେ ଉଲ୍ଲେଖ କରିଛି । ଏବେ ଭାରତ ବିଶ୍ୱର ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ଭାବେ ଉଭା ହୋଇଛି ।
