ନୂଆଦିଲ୍ଲୀ, ୨୫।୬: ଇରାନ ବିରୋଧରେ ଚାଲିଥିବା ସାମରିକ ଅଭିଯାନ ମଧ୍ୟରେ ଆମେରିକା ଏବଂ ତା’ର ପାରମ୍ପରିକ ୟୁରୋପୀୟ ସହଯୋଗୀ ଦେଶଗୁଡ଼ିକ ମଧ୍ୟରେ ଥିବା ବିବାଦ ଏବେ ପଦାକୁ ଆସିଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନାଟୋ ମହାସଚିବ ମାର୍କ ରୁଟେଙ୍କ ସହ ହୋଇଥିବା ଏକ ଉଚ୍ଚସ୍ତରୀୟ ବୈଠକରେ ୟୁରୋପୀୟ ଦେଶଗୁଡ଼ିକ ଉପରେ ପ୍ରବଳ ଅସନ୍ତୋଷ ପ୍ରକାଶ କରିଛନ୍ତି । ଯୁଦ୍ଧ ସମୟରେ ଆଶାନୁରୂପ ସହଯୋଗ ମିଳିନଥିବା ଅଭିଯୋଗ କରି ଟ୍ରମ୍ପ ସିଧାସଳଖ ନାଟୋ ମୁଖ୍ୟଙ୍କ ସହ ମୁହାଁମୁହିଁ ହୋଇଛନ୍ତି ।
ୟୁରୋପୀୟ ସହଯୋଗୀଙ୍କ ଉପରେ କ୍ଷୁବ୍ଧ ଟ୍ରମ୍ପ: "ଆମକୁ ନିରାଶ କରାଯାଇଛି"
ବୈଠକ ସମୟରେ ରାଷ୍ଟ୍ରପତି ଟ୍ରମ୍ପ ବ୍ରିଟେନ, ଫ୍ରାନ୍ସ, ଜର୍ମାନୀ, ଇଟାଲୀ ଏବଂ ସ୍ପେନ୍ ଭଳି ପ୍ରମୁଖ ଶକ୍ତିଶାଳୀ ଦେଶଗୁଡ଼ିକର ନାମ ନେଇ ସେମାନଙ୍କ ଆଭିମୁଖ୍ୟକୁ ସମାଲୋଚନା କରିଛନ୍ତି । ଟ୍ରମ୍ପ କହିଛନ୍ତି, "ଏହି ସଂକଟ ସମୟରେ ଯେଉଁ ସ୍ତରର ସମର୍ଥନ ମିଳିବା କଥା, ତାହା ମିଳିଲା ନାହିଁ । ଆମକୁ ସମ୍ପୂର୍ଣ୍ଣ ଭାବେ ନିରାଶ କରାଯାଇଛି । ଯଦି ଆମେରିକା ସ୍ଥାନରେ ଅନ୍ୟ କୌଣସି ଦେଶ ଥାଆନ୍ତା, ତେବେ ହୋଇପାରେ ଆଜି ଆମେ ଏହି ବୈଠକ କରିବା ସ୍ଥିତିରେ ମଧ୍ୟ ନଥାନ୍ତୁ ।" ଟ୍ରମ୍ପଙ୍କ କହିବା ଅନୁଯାୟୀ, ଇରାନ ବିରୋଧୀ ସାମରିକ କାର୍ଯ୍ୟାନୁଷ୍ଠାନ ବେଳେ ୟୁରୋପୀୟ ଦେଶଗୁଡ଼ିକ ଖୋଲାଖୋଲି ଭାବେ ଆମେରିକା ସହ ଛିଡ଼ା ହେବାର ଥିଲା, ଯାହାଦ୍ୱାରା ସମଗ୍ର ବିଶ୍ୱକୁ ଏକ ଶକ୍ତ ବାର୍ତ୍ତା ଯାଇପାରିଥାନ୍ତା । ତେବେ ସେ ନାଟୋ ପ୍ରମୁଖ ମାର୍କ ରୁଟେଙ୍କ ପ୍ରତି ସମ୍ମାନ ଜଣାଇବା ସହ ଆଗକୁ ଆଲୋଚନା ଜାରି ରହିବ ବୋଲି କହିଛନ୍ତି, କିନ୍ତୁ ଆମେରିକା ଯେ ସହଯୋଗୀଙ୍କ ଭୂମିକାରେ ସନ୍ତୁଷ୍ଟ ନାହିଁ, ତାହା ସ୍ପଷ୍ଟ କରିଦେଇଛନ୍ତି ।
ଏହା ବି ପଢ଼ନ୍ତୁ... Robots Replace Workers: ୧୦୦୦ କର୍ମଚାରୀଙ୍କୁ ତଡ଼ି ୫୦ ରୋବୋ ନିଯୁକ୍ତ କଲା କମ୍ପାନି, ଶ୍ରମିକ ସଂଗଠନଙ୍କ ସମାଲୋଚନା
ପରଦା ପଛର ସହଯୋଗକୁ ନେଇ ନାଟୋ ମୁଖ୍ୟଙ୍କ ସଫେଇ:
ଆମେରିକା ରାଷ୍ଟ୍ରପତିଙ୍କ ଏଭଳି ଗୁରୁତର ଅଭିଯୋଗ ପରେ ନାଟୋ ମହାସଚିବ ମାର୍କ ରୁଟେ ୟୁରୋପୀୟ ଦେଶଗୁଡ଼ିକୁ ସୁରକ୍ଷା ଦେଇ କହିଛନ୍ତି ଯେ, ଇରାନର ପରମାଣୁ କ୍ଷମତାକୁ ଧ୍ୱଂସ କରିବା ଏହି ଅଭିଯାନର ମୁଖ୍ୟ ଲକ୍ଷ୍ୟ ଥିଲା ଏବଂ ଏହାର ରଣନୀତିକ ସଫଳତାକୁ ଜି-୭ ଦେଶର ନେତାମାନେ ମଧ୍ୟ ସ୍ୱୀକାର କରିଛନ୍ତି । ୟୁରୋପୀୟ ଦେଶଗୁଡ଼ିକ ସମ୍ପୂର୍ଣ୍ଣ ସହଯୋଗ କରିଥିବା ଦର୍ଶାଇ ରୁଟେ କିଛି ଗୁରୁତ୍ୱପୂର୍ଣ୍ଣ ତଥ୍ୟ ରଖିଛନ୍ତି, ଯୁଦ୍ଧ ଚାଲିଥିବା ୬ ସପ୍ତାହ ମଧ୍ୟରେ ପ୍ରାୟ ୪ ରୁ ୫ ହଜାର ଆମେରିକୀୟ ସାମରିକ ବିମାନ ୟୁରୋପର ବିଭିନ୍ନ ଏୟାରବେସ୍ରୁ ଉଡ଼ାଣ ଭରିଥିଲେ । ଅନେକ ୟୁରୋପୀୟ ଦେଶ ନିଜର ସାମରିକ ଘାଟି, ବିମାନବନ୍ଦର ଏବଂ ଲଜିଷ୍ଟିକ୍ସ ସୁବିଧା ଆମେରିକା ସେନାକୁ ଯୋଗାଇ ଦେଇଥିଲେ । ରୋମାନିଆର ରାଜଧାନୀ ବୁଖାରେଷ୍ଟ ସ୍ଥିତ ବିମାନବନ୍ଦରକୁ ସମ୍ପୂର୍ଣ୍ଣ ଭାବେ ସାମରିକ ଆବଶ୍ୟକତା ଅନୁଯାୟୀ ବ୍ୟବହାର କରାଯାଇଥିଲା । ନାଟୋ ମୁଖ୍ୟ ସ୍ୱୀକାର କରିଛନ୍ତି ଯେ, କିଛି ବିଷୟରେ ମତଭେଦ ଓ ଚିନ୍ତା ରହିଥିଲା, କିନ୍ତୁ ବିଶ୍ୱାସର ସହ ୟୁରୋପୀୟ ସହଯୋଗୀମାନେ ଆମେରିକାକୁ ପରଦା ପଛରେ ରହି ବଡ଼ ସାହାଯ୍ୟ କରିଛନ୍ତି ।
ଆଗକୁ କ’ଣ ହେବ ?
ଏହି ଦ୍ୱିପାକ୍ଷିକ ଆଲୋଚନାରୁ ସ୍ପଷ୍ଟ ଜଣାପଡ଼ୁଛି ଯେ, ଇରାନ ଯୁଦ୍ଧ ସରିବା ପରେ ମଧ୍ୟ ଆମେରିକା ଏବଂ ନାଟୋ ସହଯୋଗୀଙ୍କ ମଧ୍ୟରେ ସମ୍ପର୍କ ସହଜ ହୋଇନାହିଁ । ଟ୍ରମ୍ପ ଯେଉଁଠି ଅଧିକ ସକ୍ରିୟ ଏବଂ ପ୍ରତ୍ୟକ୍ଷ ସାମରିକ ସହଯୋଗ ଚାହୁଁଥିଲେ, ସେଠାରେ ୟୁରୋପୀୟ ଦେଶଗୁଡ଼ିକ କେବଳ ପରୋକ୍ଷ ସହାୟତା ମଧ୍ୟରେ ସୀମିତ ରହିଲେ । ଆଗାମୀ ଦିନରେ ଏହି ବିବାଦ ନାଟୋ ସଂଗଠନର ଆଭ୍ୟନ୍ତରୀଣ ସମୀକରଣକୁ କିଭଳି ପ୍ରଭାବିତ କରୁଛି, ତାହା ଉପରେ ସାରା ବିଶ୍ୱର ନଜର ରହିବ ।
