ସୋର, ୨୬।୭: କି ଅବସ୍ଥା ! ଇଏ ଡାକ୍ତରଖାନା ନା କଉ ଅପହଞ୍ଚ ଗାଁ ଇଲାକା । ଏଠି ଅବସ୍ଥା ଏତେ ଶୋଚନୀୟ ଯେ, ଟର୍ଚ୍ଚ ଲାଇଟ୍ ଜାଳି ରୋଗୀଙ୍କ ଚିକିତ୍ସା କରାଯାଇଛି । ଖାଲି ସେତିକି ନୁହେଁ, ରୋଗୀଙ୍କ ଡ୍ରେସିଂ, ଇଞ୍ଜେକ୍ସନ ଓ ସାଲାଇନ୍ ବି ଟର୍ଚ୍ଚ ଆଲୁଅରେ ଦିଆଯାଇଛି । ଏଭଳି ଅଭାବନୀୟ ଘଟଣା ଦେଖାଯାଇଛି ବାଲେଶ୍ୱର ଜିଲ୍ଲା ସୋର ବ୍ଲକ୍ ଅନନ୍ତପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ । ଡାକ୍ତରଖାନାର ପିଛା ଛାଡ଼ୁନି ବିବାଦ । ପୂର୍ବରୁ ଏଠାରେ ଜଣେ ସୁରକ୍ଷାକର୍ମୀ ରୋଗୀ ସେବା କରୁଥିବା ଦେଖିବାକୁ ମିଳିଥିଲା । ଆଉ ଏବେ ଟର୍ଚ୍ଚ ଆଲୁଅରେ ରୋଗୀସେବା କରାଯିବା ଭଳି ସାଂଘାତିକ ଚିତ୍ର ସାମନାକୁ ଆସିଛି ।
ଅନନ୍ତପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଉପରେ ସୋର, ବାହାନଗା ବ୍ଲକ୍ ସହ ଭଦ୍ରକ ଜିଲ୍ଲା ବାସୁଦେବପୁର ଅଞ୍ଚଳର ଅନେକ ଲୋକ ନିର୍ଭର କରନ୍ତି । ପ୍ରତିଦିନ ଶତାଧିକ ରୋଗୀ ଡାକ୍ତରଖାନାକୁ ଆସନ୍ତି । ଶୁକ୍ରବାର ରାତି ସାଢ଼େ ୮ଟାରେ ବିଦ୍ୟୁତ୍ କାଟ୍ ହୋଇଥିଲା । ଡିଜି ଥିଲେ ବି ଡାକ୍ତରଖାନା ୩ ଘଣ୍ଟାରୁ ଅଧିକ ସମୟ ଧରି ବିଦ୍ୟୁତ୍ ସରବରାହ ଟପ୍ ହୋଇଥିଲା । ଫଳରେ ଡାକ୍ତରମାନେ ଟର୍ଚ୍ଚ ଲାଇଟ୍ ଜାଳି ରୋଗୀଙ୍କ ଚିକିତ୍ସା କରିଥିଲେ ।
ଘଟଣା ଜଣାପଡ଼ିବା ପରେ ସ୍ୱାସ୍ଥ୍ୟ ବିଭାଗରେ ଏଭଳି ଖାମଖିଆଲ କାମକୁ ବୁଦ୍ଧିଜୀବୀ ମହଲ ନିନ୍ଦା କରିବା ସହ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ଏ ସମ୍ପର୍କରେ ଡାକ୍ତରଖାନା ପରିଚାଳକ ଡା.ଶାଶ୍ୱତ କୁମାର ସାହୁ କହିଛନ୍ତି, ଘଟଣା ବାବଦରେ ମୁଁ କିଛି ଜାଣିନି । ଡାକ୍ତରଖାନାରେ ଡିଜି ଅଛି । ହେଲେ କେଉଁ କାରଣ ପାଇଁ ସୁରକ୍ଷାକର୍ମୀ ଡିଜି ଚଲାଇ ନାହାନ୍ତି, ତାହାର ତଦନ୍ତ ହେବ ଏବଂ କାର୍ଯ୍ୟାନୁଷ୍ଠାନ ନିଆଯିବ । କହିରଖୁ କି, କିଛି ମାସ ତଳେ ଏଠାରେ ଜଣେ ସୁରକ୍ଷା କର୍ମୀ ରୋଗୀଙ୍କ ଚିକିତ୍ସା କରୁଥିବାର ଭିଡିଓ ଭାଇରାଲ୍ ହୋଇଥିଲା । ଯାହାକୁ ନେଇ ଡାକ୍ତରଖାନା କର୍ତ୍ତୃପକ୍ଷଙ୍କୁ ନିନ୍ଦା ମୁଣ୍ଡାଇବାକୁ ପଡ଼ିଥିଲା ।
