ବିଶାଖାପଟ୍ଟନମ୍ ୩୦/୦୩: ଆଜି ଆଇପିଏଲ୍ର ଦଶମ ଲିଗ୍ ମୁକାବିଲାରେ ଦିଲ୍ଲୀ କ୍ୟାପିଟାଲ୍ସ ନିଜର ଦ୍ୱିତୀୟ ଘରୋଇ ଗ୍ରାଉଣ୍ଡ୍ ବିଶାଖାପଟ୍ଟନମ୍ରେ ଗତବର୍ଷର ରନର୍ସ ଅପ୍ ସନରାଇଜର୍ସ ହାଇଦ୍ରାବାଦକୁ ଭେଟିବ । ଏଥିସହ ପୂର୍ବ ପରାଜୟର ପ୍ରତିଶୋଧ ନେବାକୁ କ୍ୟାପିଟାଲ୍ସ ପ୍ରୟାସ କରିବ । ଅପରାହ୍ଣରେ ମ୍ୟାଚ୍ ରହିଛି । ତେଣୁ ବିସ୍ଫୋରକ ବ୍ୟାଟିଂ ଓ ବିଶାଳ ସ୍କୋର ହେବା ନିଶ୍ଚିତ । କିନ୍ତୁ ଦିଲ୍ଲୀ କ୍ୟାପିଟାଲ୍ସ ପେସ୍ ବୋଲର ମିଚେଲ ଷ୍ଟାର୍କ ଓ ସନରାଇଜର୍ସ ଓପନର ଟ୍ରେଭିସ୍ ହେଡ୍-ଅଭିଷେକ ଶର୍ମା ଯୋଡ଼ିଙ୍କ ମଧ୍ୟରେ ଏକ ଦମ୍ଦାର ଫାଇଟ୍ ଦେଖିବାକୁ ମିଳିବ ।
ଗତ ସିଜନରେ ଉଭୟ ଦଳ ଥରେ ମାତ୍ର ପରସ୍ପରକୁ ଭେଟିଥିଲେ । ସନରାଇଜର୍ସ ୬୭ ରନ୍ରେ ଉକ୍ତ ମ୍ୟାଚ୍ ଜିତିଥିଲା । ମାତ୍ର ଉକ୍ତ ମ୍ୟାଚ୍ ଫିରୋଜ ଶାହ କୋଟଲା (ବର୍ତ୍ତମାନ ଅରୁଣ ଜେଟଲୀ) ଷ୍ଟାଡ଼ିୟମ୍ରେ ଖେଳାଯାଇଥିଲା । ପ୍ରଥମେ ବ୍ୟାଟିଂ କରି ସନରାଇଜର୍ସ ୭/୨୬୬ ରନ ସଂଗ୍ରହ କରିଥିଲା । କେବଳ ପାୱାର ପ୍ଲେରେ ହେଡ୍ ଓ ଅଭିଷେକ ଯୋଡ଼ି ରେକର୍ଡ ୧୨୫ ରନ ସଂଗ୍ରହ କରିଥିଲେ । ଜବାବରେ ଦିଲ୍ଲୀ କ୍ୟାପିଟାଲ୍ସ ୧୯.୧ ଓଭରରେ ୧୯୯ ରନ୍ କରି ଅଲ୍ ଆଉଟ୍ ହୋଇଥିଲା ।
କ୍ୟାପିଟାଲ୍ସ ଉକ୍ତ ପରାଜୟକୁ ଭୁଲି ନାହିଁ । ଏଥର ଦଳରେ ବହୁ ପରିବର୍ତ୍ତନ ଘଟିଛି । ତଥାପି ବୋଲିଂ ବିଭାଗ ପ୍ରାୟତଃ ସମାନ ରହିଛି । ଗତବର୍ଷ କୁଲଦୀପ ଯାଦବ, ମୁକେଶ କୁମାର ଓ ଅକ୍ଷର ପଟେଲଙ୍କୁ ଟ୍ରାଭିସେକ୍ ଯୋଡି ନିର୍ମମ ପ୍ରହାର କରିଥିଲେ । ଆଜି ମଧ୍ୟ ଏହି ୩ବୋଲରଙ୍କୁ ସେମାନେ ସାମ୍ନା କରିବେ ।
ଦିଲ୍ଲୀ କ୍ୟାପିଟାଲ୍ସ ପ୍ରଥମ ମ୍ୟାଚ୍ରେ ଲକ୍ଷ୍ନୌ ସୁପରଜାଏଣ୍ଟ୍ସକୁ ହରାଇଥିଲା । ସନରାଇଜର୍ସ ପ୍ରଥମ ମ୍ୟାଚ୍ରେ ରାଜସ୍ଥାନ ରୟାଲ୍ସକୁ ପରାଜିତ କରିଥିଲେ ହେଁ ସୁପରଜାଏଣ୍ଟ୍ସ ବିପକ୍ଷ ଦ୍ୱିତୀୟ ମ୍ୟାଚ୍ରେ ପରାଜୟର ସାମ୍ନା କରିଥିଲା । ଆଜି ସନରାଇଜର୍ସ ପ୍ରଥମ କରି ବାହାର ଗ୍ରାଉଣ୍ଡରେ ଖେଳିବ । ଦଳର ସମସ୍ତ ଖେଳାଳି ଫିଟ୍ ଓ ଫର୍ମରେ ରହିଛନ୍ତି । ତେଣୁ ଏକାଦଶରେ ପରିବର୍ତ୍ତନ ହେବାର ସମ୍ଭାବନା ନାହିଁ ।
କ୍ୟାପିଟାଲ୍ସ ଦଳରେ ପରିବର୍ତ୍ତନ ହେବ । ପ୍ରଥମ ମ୍ୟାଚ୍ ଖେଳି ନଥିବା କେଏଲ ରାହୁଲ ଏକାଦଶକୁ ଫେରିବେ ଓ ୪ନଂ ସ୍ଥାନରେ ବ୍ୟାଟିଂ କରିବେ । ତେଣୁ ସମୀର ରିଜଭୀଙ୍କୁ ଏକାଦଶରୁ ବାଦ ଦିଆଯିବ । ମୁକେଶ କୁମାର ପ୍ରଥମ ମ୍ୟାଚ୍ରେ ଆହତ ହୋଇଥିଲେ । ସେ ଖେଳିବା ନେଇ ମଧ୍ୟ ଆଶଙ୍କା ରହିଛି । ଦିଲ୍ଲୀ କ୍ୟାପିଟାଲ୍ସର ନୂଆ ଫିନିଶର ଆଶୁତୋଷ ଶର୍ମାଙ୍କ ଉପରେ ସମସ୍ତଙ୍କ ନଜର ରହିବ । ପୂର୍ବ ମ୍ୟାଚ୍ରେ ସେ ଏକୁଟିଆ ସୁପରଜାଏଣ୍ଟ୍ସ ଠାରୁ ବିଜୟ ଛଡ଼ାଇ ନେଇଥିଲେ ।
ବିଶାଖାପଟ୍ଟନମ୍ରେ ବିଶାଳ ସ୍କୋର ସଂଗୃହୀତ ହେବା ଏକ ପ୍ରକାର ନିଶ୍ଚିତ । ପ୍ରଥମ ମ୍ୟାଚ୍ରେ ମଧ୍ୟ ସୁପରଜାଏଣ୍ଟ୍ସ ୨୦୯ ରନ ସଂଗ୍ରହ କରିଥିଲା । ପରେ କ୍ୟାପିଟାଲ୍ସ ୨୧୦ ରନ୍ର ବିଜୟ ଲକ୍ଷ୍ୟ ହାସଲ କରିବାରେ ସଫଳ ହୋଇଥିଲା । ଦିନ ବେଳା ମ୍ୟାଚ୍ ଥିବାରୁ ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଆଶା କରାଯାଇପାରେ ।
ସମ୍ଭାବ୍ୟ ଦ୍ବାଦଶ
ଦିଲ୍ଲୀ କ୍ୟାପିଟାଲ୍ସ: ଜେକ ଫ୍ରେଜର-ମ୍ୟାକଗର୍କ, ଫାଫ ଡୁ ପ୍ଲେସି, ଅଭିଷେକ ପୋରେଲ, କେଏଲ ରାହୁଲ, ଅକ୍ଷର ପଟେଲ (ଅଧିନାୟକ), ଟ୍ରିଷ୍ଟନ ଷ୍ଟବ୍ସ, ଆଶୁତୋଷ ଶର୍ମା, ବିପ୍ରଜ ନିଗମ, ମିଚେଲ ଷ୍ଟାର୍କ, କୁଲଦୀପ ଯାଦବ, ମୋହିତ ଶର୍ମା, ମୁକେଶ କୁମାର/ଦର୍ଶନ ନାଲକନ୍ଦେ ।
ସନରାଇଜର୍ସ: ଅଭିଷେକ ଶର୍ମା, ଟ୍ରେଭିସ ହେଡ୍, ଇଶାନ କିଷନ, ନୀତିଶ କୁମାର ରେଡ୍ଡୀ, ହେନରିକ କ୍ଲାସେନ, ଅନିକେତ ବର୍ମା, ଅଭିନବ ମନୋହର, ପ୍ୟାଟ୍ କମିନ୍ସ (ଅଧିନାୟକ), ହର୍ଷଲ ପଟେଲ, ମହମ୍ମଦ ସାମି, ସିମରଜୀତ ସିଂହ, ଆଡାମ ଜାମ୍ପା ।
