ଭୁବନେଶ୍ୱର ୨୫/୦୪: ପ୍ରାୟ ଶିଶୁ ପାଟି ଖୋଲି ଶୋଇବାର ଦେଖିବାକୁ ମିଳିଥାଏ । ଏହାକୁ ନେଇ ଅନେକ ବାପାମା’ଙ୍କ ମନରେ ପ୍ରଶ୍ନ ଉଠୁଥାଇପାରେ । ଚାଲନ୍ତୁ ଜାଣିବା ଶିଶୁ ପାଟି ଖୋଲି ଶୋଇବା କେତେ କ୍ଷତିକାରକ? ପିଲା ହୁଅନ୍ତୁ ଅବା ବଡ଼ ସମସ୍ତଙ୍କର ଶୋଇବା ଶୈଳୀ ଭିନ୍ନ । କିଛି ବଡ଼ ଲୋକ ଶୋଇବା ସମୟରେ ପାଟି ଖୋଲା ରଖିଥାନ୍ତି । ସେହିପରି କିଛି ପିଲା ମଧ୍ୟ ପାଟି ଖୋଲି ଶୋଇଥାନ୍ତି, ଯାହା ଆଦୌ ଠିକ୍ ନୁହେଁ ।
କାରଣ :
ଶିଶୁ ପାଟି ଖୋଲି ଶୋଇବା ଯଦିଓ ସେତେଟା କ୍ଷତିକାରକ ନୁହେଁ । କିନ୍ତୁ ଏହା ଶିଶୁର ସ୍ୱାସ୍ଥ୍ୟ ପାଇଁ ସମସ୍ୟା ସୃଷ୍ଟି କରିପାରେ । ଏହି ସମସ୍ୟା ବଡ଼ ହେବା ପରେ ଆରମ୍ଭ ହୋଇଥାଏ । ଶିଶୁ ପାଟି ଖୋଲି ଶୋଇବା ଦ୍ୱାରା ପାଟିରେ ଶୁଷ୍କତା ବଢିଥାଏ । ଫଳରେ ସଂକ୍ରମଣ ହେବାର ଆଶଙ୍କା ରହିଥାଏ । ଏହାସହିତ ପ୍ରାକୃତିକ ଭାବେ ପାଟିକୁ ସଫା କରୁଥିବା ଲାଳର ପ୍ରଭାବ କମ୍ ହୋଇଥାଏ । ଫଳରେ ଶିଶୁଠାରେ ମାଢି ଓ କ୍ୟାନିଟି ସମସ୍ୟା ଦେଖାଦେଇଥାଏ । ଶୋଇବା ସମୟରେ ପାଟି ପଟେ ନିଶ୍ୱାସ ନେବା ଦ୍ୱାରା ନାକରେ ଠିକ୍ ଭାବେ ନିଶ୍ୱାସ ନେଇପାରେନା । ଏହା ମୁହଁର ବିକାଶକୁ ପ୍ରଭାବିତ କରେ । ପାଟିପଟେ ନିଶ୍ୱାସ ନେବା ଦ୍ୱାରା ଶିଶୁ ଭଲ ନିଦରେ ଶୋଇପାରି ନଥାଏ । ତେଣୁ ଶିଶୁ ପାଟି ଖୋଲି ଶୋଇଥାଏ, ଯାହା ପିଲାର ବିକାଶକୁ ପ୍ରଭାବିତ କରିଥାଏ ।
କ'ଣ କରିବେ?
-ଯଦି ଶିଶୁ ସବୁବେଳେ ପାଟି ଖୋଲି ଶୋଉଥାଏ, ତେବେ ଏହା କୌଣସି ରୋଗର ସଙ୍କେତ ହୋଇପାରେ । ତେଣୁ ଏହାକୁ ନିୟନ୍ତ୍ରଣ କରିବା ଜରୁରି ।
-ନାକରେ ନିଶ୍ୱାସଜନିତ ସମସ୍ୟା ଅଛି କି ନାହିଁ ଦେଖିବା ଆବଶ୍ୟକ । ତେଣୁ ନାକକୁ ସଫା ରଖିବା ପାଇଁ ଡାକ୍ତରଙ୍କ ପରାମର୍ଶ କ୍ରମେ ନାଜାଲ୍ ସ୍ପ୍ରେ ବ୍ୟବହାର କରିପାରିବେ । ପବନର ଆର୍ଦ୍ରତା ବଜାୟ ରଖିବା ସହ ନାକ ରାସ୍ତାକୁ ସହଜ କରିବା ପାଇଁ ହ୍ୟୁମିଡିଫାୟାର ବ୍ୟବହାର କରିପାରିବେ । ପିଲାକୁ ଶୁଆଇବା ସମୟରେ ମୁଣ୍ଡକୁ ସାମାନ୍ୟ ଉପରକୁ ରଖିବାକୁ ପ୍ରୟାସ କରନ୍ତୁ । ଏପରି କରିବା ଦ୍ୱାରା ନାକରୁ ପାଣି ବାହାରିବା ସହଜ ହୋଇଥାଏ ।
-ଆଲର୍ଜି ଓ ଜ୍ୱଳନଠାରୁ ଦୂରେଇ ରଖନ୍ତୁ । ଶିଶୁ ଶୋଉଥିବା ଘରକୁ ଧୂଆଁ, ଧୂଳି-ମାଟିଠାରୁ ଦୂରେଇ ରଖନ୍ତୁ । ନଚେତ୍ ଶିଶୁକୁ ଛିଙ୍କ, କାଶ ଓ ଆଖିରୁ ପାଣି ଆସିବା ପରି ଆଲର୍ଜି ସମସ୍ୟା ଦେଖାଦେଇପାରେ ।
-ନିଶ୍ୱାସ ନେବା ଶୈଳୀକୁ ଲକ୍ଷ୍ୟ କରନ୍ତୁ । ଯଦି ପିଲା ସବୁବେଳେ ପାଟି ଖୋଲି ଶୋଉଛି । ଦିନରେ ମଧ୍ୟ ପାଟିରେ ନିଶ୍ୱାସ ନେଉଛି, ତେବେ ନାକ ବା ତାଳୁ ସମସ୍ୟା ଥାଇପାରେ । ଡାକ୍ତର ପରାମର୍ଶ କରିନେବା ଉଚିତ୍ ।
