ନୂଆଦିଲ୍ଲୀ,୨୧/୦୪: ଭାରତୀୟମାନେ ବିଦେଶରେ ଚାକିରି କରିବା ଲାଗି ଯିବା ନିମନ୍ତେ କେନ୍ଦ୍ର ସରକାର ନୂଆ ଆଇନ ଆଣୁଛନ୍ତି । ବିଦେଶ ମନ୍ତ୍ରଣାଳୟ ପକ୍ଷରୁ ଏହି ଆଇନ ପ୍ରସ୍ତୁତ କରାଯାଉଛି । ଖୁବଶୀଘ୍ର ଏହାର ଚିଠା ଜାରି ହେବ । ସାଧାରଣ ଜନତା ଓ ବିଶେଷଜ୍ଞଙ୍କ ପରାମର୍ଶ ପରେ ଏ ସଂକ୍ରାନ୍ତ ବିଲ୍ ସଂସଦର ବର୍ଷାକାଳୀନ ଅଧିବେଶନରେ ଆଗତ ହେବ । ଭାରତୀୟମାନେ ଚାକିରି କରିବା ଲାଗି ବେଆଇନ ଭାବେ ଆମେରିକା ଯାଇଥିବା ଓ ସେଠାରୁ ଟ୍ରମ୍ପ ପ୍ରଶାସନ ଦ୍ୱାରା ପ୍ରତ୍ୟର୍ପଣ ହେବା ପରେ ଏହି ଆଇନ ଆଣିବା ଲାଗି ପ୍ରକ୍ରିୟା ତ୍ୱରାନ୍ୱିତ ହୋଇଛି ।
କେନ୍ଦ୍ର ସରକାର ଆଣୁଥିବା ଏହି ନୂଆ ଆଇନ ୧୯୮୩ ଇମିଗ୍ରେସନ ଆଇନର ସ୍ଥାନ ନେବ । ଏହାର ନାମ ଇମିଗ୍ରେସନ, ଓଭରସିଜ୍ ମୋବିଲିଟି, ଫାସିଲିଟେସନ ଆଣ୍ଡ ୱେଲପେୟାର ବିଲ୍ ରହିବ । ଚାକିରି ବ୍ୟତୀତ ପାଠପଢ଼ା ଓ ବ୍ୟବସାୟ କରିବାକୁ ବିଦେଶ ଯାଉଥିବା ଭାରତୀୟଙ୍କ ପାଇଁ ମଧ୍ୟ ଏହି ନୂଆ ଆଇନ ପରିସରଭୁକ୍ତ କରାଯିବ । ବିଭିନ୍ନ ନିଯୁକ୍ତି ଏଜେଣ୍ଟଙ୍କ ବେଆଇନ ଗତିବିଧିକୁ ଏହି ନୂଆ ବିଲ୍ରେ ଅପରାଧ ଭାବେ ବିବେଚନା କରାଯିବ । ପ୍ରଚଳିତ ଆଇନରେ ନିଯୁକ୍ତି ଏଜେଣ୍ଟଙ୍କ ରେଜିଷ୍ଟ୍ରେସନ ରଦ୍ଦ ସହ ସେମାନଙ୍କୁ କଳାତାଲିକାଭୁକ୍ତ କରାଯାଉଥିଲା । କିନ୍ତୁ ନୂଆ ଆଇନରେ ନିଯୁକ୍ତିର ପ୍ରତିଶ୍ରୁତି ଦେଇ ଭାରତୀୟଙ୍କୁ ବେଆଇନ ଭାବେ ବିଦେଶକୁ ଚାଲାଣ କରୁଥିଲେ ଏହି ନିଯୁକ୍ତି ଏଜେଣ୍ଟଙ୍କୁ ୫ରୁ ୧୦ ବର୍ଷ ପର୍ଯ୍ୟନ୍ତ ଜେଲ୍ ଓ ୧ରୁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା କରାଯିବ ।
ବିଦେଶ ମନ୍ତ୍ରଣାଳୟର ତଥ୍ୟ ଅନୁସାରେ ୨୦୨୪ ଅକ୍ଟୋବର ସୁଦ୍ଧା ଦେଶରେ ମୋଟ ୩୦୯୪ ଅଣ ପଞ୍ଜିକୃତ ନିଯୁକ୍ତି ଏଜେଣ୍ଟଙ୍କୁ ଚିହ୍ନଟ କରାଯାଇଛି । ନୂଆ ବିଲ୍ରେ ସେମାନଙ୍କ ସମ୍ପର୍କରେ ତଥ୍ୟ ରଖାଯିବ । ବିଶର ବିଭିନ୍ନ ଦେଶରେ ବର୍ତ୍ତମାନ ୩.୫ କୋଟି ଭାରତୀୟ ରହୁଛନ୍ତି। ସେମାନଙ୍କ ମଧ୍ୟରୁ ୧.୫୮ କୋଟି ଏନ୍ଆରଆଇ ହୋଇଥିଲା ବେଳେ ୧.୯୭ କୋଟି ମୂଳ ଭାରତୀୟ ଲୋକ ଅଛନ୍ତି । କୁହାଯାଉଛି କି ଆମେରିକା ପରେ ଏବେ ଅନ୍ୟ ଦେଶରେ ମଧ୍ୟ ଇମିଗ୍ରେସନ ଆଇନ କଠୋର ହେବାକୁ ଯାଉଛି । ଆମେରିକା ଯେଉଁ ଅବୈଧ ଭାରତୀୟଙ୍କୁ ସ୍ୱଦେଶ ପଠାଇଥିଲା ସେମାନଙ୍କ ପାଦରେ ବେଡି ଓ ହାତରେ କଡି ପକାଇଥିଲା । ଯାହାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ତେଣୁ ଭାରତ ମଧ୍ୟ ଇମିଗ୍ରେସନ ଆଇନକୁ ପାରଦର୍ଶି, ସୁରକ୍ଷିତ ଓ ସୁବ୍ୟବସ୍ଥିତ କରିବାକୁ ଚାହୁଁଛି । ଯାହାକି ଭବିଷ୍ୟତରେ ଅବୈଧ ଭାରତୀୟଙ୍କୁ ନେଇ ସମସ୍ୟା ନ ଉପୁଯିବ ।
