ନୂଆଦିଲ୍ଲୀ: ଆମେରିକା ଏବଂ ଇରାନ ମଧ୍ୟରେ ଯୁଦ୍ଧ ବନ୍ଦ ହୋଇଯାଇଥିବା ସୂଚନା ରହିଛି । ଉଭୟ ଦେଶ ଏକ ଚୁକ୍ତି ଘୋଷଣା କରିଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋସିଆଲ ମିଡିଆରେ ଲେଖିଛନ୍ତି ଯେ, ଇରାନ ସହିତ ଏକ ଚୁକ୍ତି ହୋଇଛି। ଏହା ପରେ ଇରାନ ମଧ୍ୟ ଏକ ବିବୃତ୍ତି ଜାରି କରିଛି ଯେ ଆମେରିକା ସହିତ କିଛି ମାସର ଦୀର୍ଘ ଏବଂ କଷ୍ଟକର ଆଲୋଚନା ପରେ, ଉଭୟ ଦେଶ ଏକ ଯୁଦ୍ଧବିରତି ବୁଝାମଣା ପତ୍ରକୁ ଚୂଡ଼ାନ୍ତ କରିଛନ୍ତି। ଏହି ଘୋଷଣା ପରେ, ମଧ୍ୟପ୍ରାଚ୍ୟ ଅଞ୍ଚଳରେ ଶାନ୍ତି ପାଇଁ ଆଶା ପ୍ରକାଶ କରାଯାଉଛି। ହେଲେ ଅନ୍ୟପକ୍ଷରେ ଇସ୍ରାଏଲ କିନ୍ତୁ ଏହି ନିଷ୍ପତ୍ତିରେ ନାରାଜ ରହିଛି। ଏହି ସମୟରେ ଜଣେ ଦକ୍ଷିଣପନ୍ଥୀ ଇସ୍ରାଏଲୀ ନେତା ତଥା ନେତାନ୍ୟାହୁ ସରକାରଙ୍କ ମନ୍ତ୍ରୀ ବେନ୍ ଗ୍ବେର ଏକ ବିବୃତ୍ତି ଜାରି କରିଛନ୍ତି, ଯାହା ଏହି ଅଞ୍ଚଳର ଦେଶ ଗୁଡ଼ିକରେ ପୁଣି ଉତ୍ତେଜନା ବୃଦ୍ଧିର ଆଶଙ୍କା ବଢାଇଛି।
ଯିହୁଦୀ ଲୋକଙ୍କ ପ୍ରତି ଆମର କର୍ତ୍ତବ୍ୟ : ବେନ୍ ଗ୍ବେର
ଇସ୍ରାଏଲୀ ମନ୍ତ୍ରୀ ବେନ୍ ଗ୍ବେର କହିଛନ୍ତି, "ଟ୍ରମ୍ପ୍ ଙ୍କ ଚୁକ୍ତି ଆମ ପାଇଁ ପ୍ରଯୁଜ୍ୟ ନୁହେଁ। ଇସ୍ରାଏଲ ଆମେରିକାର ଗୋଲାମ ନୁହେଁ, ଏବଂ ଆମେ ଏକ ସ୍ୱାଧୀନ ଏବଂ ସାର୍ବଭୌମ ରାଷ୍ଟ୍ର। ଆମର କର୍ତ୍ତବ୍ୟ ହେଉଛି ଇସ୍ରାଏଲର ନାଗରିକ, ଆଇଡିଏଫ୍ ର ସୈନିକ ଏବଂ ଯିହୁଦୀ ଲୋକଙ୍କ ପ୍ରତି ସମର୍ପଣ। ଏହା ବ୍ୟତୀତ, ଇସ୍ରାଏଲୀ ମାଟିରେ ହଜାର ହଜାର ବର୍ଷର ନିର୍ବାସନ ସମୟରେ ନିର୍ଯାତିତ ଏବଂ ହତ୍ୟା ହୋଇଥିବା ଯିହୁଦୀ ମାନଙ୍କ ପ୍ରତି ଆମର ଏକ ଐତିହାସିକ କର୍ତ୍ତବ୍ୟ ଅଛି। ଯେତେବେଳେ ଆମେ ଇସ୍ରାଏଲର ସୁରକ୍ଷାର ମୂଲ୍ୟରେ ଅନ୍ତର୍ଜାତୀୟ ଚାପର ସମ୍ମୁଖୀନ ହୋଇଛୁ, ଆମେ ଏକ ଭାରୀ ମୂଲ୍ୟ ଦେଇଛୁ। ଓସ୍ଲୋ ଚୁକ୍ତିରେ ଏହା ହୋଇଥିଲା,୨୦୦୬ ଲେବାନନ୍ ଚୁକ୍ତିରେ ଏବଂ ଗାଜାରେ ନିୟନ୍ତ୍ରଣ ଜାହିର କରିବାର ପ୍ରତ୍ୟେକ ପ୍ରୟାସରେ ଏହା ଘଟିଥିଲା, ଯାହା ପରେ ଆମ ପାଇଁ ଏକ ପ୍ରମୁଖ ସମସ୍ୟା ହୋଇଯାଇଥିଲା।"
ଆମେ ଏହି ଚୁକ୍ତିରେ ସାମିଲ ନୁହଁ…
ବେନ୍ ଗ୍ବେର କହିଛନ୍ତି,"ଆମେ ଆମେରିକାକୁ ଭଲ ପାଉ ଏବଂ ରାଷ୍ଟ୍ରପତି ଟ୍ରମ୍ପଙ୍କ ପ୍ରତି କୃତଜ୍ଞ। ତଥାପି, ଇସ୍ରାଏଲ କୌଣସି ଅସ୍ଥିର ଦେଶ ନୁହେଁ। ମୁଁ ସବୁବେଳେ ପ୍ରଧାନମନ୍ତ୍ରୀଙ୍କୁ ଏହା କହେ, ଏବଂ ପ୍ରତ୍ୟେକ ଗୁରୁତ୍ୱପୂର୍ଣ୍ଣ ଐତିହାସିକ ମୋଡ଼ରେ ବନ୍ଦ ଦ୍ୱାର ପଛରେ ମଧ୍ୟ ଏହାକୁ ପୁନରାବୃତ୍ତି କରେ । ଐତିହାସିକ ମୁହୂର୍ତ୍ତଗୁଡ଼ିକ ପାଇଁ ଐତିହାସିକ ନିଷ୍ପତ୍ତି ଆବଶ୍ୟକ। ମୋର ସ୍ଥିତି ସ୍ପଷ୍ଟ । ଆମେ ଏହି ଚୁକ୍ତିର ଅଂଶ ନୁହଁ କାରଣ ଏହା ଆମର ସୁରକ୍ଷାର ଗ୍ୟାରେଣ୍ଟି ଦିଏ ନାହିଁ ଏବଂ କୌଣସି ପ୍ରକାରେ ଆମ ପାଇଁ ପ୍ରଯୁଜ୍ୟ ହୁଏ ନାହିଁ। ଆମେ ହିଜବୋଲାର ସମ୍ପୂର୍ଣ୍ଣ ବିଲୋପ ବ୍ୟତୀତ ଅନ୍ୟ କୌଣସି ବିଷୟରେ ସାଲିସ କରିପାରିବୁ ନାହିଁ । ଆମର ଯୋଦ୍ଧାମାନେ ଯେଉଁ ଅଞ୍ଚଳ ଗୁଡ଼ିକୁ କବଜା କରିଛନ୍ତି ଏବଂ ଆତଙ୍କବାଦୀ ଭିତ୍ତିଭୂମିରୁ ମୁକ୍ତ କରିଛନ୍ତି, ଆମେ ସେହି ଅଞ୍ଚଳରୁ ପ୍ରତ୍ୟାହାର କରିବା ଉଚିତ୍ ନୁହେଁ । ଆମେ ଏପରି ପରିସ୍ଥିତିକୁ ଫେରିବା ଉଚିତ୍ ନୁହେଁ ଯେଉଁଠାରେ ହଜାର ହଜାର ଆତଙ୍କବାଦୀ ଉତ୍ତର ବସତିର ସୀମାରେ ବସିଛନ୍ତି; ଏବଂ ନିଶ୍ଚିତ ଭାବରେ, ଇସ୍ରାଏଲ ଉପରେ ଆକ୍ରମଣର ସାମ୍ନାରେ ଆମେ ଗୋଟିଏ ମୁହୂର୍ତ୍ତ ପାଇଁ ମଧ୍ୟ ନୀରବ ରହିବା ଉଚିତ୍ ନୁହେଁ।"
ଏହା ସହ ପଢନ୍ତୁ : ଆମେରିକା ସହ ଚୁକ୍ତି ବୁଝାମଣା ପରେ ତୁର୍କୀ-ଇରାକ ଏବଂ ଇଜିପ୍ଟକୁ ଫୋନ କରି ଧନ୍ୟବାଦ ଜଣାଇଲା ଇରାନ, ଟ୍ରମ୍ପଙ୍କ ସହ କଣ ହୋଇଛି କି ଡିଲ୍ ?...
