ନୂଆଦିଲ୍ଲୀ,୧୧/୧୦: ଘରୋଇ ଭାରତ ଓ ୱେଷ୍ଟଇଣ୍ଡିଜ ମଧ୍ୟରେ ଦ୍ୱିତୀୟ ଟେଷ୍ଟ ଜାରି ରହିଛି । ପ୍ରଥମ ଦିବସରେ ଭାରତ ଆଧିପତ୍ୟ ଜାରି ରଖି ବିଶାଳ ସ୍କୋର ଅଭିମୁଖେ ଅଗ୍ରସର ହେଉଛି । ଯଶସ୍ୱୀ ଜୈସ୍ୱାଲଙ୍କ ସପ୍ତମ ଶତକ ଓ ସାଇ ସୁଦର୍ଶନଙ୍କ ଅର୍ଦ୍ଧଶତକ ବଳରେ ଘରୋଇ ଦଳ ପ୍ରଥମ ଇନିଂସରେ ୨ ୱିକେଟ୍ ହରାଇ ୩୧୮ ରନ ସଂଗ୍ରହ କରିଛି । ପ୍ରଥମ ଦିବସ ଷ୍ଟମ୍ପ ଅପସାରଣ ସୁଦ୍ଧା ଜୈସ୍ୱାଲ ୧୭୩ ଓ ଶୁଭମନ ଗିଲ୍ ୨୦ ରନ କରି ଅପରାଜିତ ରହିଛନ୍ତି ।
ଶୁକ୍ରବାର ଟସ୍ ଜିତିଥିଲା ଭାରତ ଓ ନେଇଥିଲା ବ୍ୟାଟିଂ ନିଷ୍ପତ୍ତି । ଅଧିନାୟକ ନିଯୁକ୍ତ ହେବା ପରଠୁ ଗିଲ୍ ପ୍ରଥମ କରି ଟସ୍ ଜିତିଥିଲେ । ଦୁଇ ଓପନର କେଏଲ ରାହୁଲ ଓ ଜୈସ୍ୱାଲ ସତର୍କତାର ସହ ବ୍ୟାଟିଂ ଆରମ୍ଭ କରିଥିଲେ । ପେସ୍ ବୋଲରଙ୍କୁ ପିଚ୍ରୁ ସେଭଳି କିଛି ସହାୟତା ମିଳି ନଥିଲା । ତଥାପି ୱେଷ୍ଟ ଇଣ୍ଡିଜର ପେସ୍ ବାହିନୀ ଶୃଙ୍ଖଳିତ ବୋଲିଂ କରି ରନ୍ ଗତିକୁ ମନ୍ଥର କରିଥିଲେ । ୧୪ଓଭର ପରେ ସ୍ପିନର ବୋଲିଂ ଆରମ୍ଭ କରିଥିଲେ । ଏହାପରେ ରାହୁଲ ବଡ଼ ସଟ୍ ଖେଳିବା ଆରମ୍ଭ କରିଥିଲେ । ପ୍ରଥମ ୱିକେଟ୍ରେ ଉଭୟ ୫୮ ରନ୍ ସଂଗ୍ରହ କରିଥିଲେ । ୧୮ତମ ଓଭରରେ ଜୋମେଲ ୱାରିକାନ ଯୋଡ଼ି ଭାଙ୍ଗିଥିଲେ । ରାହୁଲ ୩୮ (୫ଚୌକା, ୧ଛକା) ରନ କରି ଷ୍ଟମ୍ପ ଆଉଟ୍ ହୋଇଥିଲେ । ଏହାପରେ ବ୍ୟାଟିଂ କରିବାକୁ ଆସିଥିବା ସାଇ ସୁଦର୍ଶନ ଅପରାଜିତ ଜୈସ୍ୱାଲଙ୍କ ସହ ମିଶି ଦଳୀୟ ସ୍କୋରକୁ ଆଗେଇ ନେଇଥିଲେ । ମଧ୍ୟାହ୍ନ ବିରତି ସୁଦ୍ଧା ଉଭୟ ଦଳୀୟ ସ୍କୋରକୁ ୯୪ରେ ପହଞ୍ଚାଇ ସାରିଥିଲେ ।
ଦ୍ୱିତୀୟ ଅଧିବେଶନରେ ଦୁଇ ଅପରାଜିତ ବ୍ୟାଟର ଆକ୍ରମଣାତ୍ମକ ସଟ୍ମାନ ଖେଳି ଦ୍ରୁତ ବେଗରେ ଦଳୀୟ ସ୍କୋରକୁ ଅଗେଇ ନେଇଥିଲେ । ପ୍ରଥମ ୧୦ ଓଭରରେ ଉଭୟ ୫୨ ରନ ଯୋଗ କରିଥିଲେ । ୩୮ ଓଭର ସୁଦ୍ଧା ଦଳୀୟ ସ୍କୋର ୧୪୬ରେ ପହଞ୍ଚିଥିଲା । ୱେଷ୍ଟ ଇଣ୍ଡିଜ ବୋଲରମାନେ ଅତିରିକ୍ତ ଦେଇ ନଥିଲେ ହେଁ ଜୈସ୍ୱାଲ ଓ ସୁଦର୍ଶନଙ୍କ ଆକ୍ରମଣରୁ ବର୍ତ୍ତି ନଥିଲେ । ପ୍ରତି ଓଭରରେ ଅତି କମ୍ରେ ଗୋଟିଏ ଲେଖାଏଁ ଚୌକା ବାହାରୁଥିଲା । ୪୫ ଓଭର ସୁଦ୍ଧା ଉଭୟ ଦଳୀୟ ସ୍କୋରକୁ ୧୭୫ରେ ପହଞ୍ଚାଇଥିଲେ । ସୁଦର୍ଶନ ଦ୍ୱିତୀୟ ଅର୍ଦ୍ଧଶତକ ଅର୍ଜନ କରିବା ପରେ ପରେ ଜୈସ୍ୱାଲ୍ ଶତକ ପୂରଣ କରିଥିଲେ । ଚା’ପାନ ବିରତି ବେଳକୁ ଉଭୟ ଦଳୀୟ ସ୍କୋରକୁ ୨୨୦ରେ ପହଞ୍ଚାଇ ସାରିଥିଲେ । କେବଳ ଦ୍ୱିତୀୟ ଅଧିବେଶନରେ ଉଭୟ ସଂଗ୍ରହ କରିଥିଲେ ୧୨୬ ରନ ।
ତୃତୀୟ ଅଧିବେଶନରେ ୱେଷ୍ଟ ଇଣ୍ଡିଜ୍ ରନ୍ ଗତିକୁ ମନ୍ଥର କରିବାରେ ସଫଳ ହୋଇଥିଲା । ପ୍ରଥମ ୧୦ ଓଭରରେ ୩୧ ରନ ପ୍ରଦାନ କରିଥିଲେ ଇଣ୍ଡିଜ ବୋଲିଂ ବାହିନୀ । ଦଳୀୟ ସ୍କୋର ୨୫୧ବେଳେ ସୁଦର୍ଶନ ଧୈର୍ଯ୍ୟ ହରାଇ ବସିଥିଲେ । ସେ ବ୍ୟକ୍ତିଗତ ୮୭ (୧୨ଚୌକା) ରନ କରି ୱାରିକାନଙ୍କ ବଲ୍ରେ ଏଲ୍ବିଡବ୍ଲ୍ୟୁ ଆଉଟ୍ ହୋଇଥିଲେ । ଜୈସ୍ୱାଲଙ୍କୁ ଆଉଟ୍ କରିବାରେ ବିଫଳ ହୋଇଥିଲା ୱେଷ୍ଟ ଇଣ୍ଡିଜ୍ । ସେ ଗୋଟିଏ ପଟେ ଆକ୍ରମଣ ଜାରି ରଖି ଦଳୀୟ ସ୍କୋରକୁ ଆଗେଇ ନେଇଥିଲେ । ଦ୍ୱିତୀୟ ୱିକେଟ୍ର ପତନ ପରେ ବ୍ୟାଟିଂ କରିବାକୁ ଆସିଥିବା ଗିଲ୍ ମଧ୍ୟ ତାଙ୍କୁ ଉପଯୁକ୍ତ ସହାୟତା ପ୍ରଦାନ କରିଥିଲେ । ଷ୍ଟମ୍ପ ସୁଦ୍ଧା ଉଭୟ ୬୭ ରନର ଭାଗିଦାରୀ ଗଢ଼ି ଦଳୀୟ ସ୍କୋରକୁ ୩୧୮ରେ ପହଞ୍ଚାଇଥିଲେ । ଆଜି ୱେଷ୍ଟ ଇଣ୍ଡିଜ୍ ୯୦ ଓଭର ବୋଲିଂ କରିଥିଲେ ହେଁ ଗୋଟିଏ ହେଲେ ଅତିରିକ୍ତ ରନ ପ୍ରଦାନ କରି ନଥିଲା ।
