ନୂଆଦିଲ୍ଲୀ, ୨୭।୬: ଇରାନ ଏବଂ ଇସ୍ରାଏଲ ମଧ୍ୟରେ ଯୁଦ୍ଧବିରତି ଘୋଷଣା କରାଯାଇଛି । ଏହି ସମୟରେ ଇସ୍ରାଏଲ ଗାଜାକୁ ଟାର୍ଗେଟ କରିବା ଆରମ୍ଭ କରିଛି । ଯାହା ପରେ ସେଠାରେ ଆତଙ୍କ ଖେଳିଯାଇଛି । ଇସ୍ରାଏଲ ଲଗାତାର ଗାଜା ଉପରେ ଆକ୍ରମଣ କରୁଛି । ଗୁରୁବାର ଇସ୍ରାଏଲ କେନ୍ଦ୍ରୀୟ ଗାଜା ଉପରେ ଆକ୍ରମଣ କରିଥିଲା, ଯେଉଁଥିରେ ୧୮ ଜଣଙ୍କର ମୃତ୍ୟୁ ହୋଇଛି । ହସ୍ପିଟାଲର ଜଣେ ଅଧିକାରୀମାନେ ଏହି ଆକ୍ରମଣ ବିଷୟରେ ସୂଚନା ଦେଇଥିଲେ । ଆକ୍ରମଣ ପରେ ସେଠାରେ ଆତଙ୍କ ସୃଷ୍ଟି ହୋଇଥିଲା ଏବଂ ଲୋକମାନେ ଜୀବନ ବଞ୍ଚାଇବା ପାଇଁ ଏଣେତେଣେ ଦୌଡ଼ିବାକୁ ଲାଗିଥିଲେ ।
ପ୍ରତ୍ୟକ୍ଷଦର୍ଶୀଙ୍କ କହିବାନୁସାରେ, ଆକ୍ରମଣ ସମୟରେ ଲୋକ ଭିଡ଼ ହୋଇ ଫିଲିସ୍ତିନୀ ପୋଲିସଠାରୁ ଅଟା ବସ୍ତା ନେଉଥିଲେ, ଯାହାକୁ ରିଲିଫ୍ ସାମଗ୍ରୀ ଲୁଟୁଥିବା ଦଳଙ୍କଠାରୁ ଜବତ କରାଯାଇଥିଲା । ପ୍ରାୟ ଅଢ଼େଇ ମାସ ଧରି ଗାଜାକୁ ସମସ୍ତ ଖାଦ୍ୟ ସହାୟତା ବନ୍ଦ କରିବା ପରେ, ଇସ୍ରାଏଲ ମେ ମାସର ମଧ୍ୟଭାଗରୁ କମ୍ ପରିମାଣର ଯୋଗାଣକୁ ଅନୁମତି ଦେଇଛି । ସଂଯୁକ୍ତ ରାଷ୍ଟ୍ର ରିଲିଫ୍ ଖାଦ୍ୟ ସାମଗ୍ରୀ ବଣ୍ଟନ କରିବା ପରଠୁ ରିଲିଫ୍ ସାମଗ୍ରୀ ଲୁଟୁଥିବା ଦଳଙ୍କ ଯୋଜନା ଫେଲ୍ ମାରିଛି ।
୫୦ ହଜାର ଟପିଲାଣି ମୃତ୍ୟୁସଂଖ୍ୟା
ଗାଜା ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ଗାଜା ଏବଂ ଇସ୍ରାଏଲ ମଧ୍ୟରେ ହୋଇଥିବା ଏହି ଯୁଦ୍ଧରେ ୫୦ ହଜାରରୁ ଅଧିକ ଲୋକଙ୍କ ମୃତ୍ୟୁ ହୋଇଛି । ଏଥିମଧ୍ୟରୁ ଅଧିକାଂଶ ମହିଳା ଏବଂ ଶିଶୁ ଥିବାବେଳେ ୧ ଲକ୍ଷରୁ ଅଧିକ ଲୋକ ଆହତ ହୋଇଛନ୍ତି । ଗତ ୨୪ ଘଣ୍ଟାରେ ମୋଟ୍ ୭୨ ଜଣଙ୍କ ମୃତ୍ୟୁ ହୋଇଛି । ଗାଜା ଗଣମାଧ୍ୟମର ରିପୋର୍ଟ ଅନୁଯାୟୀ, ଚଳିତ ମାସ ମୋଟ୍ ୫୪୯ ପାଲେଷ୍ଟୀନିୟଙ୍କ ମୃତ୍ୟୁ ହୋଇଥିବା ବେଳେ ୪ ହଜାର ୬୬ ଆହତ ହୋଇଛନ୍ତି । ଇସ୍ରାଏଲ ଦାବି କରିଛି ଯେ, ସେ ହଜାର ହଜାର ଆତଙ୍କବାଦୀଙ୍କୁ ହତ୍ୟା କରିଛି ।
ହମାସ ଆକ୍ରମଣ ପରେ ଆରମ୍ଭ ହୋଇଥିଲା ଯୁଦ୍ଧ
୭ ଅକ୍ଟୋବର ୨୦୨୩ରେ ଦକ୍ଷିଣ ଇସ୍ରାଏଲ ଉପରେ ଆକ୍ରମଣ ପରେ ଇସ୍ରାଏଲ ହମାସକୁ ଧ୍ୱଂସ କରିବାକୁ ଦୃଢ଼ ନିଷ୍ପତ୍ତି ନେଇଛି । ହମାସ ଆତଙ୍କବାଦୀମାନେ ଇସ୍ରାଏଲ ଉପରେ ଆକ୍ରମଣ କରି ପ୍ରାୟ ୧୨୦୦ ଲୋକଙ୍କୁ ହତ୍ୟା କରିଥିଲେ ଏବଂ ୨୫୧ ଜଣଙ୍କୁ ବନ୍ଧକ କରିଥିଲେ । ଏହି ଘଟଣା ପରଠାରୁ, ଇସ୍ରାଏଲ ଗାଜାରେ ଲଗାତାର ବିନାଶ ଘଟାଇ ଆସୁଛି ।
