- ମେଟା, ଆମାଜନ, ଓରାକଲରେ ବ୍ୟାପକ ଛଟେଇ
- ଅଧିକାଂଶ କର୍ମଚାରୀ ଏଚ୍୧ବି ଭିଜାଧାରୀ
- ଚିନ୍ତାରେ ଭାରତୀୟ ଟେକ୍ ପ୍ରଫେସନାଲ
- ୬୦ ଦିନରେ ଖୋଜିବାକୁ ପଡ଼ିବ ନୂଆ ଚାକିରି
- ଇମିଗ୍ରେଶନ ଷ୍ଟାଟସ୍ ବଦଳାଇବାକୁ କହୁଛନ୍ତି ଓକିଲ
- ବି୨ ଭିଜିଟର ଭିଜାକୁ ସ୍ଥାନାନ୍ତର ହେବାକୁ ପରାମର୍ଶ
- ଏହି ଅବଧିରେ ଆମେରିକାରେ ରହି ନୂଆ ଚାକିରି ଖୋଜିପାରିବେ
ନୂଆଦିଲ୍ଲୀ,୨୨/୦୫: ପୁଣିଥରେ ଆମେରିକାରେ ବଡ଼ ବଡ଼ କମ୍ପାନିଗୁଡ଼ିକ ଦ୍ୱାରା ଆରମ୍ଭ ହୋଇଯାଇଛି ଗଣ ଛଟେଇ ଅଭିଯାନ । ଆମାଜନ, ମେଟା, ଓରାକଲ ସମେତ ଅନେକ କମ୍ପାନିରେ ହଜାର ହଜାର ଲୋକଙ୍କ ଚାକିରି ଚାଲିଗଲାଣି । ଟେକ୍ କମ୍ପାନିଗୁଡ଼ିକରେ ଛଟେଇର ଶିକାର ଏଚ୍-୧ବି କର୍ମଚାରୀ ବି ହୋଇଛନ୍ତି, ଯେଉଁଥିରେ ବହୁ ସଂଖ୍ୟାରେ ଭାରତୀୟ ସାମିଲ ଅଛନ୍ତି । ଅନୁମାନ କରାଯାଉଛି ଏଥିରେ କିଛି ଛାତ୍ରଛାତ୍ରୀ ବି ରହିଛନ୍ତି, ଯେଉଁମାନେ ଏଚ୍୧ବି ଭିଜାରେ ନିଯୁକ୍ତି ପାଇଥିଲେ । ଏହି ଛଟେଇ ଯୋଗୁ ଭୟଭୀତ ଅବସ୍ଥାରେ ଅଛନ୍ତି ଭାରତୀୟ ଏଚ୍୧ବି କର୍ମଚାରୀ ।
କଥା ହେଉଛି ଛଟେଇର ଏହି ଧାରା ଯୋଗୁ ଏଚ୍୧ବି କର୍ମଚାରୀଙ୍କ ଇମିଗ୍ରେସନ ଷ୍ଟାଟସ୍ ବିପଦରେ । ଏବେ ସେମାନଙ୍କ ଉପରେ ୬୦ ଦିନର ଗ୍ରେସ୍ ପିରିୟଡ ନିୟମ ଲାଗୁ ହୋଇଯାଇଛି । ଅର୍ଥାତ୍ ୬୦ ଦିନରେ ନୂଆ ଚାକିରି ଖୋଜିବେ, ନହେଲେ ଆମେରିକା ଛାଡ଼ିବେ । ତେବେ ପ୍ରଭାବିତ ଭାରତୀୟ କର୍ମଚାରୀଙ୍କୁ ଇମିଗ୍ରେସନ ଓକିଲମାନେ ପରାମର୍ଶ ଦେଇଛନ୍ତି ଯେ, ସେମାନେ ନିଜର ଷ୍ଟାଟସ୍ରେ ତୁରନ୍ତ ପରିବର୍ତ୍ତନ କରନ୍ତୁ । ପରାମର୍ଶ ଦିଆଯାଇଛି ଯେ, ସେମାନେ ବି-୨ ଭିଜିଟର ଭିଜାକୁ ସ୍ଥାନାନ୍ତର ହୋଇପାରିବେ । ଏହାଦ୍ୱାରା ସେମାନଙ୍କୁ ଆମେରିକାରେ ରହିବା ପାଇଁ ଆଇନ ଅନୁସାରେ ମଞ୍ଜୁରି ମିଳିଯିବ ଏବଂ ଏହି ସମୟ ମଧ୍ୟରେ ସେମାନେ ନୂଆ ଚାକିରି ବି ଖୋଜିପାରିବେ ।
ନିୟମ ଅନୁସାରେ ଏଚ୍୧ବି ଭିଜାଧାରୀ କର୍ମଚାରୀଙ୍କୁ ଆମେରିକାରେ ଉକ୍ତ ସମୟ ପର୍ଯ୍ୟନ୍ତ ରହିବାକୁ ଅନୁମତି ମିଳିଥାଏ ଯେଉଁ ପର୍ଯ୍ୟନ୍ତ ସେମାନେ ସେଠାରେ ଚାକିରି କରୁଥିବେ। ଚାକିରି ଚାଲିଯିବା ପରେ ସେମାନଙ୍କ ପାଇଁ ଗ୍ରେସ୍ ପିରିୟଡ ନିୟମ ଲାଗୁ ହୋଇଯାଏ । ଏହି ଅବଧି ମଧ୍ୟରେ ସେମାନଙ୍କୁ ନୂଆ କମ୍ପାନି ଖୋଜିବାକୁ ପଡ଼ିବ, ଯେଉଁ କମ୍ପାନି ଭିଜା ସ୍ପନ୍ସରଶିପ୍ ପାଇଁ ରାଜି ଥିବ । ଯଦି ଏହା ନ ହୁଏ ତେବେ କର୍ମଚାରୀଙ୍କୁ ୬୦ ଦିନ ମଧ୍ୟରେ ଦେଶ ଛାଡ଼ିବାକୁ ପଡ଼ିବ ।
ତେବେ ଗ୍ରେସ୍ ପିରିୟଡ୍ ନିୟମ କର୍ମଚାରୀଙ୍କ ଅଡୁଆ ବଢ଼ାଇଦେଇଛି । କାରଣ ଏବେ କର୍ମଚାରୀଙ୍କୁ ଆମେରିକା ଛାଡ଼ିବାର ଡର ମାଡ଼ି ଆସିଲାଣି । ଏହି ନିୟମରେ ସ୍ପଷ୍ଟ କୁହାଯାଇଛି ଯେ, ଯଦି କୌଣସି କର୍ମଚାରୀଙ୍କୁ ୬୦ ଦିନ ମଧ୍ୟରେ ଚାକିରି ନ ମିଳେ ତେବେ ତାଙ୍କୁ ତୁରନ୍ତ ଦେଶ ଛାଡ଼ିବାକୁ ପଡ଼ିବ । ଯଦି ଦେଶ ନ ଛାଡ଼ନ୍ତି ତେବେ ଉକ୍ତ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇପାରେ ।
ଅଧିକ ପଢ଼ନ୍ତୁ :- Trump vs Netanyahu: 'ହମ୍ଲା ରୋକିବୁ ନା ପ୍ରହାର କରିବୁ'...ଇରାନକୁ ନେଇ ଟ୍ରମ୍ପ-ନେତାନ୍ୟାହୁ ମୁହାଁମୁହିଁ, ଫୋନ୍ କଲ୍ରେ ଦୁହିଁଙ୍କ ମଧ୍ୟରେ ମତଭେଦ
ଏଚ୍-୧ବି ଭିଜାଧାରୀଙ୍କ ପାଇଁ ଛଟେଇ ପରବର୍ତ୍ତୀ ନିୟମ ଚାକିରି ହରାଇଥିବା ଏଚ୍-୧ବି ଭିଜାଧାରୀଙ୍କୁ ଆମେରିକାରେ ନୂଆ ଚାକିରି ଖୋଜିବା କିମ୍ବା ନିଜର ଇମିଗ୍ରେଶନ ଷ୍ଟାଟସ୍ ବଦଳାଇବା ପାଇଁ ମାତ୍ର ୬୦ ଦିନର ମହଲତ ମିଳିଥାଏ । ଯଦି ୬୦ ଦିନ ମଧ୍ୟରେ କର୍ମଚାରୀଙ୍କୁ କୌଣସି ନୂଆ କମ୍ପାନି ନ ମିଳେ ତେବେ ବାଧ୍ୟ ହୋଇ ତାଙ୍କୁ ଦେଶ ଛାଡ଼ିବାକୁ ପଡ଼େ । ଯଦି କର୍ମଚାରୀଙ୍କୁ ୬୦ ଦିନ ମଧ୍ୟରେ ଚାକିରି ମିଳିଯାଏ ତେବେ ନୂଆ କମ୍ପାନି ତାଙ୍କ ପାଇଁ ଏଚ୍-୧ବି ଆବେଦନ ଦାଏର କରିଥାଏ । ଏହାଦ୍ୱାରା ଦେଶରେ ରହିବା ପାଇଁ କର୍ମଚାରୀଙ୍କୁ ଆଇନତଃ ଅଧିକାର ମିଳିଯାଏ ।
ପ୍ରାରମ୍ଭିକ ଭାବେ ଏହି ନିୟମକୁ ଅଣାଯାଇଥିଲା, ଯଦ୍ଦ୍ୱାରା କର୍ମଚାରୀଙ୍କୁ ନୂଆ ଚାକିରି ଖୋଜିବା ପାଇଁ ସମୟ ମିଳିବ । କିନ୍ତୁ ବର୍ତ୍ତମାନର ନିଯୁକ୍ତି ବଜାରରେ ୬୦ ଦିନ ମଧ୍ୟରେ ଚାକିରି ମିଳିବା କଠିନ ହୋଇଗଲାଣି । ଖୁବ୍ କମ୍ ଏଭଳି ଆମେରିକୀୟ କମ୍ପାନି ଅଛନ୍ତି, ଯେଉଁମାନେ ଭିଜା ସ୍ପନ୍ସରସିପ୍ ଦେବାକୁ ଇଚ୍ଛୁକ ଥାନ୍ତି । ଏହାଦ୍ୱାରା ଭାରତୀୟ କର୍ମଚାରୀଙ୍କ ପାଇଁ ନିଯୁକ୍ତି ପାଇବା ଆହ୍ୱାନମୂଳକ ପାଲଟିଛି ।
