ତେହେରାନ : ଆମେରିକା ସହିତ ଉଚ୍ଚସ୍ତରୀୟ ଶାନ୍ତି ଆଲୋଚନା ବନ୍ଦ ହେବା ମଧ୍ୟରେ ଇରାନ ଏକ ବଡ଼ ଡିଜିଟାଲ୍ ଏମର୍ଜେନ୍ସି ପରିସ୍ଥିତିର ସମ୍ମୁଖୀନ ହେଉଛି। ଫେବୃଆରୀ ଶେଷ ଭାଗରେ ଆରମ୍ଭ ହୋଇ ଥିବା ଏକ ଦେଶବ୍ୟାପୀ ଇଣ୍ଟରନେଟ୍ ବ୍ଲାକଆଉଟ୍ ଏବେ ଦ୍ଵିତୀୟ ମାସରେ ପ୍ରବେଶ କରୁଛି। ଅନ୍ତର୍ଜାତୀୟ ପର୍ଯ୍ୟବେକ୍ଷଣ ସଂଗଠନ ନେଟବ୍ଲକ୍ସ ଏହାକୁ ଏକ ସାର୍ବଭୌମ ଦେଶରେ ଲାଗୁ ହୋଇଥିବା ସବୁଠାରୁ ଲମ୍ବା ଦେଶବ୍ୟାପୀ ଇଣ୍ଟରନେଟ୍ ବନ୍ଦ ଘୋଷଣା କରିଛି। ନେଟବ୍ଲକ୍ସ ଅନୁଯାୟୀ, ବିସ୍ତାରିତ ସେନ୍ସରସିପର ମାନବିକ ଏବଂ ଆର୍ଥିକ ପ୍ରଭାବ ବଢୁଛି। ଏହା କନେକ୍ଟେଡ୍ ସମାଜରେ ସଟଡାଉନର ନୂଆ ବିଶ୍ୱ ରେକର୍ଡ।
କହି ରଖୁଛୁ ଯେ, ଇରାନୀ ଶାସନ ଆମେରିକା ଓ ଇସ୍ରାଏଲର ସାମରିକ ଆକ୍ରମଣରୁ ତୁରନ୍ତ ପରେ ଫେବ୍ରୁଆରୀର ଶେଷରେ ଏହି ବ୍ଲାକଆଉଟ୍ ଲାଗୁ କରିଥିଲା। ଏହା ପର ଠାରୁ, ଦେଶର ୯ କୋଟିରୁ ଅଧିକ ଲୋକଙ୍କ ପାଇଁ ବାହ୍ୟ ଡିଜିଟାଲ୍ ପ୍ରବେଶ ପ୍ରାୟ ସମ୍ପୂର୍ଣ୍ଣ ଭାବରେ ପ୍ରତିବନ୍ଧିତ ହୋଇଛି। ଏହି କାର୍ଯ୍ୟକ୍ରମ ଜାନୁଆରୀରେ ସରକାର ବିରୋଧୀ ପ୍ରତିବାଦ ସମୟରେ ଲଗାଯାଇ ଥିବା ଦୀର୍ଘକାଳୀନ ଇଣ୍ଟରନେଟ୍ ବନ୍ଦକୁ ପ୍ରତିଫଳିତ କରେ।
ନେଟବ୍ଲକ୍ସର ରିପୋର୍ଟ ଅନୁଯାୟୀ, ଇରାନରେ ଗତ ୫୭ ଦିନ ଧରି ଇଣ୍ଟରନେଟ୍ ସମ୍ପୂର୍ଣ୍ଣ ବନ୍ଦ ରହିଛି। ଏହା ପୂର୍ବର ରେକର୍ଡ ସୁଦାନ ନାମରେ ଥିଲା। ଯେଉଁଠାରେ ୨୦୨୧ ମସିହାରେ ପ୍ରାୟ ୩୫-୩୬ ଦିନ ପାଇଁ ଇଣ୍ଟରନେଟ୍ ବନ୍ଦ ରହି ଥିଲା। ମିଆଁମାର ଏବଂ ଇଥିଓପିଆରେ କିଛି ଅଞ୍ଚଳରେ ମାସ ମାସ ଧରି ବନ୍ଦ ରହି ଥିଲା, କିନ୍ତୁ ପୂରା ଦେଶବ୍ୟାପୀ ନିରନ୍ତର ଏବଂ ଏକକାଳୀନ ସଟଡାଉନ ମାମଲାରେ ଇରାନ ଏବେ ବିଶ୍ୱରେ ପ୍ରଥମ ସ୍ଥାନରେ ଅଛି। ଇରାନର ପୂର୍ବ ରେକର୍ଡ ୨୦୧୯ ମସିହାରେ ହୋଇ ଥିଲା, ଯେତେବେଳେ ଇଣ୍ଟରନେଟ୍ କେବଳ ସାତ ଦିନ ପାଇଁ ବନ୍ଦ ହୋଇ ଥିଲା। ଏଥର, ବ୍ଲାକଆଉଟ୍ ବହୁତ ଗୁରୁତର ଏବଂ ଦୀର୍ଘକାଳୀନ ପ୍ରମାଣିତ ହେଉଛି। ଅନ୍ୟପକ୍ଷରେ, ବିଶେଷଜ୍ଞମାନେ ବିଶ୍ୱାସ କରନ୍ତି ଯେ, ଯଦି ଏହି ବନ୍ଦ ଅଧିକ ସମୟ ପାଇଁ ଜାରି ରହେ, ତେବେ ଏହା ଇରାନର ଅର୍ଥନୀତି ଏବଂ ସାମାଜିକ ଗଠନ ଉପରେ ଗମ୍ଭୀର ପ୍ରଭାବ ପକାଇ ପାରେ।
ଉଲ୍ଲେଖନୀୟ ଯେ, ଇରାନରେ ଇରାନରେ ସମ୍ପୂର୍ଣ୍ଣ ଇଣ୍ଟରନେଟ୍ ବନ୍ଦ ହେବାର ଦ୍ଵିତୀୟ ମାସ ନିକଟତର ହେଉଛି, ହେଲେ ତେହେରାନ ସରକାର ଦୃଢ଼ ଏକତା ପ୍ରଦର୍ଶନ କରୁଛନ୍ତି। ଅଧିକାରୀମାନେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଆଭ୍ୟନ୍ତରୀଣ ବିଭାଜନ ଏବଂ ରିହାତି ଦାବିକୁ ସ୍ପଷ୍ଟ ଭାବରେ ପ୍ରତ୍ୟାଖ୍ୟାନ କରିଛନ୍ତି। ଟ୍ରମ୍ପ ସମ୍ପ୍ରତି କହିଛନ୍ତି ଯେ, ସେ ଇରାନ ସହିତ ଚୁକ୍ତି କରିବା ପାଇଁ କୌଣସି ତରବର ନୁହଁନ୍ତି। ବିନା ପ୍ରମାଣରେ ଦାବି କରିଛନ୍ତି ଯେ, ଇରାନ ନେତୃତ୍ୱ ବିଭାଜିତ। ଇରାନୀ ଅଧିକାରୀମାନେ ଏହାକୁ ଖଣ୍ଡନ କରି ସରକାରୀ ମିଡ଼ିଆର ମାଧ୍ୟମରେ ସମନ୍ୱିତ ବିବୃତ୍ତି ଜାରି କରିଛନ୍ତି।
ଆହୁରି ମଧ୍ୟ ପଢନ୍ତୁ : ୱାଶିଂଟନର ଯେଉଁ ହୋଟେଲରେ ହୋଇଥିଲା ଫାୟାରିଂ , ୪୫ ବର୍ଷ ପୂର୍ବେ ପୂର୍ବତନ ରାଷ୍ଟ୍ରପତିଙ୍କୁ ସେଠାରେ କରାଯାଇ ଥିଲା ଗୁଳି
