ନୂଆଦିଲ୍ଲୀ,୨୯/୦୪: ରାଜସ୍ଥାନ ରୟାଲ୍ସର ୧୪ ବର୍ଷୀୟ ବୈଭବ ସୂର୍ଯ୍ୟବଂଶୀଙ୍କ ନାମ ଏବେ ସବୁ କ୍ରିକେଟ ଫ୍ୟାନ ଜାଣି ସାରିଛନ୍ତି । ଟି-୨୦ କ୍ରିକେଟରେ ସର୍ବକନିଷ୍ଠ ଦ୍ରୁତତମ ଶତକହାସଲକାରୀ ହୋଇଛନ୍ତି । ଗୁଜରାଟ ଟାଇଟନ୍ସ ବିପକ୍ଷରେ ଧୂଆଁଧାର ଇନିଂସ ଖେଳିଥିଲେ ବୈଭବ । ୩୫ ବଲରେ ଶତକ ହାସଲ କରିଥିଲେ । ସେଥିରେ ୧୧ ଛକା, ୭ ଚୌକା ସାମିଲ ଥିଲା । ମ୍ୟାଚ ପୂର୍ବରୁ ସେ ସକାଳେ ତାଙ୍କ କୋଚଙ୍କ ସହିତ କଥା ହୋଇଥିଲେ । ତାଙ୍କୁ କହିଥିଲେ ଆଜି ଏକ ବଡ଼ ପାଳି ଖେଳିବି । ଆଉ ତାହା ସତ ହେଲା । ଜୟପୁରର ସୱାଇ ମାନସିଂ ଷ୍ଟାଡିୟମରେ ବୈଭବ ବିସ୍ଫୋରଣ ଦେଖିବାକୁ ମିଳିଥିଲା । ଏକ ଐତିହାସିକ ଇନିଂସ ଖେଳିଥିଲେ ବୈଭବ ଯାହାକୁ କେହି ଭୁଲିପାରିବେ ନାହିଁ ।

'ସାର୍ ମୁଁ ମାରିବି'- ଗୁଜରାଟ ବିପକ୍ଷ ମ୍ୟାଚ ପୂର୍ବରୁ ବୈଭବ ସୂର୍ଯ୍ୟବଂଶୀ ତାଙ୍କ କୋଚ୍ ମନୀଷ ଓଝାଙ୍କ ସହିତ କଥା ହୋଇଥିଲେ । ତାଙ୍କୁ କହିଥିଲେ, 'ସାର୍ ଆଜି ମୁଁ ମାରିବି । ବଡ଼ ଇନିଂସ ଖେଳିବି ।' ଉତ୍ତରରେ ତାଙ୍କ କୋଚ୍ କହିଥିଲେ, ମାରିବ, ହେଲେ ୱିକେଟ ହରାଇବନି । ଦେଖିଚାହିଁ ଖେଳିବ ଯସ୍ୱସୀଙ୍କ ସହିତ କଥା ହେବ ।'' 

ଆଉ ତାହା ହିଁ ହେଲା । ଗ୍ରାଉଣ୍ଡରେ ବୈଭବ ବିସ୍ଫୋରଣ ଦେଖିବାକୁ ମିଳିଥିଲା । ଗୁଜରାଟ ବୋଲରଙ୍କୁ ନିର୍ଦ୍ଧୁମ ପିଟିଥିଲେ । ସାମ୍ନାରେ ମହମ୍ମଦ ସିରାଜ, ଇଶାନ୍ତ  ଶର୍ମାଙ୍କ ପରି ଦକ୍ଷ ବୋଲର ଥିଲେ । ହେଲେ କାହାକୁ ଡରି ନଥିଲେ ସୂର୍ଯ୍ୟବଂଶୀ । ଶତକବୀର ବୈଭବ ୧୧ ଛକା ୭ ଚୌକା ମାରିଥିଲେ । ଆଇପିଏଲରେ ପ୍ରଥମ ଭାରତୀୟ ଭାବେ ୨୦୧୦ରେ ଦ୍ରୁତତମ ଶତକ ହାସଲ କରି ୟୁସୁଫ୍ ପଠାନଙ୍କ ରେକର୍ଡକୁ ଭାଙ୍ଗି କିର୍ତ୍ତୀମାନ ସ୍ଥାପନ କରିଛନ୍ତି । ୧୦୧ ରନର ଧୂଆଁଧାର ଇନିଂସ ଖେଳିଥିବା ବୈଭବ ପ୍ଲେୟାର ଅଫ୍ ଦି ମ୍ୟାଚ ବିବେଚିତ ହୋଇଥିଲେ ।

ଅଧିକ ପଢନ୍ତୁ...IPL-2025: ବୈଭବଙ୍କ ଧୂଆଁଧାର ବ୍ୟାଟିଂରେ ଗୁଜରାଟ ଧରାଶୟୀ; ୮ ୱିକେଟରେ ଜିତିଲା ରାଜସ୍ଥାନ

ଅନେକ ପ୍ରତିଭାବାନ ଖେଳାଳି ତିଆରି କରିଥିବା ଆଇପିଏଲରେ ଆଜି ଆଉ ଜଣେ ଯୁବ ବ୍ୟାଟିଂ ବିସ୍ମୟଙ୍କ ଆବିର୍ଭାବ ହୋଇଛି । ସେ ହେଉଛନ୍ତି ବୈଭବ ସୂର୍ଯ୍ୟବଂଶୀ । ମାତ୍ର ୧୪ ବର୍ଷ ୩୨ ଦିନ ବୟସରେ ସେ କନିଷ୍ଠ ଖେଳାଳି ଭାବେ ଦ୍ରୁତତମ ଶତକ ରେକର୍ଡ ଭାଙ୍ଗିଛନ୍ତି । ଭାରତୀୟ କ୍ରିକେଟର ଆଗାମୀ ଭବିଷ୍ୟତ ଭାବେ ଉଭା ହୋଇଛନ୍ତି । ତାଙ୍କ ବ୍ୟାଂଟି ବଳରେ ରାଜସ୍ଥାନ ରୟାଲ୍ସ ବିଜୟ ଧାରାକୁ ଫେରିଛି । ଦଳର ପ୍ଲେ ଅଫ୍ ଆଶା ଉଜ୍ଜୀବିତ ହୋଇଛି ।