ଭୁବନେଶ୍ୱର,୧୬/୦୭ : ବର୍ଷା ଆଣିଛି ରାଜ୍ୟକୁ ରୋଗ ଭୟ । କୋଣ ଅନୁକୋଣରେ ବ୍ୟାପିଲାଣି ସଂକ୍ରମିତ ଓ ଅଣସଂକ୍ରମିତ ରୋଗ । ବିଭିନ୍ନ ରୋଗରେ ସଂକ୍ରମିତ ହୋଇ ରୋଗୀ ହସ୍ପିଟାଲ ଧାଇଁବାରେ ଲାଗିଛନ୍ତି । ଲୋକେ ଝାଡ଼ାବାନ୍ତିରେ ସଂକ୍ରମିତ ହୋଇ କଲବଲ ହେଉଥିଲା ବେଳେ ହଇଜାରେ ରୋଗୀଙ୍କ ଜୀବନ ଯାଉଛି । ଘରେ ଘରେ ଲୋକେ ଥଣ୍ଡା ଜ୍ୱର ଯନ୍ତଣାରେ ଭୋଗୁଛନ୍ତି । ମ୍ୟାଲେରିଆ ଆଉ ଡେଙ୍ଗୁ କାୟାବିସ୍ତାର କଲାଣି ।
ଜୁଲାଇ ପ୍ରଥମ ସପ୍ତାହର ରିପୋର୍ଟ ମୁତାବକ ୧ରୁ ୭ ତାରିଖ ଭିତରେ ୬ ହାଡ଼ଫୁଟି, ୫୦୭ ଡେଙ୍ଗୁ, ଗୋଟିଏ ଡିପ୍ଥେରିଆ, ୬ ମିଳିମିଳା ଓ ୮୯୦ ଟାଇଫଏଡ୍ ରୋଗୀ ଚିହ୍ନଟ ହୋଇଛନ୍ତି । ଏହାଛଡ଼ା ରାଜ୍ୟରେ ମଶା କଲାଣି କଲବଲ । ଡେଙ୍ଗୁ ଓ ମ୍ୟାଲେରିଆରେ ଛଟପଟ ରୋଗୀ । ରାଜ୍ୟରେ ୬୨୦୦ ଜଣଙ୍କ ନିକଟରେ ମ୍ୟାଲେରିଆ ରୋଗ ଥିବା ସନ୍ଦେହ କରାଯାଇଛି । ୯୦ ଜଣ ସ୍କ୍ରବ୍ ଟାଇଫସ୍ ରୋଗୀ ଲକ୍ଷଣ ଥାଇ ଚିହ୍ନଟ ହୋଇଥିବା ସୂଚନା ମିଳିଛି । ହେଲେ ଏହା ପ୍ରକୃତରେ ସ୍କ୍ରବ୍ ଟାଇଫସ୍ କି ନାହିଁ ତାହା ଜାଣିବା ପାଇଁ ଲ୍ୟାବ୍କୁ ନମୁନା ପଠାଯାଇଛି । ଅନ୍ୟପଟରେ ୭୪ ଜଣ ଅଚିହ୍ନା ରୋଗରେ ପୀଡ଼ିତ ଥିବା ଜଣାପଡ଼ିଛି । ସ୍ୱାସ୍ଥ୍ୟ ବିଭାଗ କମିଟି ଗଠନ କରି ଏହାର କାରଣ ଖୋଜୁଛି ।
ରାଜ୍ୟରେ ଝାଡ଼ାବାନ୍ତି ରୋଗୀଙ୍କ ସଂଖ୍ୟା ୧୧,୧୮୦ରେ ପହଞ୍ଚିଥିଲା । କଟକ, ପୁରୀ, ଖୋର୍ଦ୍ଧା, ରାୟଗଡ଼ା, ବ୍ରହ୍ମପୁର, ଯାଜପୁର, ଢେଙ୍କାନାଳ, କେନ୍ଦୁଝର ଆଦି ଜିଲ୍ଲାରେ ଝାଡ଼ାବାନ୍ତି ଦେଖାଦେଇଛି । ଜୁଲାଇ ଆରମ୍ଭରୁ ହିଁ ଘରେ ଘରେ ଥଣ୍ଡା ଜ୍ୱର ଓ କାଶ କମିବା ନାଁ ନେଉନି । ୪୮୧୭ ଜଣ ୫ ବର୍ଷରୁ କମ୍ ପିଲାଙ୍କୁ ଜ୍ୱର ହୋଇଥିବା ବେଳେ ୩୦,୮୫୫ ଜଣ ୭ ଦିନ ହେବ ଜ୍ୱରରେ ପୀଡ଼ିତ । ୧୫୮୪ ଜଣ ପିଲାଙ୍କ ଝାଡ଼ା ଲାଗି ରହିଥିଲା । ଏହାର ନିରାକରଣ ଲାଗି ରାଜ୍ୟରେ ୪ ଜୁଲାଇରୁ ୧୧ ତାରିଖ ପର୍ଯ୍ୟନ୍ତ ଆରମ୍ଭ ହୋଇଛି ଜୀବାଣୁମୁକ୍ତ ଓ ସଚେତନତା ସପ୍ତାହ । ବିଶେଷ କରି ଚଳିତ ବର୍ଷା ଋତୁରେ ସମ୍ଭାବ୍ୟ ଜଳବାହିତ ଓ ଜୀବାଣୁ (ଭେକ୍ଟର) ବାହିତ ରୋଗ ପ୍ରତିରୋଧ ପାଇଁ ସ୍ୱାସ୍ଥ୍ୟ ଓ ପଞ୍ଚାୟତିରାଜ ବିଭାଗ ମିଳିତ ଭାବେ ଏହି ଅଭିଯାନ ଚଳାଇଛନ୍ତି । ଏଥିରେ ସମସ୍ତ ଗ୍ରାମ, ସ୍ୱାସ୍ଥ୍ୟ ସୁବିଧା, ସାର୍ବଜନୀନ ସ୍ଥାନ, ପାନୀୟ ଜଳ ଉତ୍ସ ଓ ଜଳାଶୟ ବିଶୋଧନ କାର୍ଯ୍ୟ ଜାରି ରହିଛି ।
