ନୂଆଦିଲ୍ଲୀ,୪।୩: ହମାସକୁ ଆତଙ୍କୀ ସଙ୍ଗଠନ ଘୋଷଣା କରୁ ଭାରତ। ଏଭଳି ଏକ ଦାବି କରିଛି ଇସ୍ରାଏଲ। ପାକ୍ ଅଧିକୃତ କାଶ୍ମୀର ବା ପିଓକେରେ ହମାସ ନେତାଙ୍କ ଉପସ୍ଥିତି ଏବେ ଚିନ୍ତାର କାରଣ ପାଲଟିଛି। ନିକଟରେ କାଶ୍ମୀର ଏକଜୁଟତା ଦିବସରେ ହମାସ ନେତାଙ୍କୁ ପାକିସ୍ତାନୀ ଆତଙ୍କୀ ସଂଗଠନ ସହ ବୈଠକ କରିଥିବା ଜଣାପଡିଛି। ଏହାକୁ ନେଇ ଇସ୍ରାଏଲ ଏବେ ସୂଚନା ଦେଇଛି।
ଗାଜାରେ ହମାସର ମୂଳପୋଛ କରିବା ପାଇଁ ଇସ୍ରାଏଲ ଜାରି ରଖିଛି ଲଢେଇ। ହେଲେ ଏହା ଭିତରେ ପିଓକେରେ ହମାସ ନେତାମାନେ ପାକିସ୍ତାନୀ ନେତାଙ୍କ ବୈଠକ କରିବା ଚିନ୍ତା ବଢାଇଛି। କାଶ୍ମୀର ଏକଜୁଟତା ଦିବସରେ ହମାସ ନେତା ପିଓକେରେ ପହଁଞ୍ଚିଥିଲେ। ଜାତିସଂଘ ଦ୍ବାରା କଟକଣା ଲାଗୁ କରାଯାଇଥିବା ସଂଗଠନ ଲସ୍ମର ଇ ତୋଇବା ଓ ଜୈଶ ଇ ମହମ୍ମଦର ଆତଙ୍କୀଙ୍କ ସହ ମିଶି ବୈଠକ କରିଥିଲେ ହମାସ ନେତା। ଏହି ଘଟଣାକୁ ନେଇ ଇସ୍ରାଏଲ ଏବେ ଭାରତକୁ ସତର୍କ କରିଛି।
ଏହା ସହ ହମାସକୁ ଆତଙ୍କୀ ସଂଗଠନ ଘୋଷଣା କରିବାକୁ ଦାବି କରିଛି। ଭାରତ ମଧ୍ୟ ଆତଙ୍କବାଦ ପ୍ରସଙ୍ଗରେ ସବୁବେଳେ ଇସ୍ରାଏଲକୁ ସମର୍ଥନ ଦେଇ ଆସୁଛି। ୭ ଅକ୍ଟୋବର ୨୦୨୩ରେ ଇସ୍ରାଏଲ ଉପରେ ହମାସ କରିଥିବା ଆକ୍ରମଣକୁ କଡା ନିନ୍ଦା କରିଥିଲା। ତେବେ ଭାରତ ଏପର୍ଯ୍ୟନ୍ତ ହମାସକୁ ଏକ ଆତଙ୍କବାଦୀ ସଂଗଠନ ଭାବରେ ଔପଚାରିକ ଭାବରେ ଘୋଷଣା କରିନାହିଁ। ତେବେ ଆମେରିକା ଓ ୟୁରୋପୀୟ ସଂଘ ସହ ବହୁ ଦେଶ ପୂର୍ବରୁ ଏହାକୁ ଆତଙ୍କୀ ସଂଗଠନ ଘୋଷଣା କରି ସାରିଛନ୍ତି।
