ମୁମ୍ବାଇ,୦୭/୦୧: ଆସନ୍ତା ମାସରେ ହେବାକୁ ଥିବା ଚାମ୍ପିଅନ୍ସ ଟ୍ରଫି ପାଇଁ ଖୁବ୍ ଶୀଘ୍ର ଭାରତୀୟ ଦଳ ଘୋଷଣା କରାଯିବ । ଆସନ୍ତା ୧୨ତାରିଖ ସୁଦ୍ଧା ସମସ୍ତ ବୋର୍ଡ ନିଜ ନିଜର ଦଳ ଘୋଷଣା କରିବାକୁ ଆଇସିସି ନିର୍ଦ୍ଦେଶ ଦେଇଛି ।
ବର୍ଡର-ଗାଭାସ୍କର ଟ୍ରଫିରେ ବିଫଳତା ସତ୍ତେ୍ୱ ରୋହିତ ଶର୍ମା ଭାରତୀୟ ଦଳର ନେତୃତ୍ୱ ନେବା ନିଶ୍ଚିତ । ତାଙ୍କ ସହ ଯଶପ୍ରୀତ ବୁମରାଙ୍କୁ ଉପଅଧିନାୟକ ନିଯୁକ୍ତ କରିବାକୁ ବିସିସିଆଇ ନିଷ୍ପତ୍ତି ନେଇଥିବା ଶୁଣା ଯାଉଛି । କିନ୍ତୁ ଏପର୍ଯ୍ୟନ୍ତ ବିସିସିଆଇ ପକ୍ଷରୁ ବିଧିବଦ୍ଧ ଭାବରେ କିଛି ଘୋଷଣା କରାଯାଇନାହିଁ । ବୁମରା ସମ୍ପ୍ରତି ଆହତ ଅଛନ୍ତି । ଗତ ସିଡନୀ ଟେଷ୍ଟରେ ବୋଲିଂ ବେଳେ ସେ ପିଠିରେ ଯନ୍ତ୍ରଣା ଅନୁଭବ କରିଥିଲେ । ଅବଶ୍ୟ ପରେ ବୁମରା ବ୍ୟାଟିଂ କରିବାକୁ ଓହ୍ଳାଇଥିଲେ ହେଁ ଦ୍ୱିତୀୟ ଇନିଂସରେ ବୋଲିଂ କରି ନଥିଲେ । ଯନ୍ତ୍ରଣା ସ୍ଥାନର ସ୍କାନ କରାଯାଇଥିଲେ ହେଁ ଏପର୍ଯ୍ୟନ୍ତ ରିପୋର୍ଟକୁ ଗୁପ୍ତ ରଖାଯାଇଛି । ତେଣୁ ସେ ଫିଟ୍ ହେବା ପାଇଁ କେତେ ଦିନ ସମୟ ଲାଗିବ, ଏବେଠୁ କହିବା ମୁସ୍କିଲ ।
