ନୂଆଦିଲ୍ଲୀ,୨୪/୧୧: ସୁନାର ସଉକ ପ୍ରାୟ ସମସ୍ତଙ୍କର ଥାଏ । ବଶେଷ କରି ଭାରତୀୟଙ୍କ ମଧ୍ୟରେ ସୁନା କିଣିବାର ସଉକ ଟିକେ ଅଧିକ ଦେଖିବାକୁ ମିଳିଥାଏ । ଧନତେରସ ହେଉ କି ଅନ୍ୟ କିଛି ପର୍ବ ସବୁଥିରେ ଭାରତୀୟ ମହିଳା ମାନେ ସୁନା କିଣିଥାନ୍ତି । ବିଶେଷ କରି ଧନତେସରରେ ସୁନାଦୋକାନରେ ପ୍ରବଳ ଭିଡ ଲାଗିଥାଏ । ତେବେ ଜାଣିଛନ୍ତି ଭାରତୀୟଙ୍କ ପାଖରେ କେତେ ସୁନା ରହିଛି । ୱାର୍ଲ୍ଡ ଗୋଲ୍ଡ କାଉନସିଲ ରିପୋର୍ଟ ଅନୁସାରେ ଭାରତୀୟଙ୍କ ପାଖରେ ୨୪ ହଜାର ଟନ୍ ସୁନା ରହିଛି ।
ଏହା ସିହତ ୱାର୍ଲ୍ଡ ଗୋଲ୍ଡ କାଉନସିଲ ରିପୋର୍ଟରୁ ଏହା ଜଣାପଡିଛି ଯେ, ବିଶ୍ବରେ ଯେତେ ସୁନା ମହଜୁତ ରହିଛି ତାର ୧୧ ପ୍ରତିଶତ ସୁନା ଭାରତୀୟ ମହିଳାମାନେ ଗହଣା ଆକାରରେ ପିନ୍ଧୁଛନ୍ତି । ଖାଲି ସେତିକି ନୁହେଁ ଭାରତୀୟ ମହିଳାମାନେ ଯେତିକି ସୁନା ପିନ୍ଧୁଛନ୍ତି ତାହା ବିଶ୍ବରେ ସର୍ବାଧିକ ସୁନା ମହଜୁତ ରଖିଥିବା ୫ଟି ଦେଶଠାରୁ ମଧ୍ୟ ଅଧିକ। ଏହି ତାଲିକାରେ ଭାରତ ପାଖରେ ୨୪ ହଜାର ଟନ ସୁନା ଥିବାବେଳେ ଯୁକ୍ତରାଷ୍ଟ୍ର ଆମେରିକା ନିକଟରେ ୮ ହଜାର ଟନ୍, ଜର୍ମାନୀ ପାଖରେ ୩୩୦୦ ଟନ, ଇଟାଲୀ ପାଖରେ ୨,୪୫୦ ଟନ୍, ଫ୍ରାନ୍ସ ପାଖରେ ୨,୪୦୦ ଟନ ସୁନା ରହିଥିବା ବେଳେ ଋଷିଆ ନିକଟରେ ୧,୯୦୦ ଟନ୍ ସ୍ବର୍ଣ୍ଣ ଅଳଙ୍କାର ରହିଛି ।
ଭାରତର ବିଭିନ୍ନ ଅଞ୍ଚଳର ଲୋକଙ୍କ ସୁନା ମହଜୁତ ଓ ବ୍ୟବହାରକୁ ଦେଖିଲେ ଦକ୍ଷିଣ ଭାରତରେ ସବୁଠୁ ଆଗରେ ରହିଛି । ଦେଶରେ ଥିବା ମୋଟ ସୁନାର ୪୦ ପ୍ରତିଶତ ଦକ୍ଷିଣ ଭାରତ ଲୋକଙ୍କ ପାଖରେ ରହିଛି । ସେଥିରୁ ୨୮ ପ୍ରତିଶତ ସୁନା କେବଳ ତାମିଲନାଡୁ ପାଖରେ ରହିଛି । ସେଣ୍ଟ୍ରାଲ ବୋର୍ଡ ଡାଇରେକ୍ଟ ଟ୍ୟାକ୍ସ (ସିବିଡିଟି) ନିମୟ ଅନୁସାରେ, ଭାରତରେ ବିବାହିତା ମହିଳା ୫୦୦ ଗ୍ରାମ ସୁନା ରଖିପାରିବେ । ସେହିପରି ଅବିବାହିତଙ୍କ ପାଖରେ ୨୦୦ ଗ୍ରାମ୍ ସୁନା ରଖିବାର ଅନୁମତି ରହିଛି । ପୁରୁଷମାନଙ୍କୁ କେବଳ ୧୦୦ ଗ୍ରାମ୍ ସୁନା ରଖିବାର ନିୟମ ରହିଛି ।
