ନୂଆଦିଲ୍ଲୀ,୨୦/୦୭: ୱାଲ୍ଡ ଚାମ୍ପିଅନସିପ୍ ଅଫ୍ ଲିଜେଣ୍ଡସ୍ରେ ହେବାକୁ ଥିବା ଭାରତ-ପାକିସ୍ତାନ ମ୍ୟାଚ ବାତିଲ୍ ହୋଇଛି । ମ୍ୟାଚ ରଦ୍ଦ ନେଇ ଆୟୋଜକଙ୍କ ପକ୍ଷରୁ ଏହି ଘୋଷଣା ହୋଇଛି । ଭାରତୀୟ ଖେଳାଳି ମ୍ୟାଚରୁ ଓହରିବା ପରେ ମ୍ୟାଚ ରଦ୍ଦ ହୋଇଛି । ପ୍ରେସ୍ ରିଲିଜ୍ ଜାରି କରି ଆୟୋଜକଙ୍କ ପକ୍ଷରୁ ଦୁଃଖ ପ୍ରକାଶ କରାଯାଇଛି ।
ମ୍ୟାଚକୁ ନେଇ ଉଠୁଥିବା ବିବାଦ ଏବଂ ନାରାବାଜି ମଧ୍ୟରେ ଆୟୋଜକ ଓ ଅଧିକାରୀ ବୟାନ ଜାରି କରି ମ୍ୟାଚ ରଦ୍ଦ କରିବାକୁ ଘୋଷଣା କରିଛନ୍ତି । ଏହା ପୂର୍ବରୁ ଭାରତର ପୂର୍ବତନ କ୍ରିକେଟର ହରଭଜନ ସିଂହ, ଶିଖର ଧାୱନ, ସୁରେଶ ରୈନା ଏବଂ ୟୁସୁଫ ଫଠାନ ମ୍ୟାଚରୁ ଓହରିଯାଇଥିଲେ । ଶିଖର ଧାୱନ ମ୍ୟାଚକୁ ନେଇ ସୋସିଆଲ ମିଡିଆରେ କହିଥିଲେ, ''ମୋ ଦେଶ ମୋ ପାଇଁ ସବୁକିଛି । ଦେଶଠୁ ବଡ଼ କିଛି ନାହିଁ ।''
ବୟାନରେ କଣ କହିଲା WCL?
WCL ବୟାନ ଜାରି କରି କହିଛି, ଆମେ WCLରେ ସବୁବେଳେ କ୍ରିକେଟକୁ ବହୁତ ପସନ୍ଦ କରୁ । ଆମର ଏକମାତ୍ର ଉଦ୍ଦେଶ୍ୟ ଦର୍ଶକଙ୍କୁ ସୁନ୍ଦର ଅନୁଭୂତି ଦେବା । ଆମେ ଯେବେ ଜାଣିଲୁ ଚଳିତ ବର୍ଷ ପାକିସ୍ତାନ ହକି ଦଳ ଭାରତ ଆସୁଛି । ଭାରତ-ପାକିସ୍ତାନ ଭଲିବଲ ମ୍ୟାଚ ସହିତ କିଛି ଅନ୍ୟ ଖେଳରେ ଦୁଇ ଦେଶ ମୁହାଁମୁହିଁ ହେବେ । ଆମେ ଭାବିଲୁ WCLରେ ଭାରତ-ପାକିସ୍ତାନ ମ୍ୟାଚ କରି ଦର୍ଶକଙ୍କ ପାଇଁ କିଛି ସୁନ୍ଦର ମୂହୁର୍ତ୍ତ ତିଆରି କରିବୁ । ଲାଗୁଛି ଏହି ପ୍ରକ୍ରିୟାରେ କିଛି ଲୋକଙ୍କ ଭାବନାକୁ ଆଘାତ ହୋଇଛି । ଭାରତୀୟ କ୍ରିକେଟ ଲିଜେଣ୍ଡସ୍ଙ୍କୁ ଅସହଜ ସ୍ଥିତିରେ ପକାଇ ଦେଇଛୁ । ଯିଏକି ଦେଶ ପାଇଁ ଗୌରବ ଆଣିଛନ୍ତି ।
କ୍ଷମା ମାଗିଲେ ଆୟୋଜକ- ୱାଲ୍ଡ ଚାମ୍ପିଅନସିପ୍ ଅଫ୍ ଲିଜେଣ୍ଡସ୍ ଭାରତ-ପାକିସ୍ତାନ ମ୍ୟାଚ ରଦ୍ଦ ହେବା ଘୋଷଣା ପରେ ଆୟୋଜକ କ୍ଷମା ମାଗିଛନ୍ତି । ସେ କହିଛନ୍ତି, ଆମେ ପୁଣି ଥରେ ସେହି ସମସ୍ତ ଭାବନାକୁ ଆଘାତ ଦେଇଥିବାରୁ କ୍ଷମା ମାଗୁଛି । ଆଶା କରୁଛି କି ଲୋକ ବୁଝିବେ ଆମର ଉଦ୍ଦେଶ୍ୟ କେବଳ କ୍ରିକେଟ ପ୍ରେମୀଙ୍କୁ କିଛି ଖୁସିର ମୂହୁର୍ତ୍ତ ହେବା ।
