ବଲାଙ୍ଗୀର (ଆପ୍ର ),୩୦।୬ : ସଇଁତଲା ବ୍ଲକ କେରମେଲି ପଂଚାୟତ ପାଇକ ସମରା ସ୍ୱାସ୍ଥ୍ୟ ଓ ଆରୋଗ୍ୟ କେନ୍ଦ୍ର ନିକଟରେ ବିଭିନ୍ନ ସିରଫ, ଶତାଧିକ ବଟିକା ଫିଙ୍ଗା ଯାଇଥିବା ନେଇ ’ପ୍ରମେୟ’ରେ ଖବର ପ୍ରକାଶ ପରେ ଘଟଣାର ତଦନ୍ତ ଆରମ୍ଭ ହୋଇଛି । ଅନ୍ୟ ପକ୍ଷେ ତଦନ୍ତ ସମୟରେ ଖବର ସଂଗ୍ରହ ପାଇଁ ଉପସ୍ଥିତ ଥିବା ପ୍ରମେୟ ପ୍ରତିନିଧି ପ୍ରଦୀପ ବାଗଙ୍କୁ ଆକ୍ରମଣ କରାଯାଇଥିବା ଅଭିଯୋଗ ହୋଇଛି ।
ପ୍ରକାଶ ଯେ ଏସଏଚଜି ମହିଳାମାନଙ୍କୁ ଏହି ସ୍ୱାସ୍ଥ୍ୟ କେନ୍ଦ୍ରରେ ସଫେଇ କରିବା ପାଇଁ ଦାୟିତ୍ୱ ଦିଆଯାଇଛି। ସ୍ୱାସ୍ଥ୍ୟ ବିଭାଗର ଉଚ୍ଚସ୍ତରୀୟ ଟିମ ସଇଁତଲାର ବିଭିନ୍ନ ସିଏଚଓ କେନ୍ଦ୍ରଗୁଡିକୁ ପରିଭ୍ରମଣ କରିବା କାର୍ଯ୍ୟକ୍ରମ ଥିବାରୁ ସିଏଚଓ ଲୋପାମୁଦ୍ରା କେନ୍ଦ୍ରକୁ ସଫା ସୁତୁରା କରିବାକୁ ପରାମର୍ଶ ଦେଇଥିଲେ। ସଫା କରିବା ବଦଳରେ ଔଷଧ ଗୁଡିକୁ ଫିଙ୍ଗି ଦେଇଥିଲେ । ଏହା ପରେ ଗ୍ରାମର କିଛି ଲୋକ ଔଷଧ ଫିଙ୍ଗା ଯାଇଥିବା ଦେଖି ଭିଡିଓ କରିଥିଲେ। ଏହା ସାମାଜିକ ଗଣମାଧ୍ୟମରେ ଘୁରିବୁଲୁଥିଲା । ଏନେଇ ପ୍ରମେୟରେ ଖବର ପ୍ରକାଶ ପାଇଥିଲା । ଏହି ଘଟଣାକୁ ନେଇ ତଦନ୍ତ ଟିମ ଘଟଣା ସ୍ଥଳରେ ପହଂଚି ତଦନ୍ତ କରୁଥିବା ସମୟରେ ପ୍ରମେୟ ପ୍ରତିନିଧି ଉପସ୍ଥିତ ଥିଲେ। ଏହି ସମୟରେ ତଦନ୍ତକୁ ଭଣ୍ଡୁର କରିବା ପାଇଁ କିଛି ଯୁବକ ସମ୍ବାଦକ ପ୍ରଦୀପ ବାଗଙ୍କୁ ଆକ୍ରମଣ କରିଥିଲେ । ପରେ ପୁଲିସ ଘଟଣା ସ୍ଥଳରେ ପହଂଚି ସାମ୍ବାଦିକ ପ୍ରଦୀପ ବାଗଙ୍କୁ ଉଦ୍ଧାର କରି ଥିଲେ। ଆକ୍ରମଣ କାରୀଙ୍କ ବିରୁଦ୍ଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବାପାଇଁ ସଇଁତଳା ସାମ୍ବାଦିକ ସଂଘ ସଭାପତି ନାରାୟଣ ସାହୁ, ତରୁଣ ବେହେରା, ଅବିନାଶ ନନ୍ଦ,ଅଜିତ ସାହୁ ଓଡିଶା ସାମ୍ବାଦିକ ସାମ୍ବାଦିକ ସଂଘ ରାଜ୍ୟ କାର୍ଯକାରିଣୀ ସଦସ୍ୟ ପ୍ରମୋଦ ସେଲମା,ରଞ୍ଜନ କୁମାର ବାଗ ଗୋକୁଳା ବଗର୍ତି, ରଞ୍ଜନ ବାଗ ସୁଶାନ୍ତ ମେହେର ପ୍ରମୁଖ ସାମ୍ବାଦିକ ଦାବୀ କରିଛନ୍ତି।
