ଗାଜା ଉପରେ ପୁଣି ବିମାନ ଆକ୍ରମଣ କରିଛି ଇସ୍ରାଏଲ । ଗତକାଲି ଅର୍ଥାତ୍ ଗୁରୁବାର ଇସ୍ରାଏଲୀ ଯୁଦ୍ଧ ବିମାନ ଗାଜା ଷ୍ଟ୍ରିପରେ ବୋମାମାଡ଼ କରିଥିଲା । ଯେଉଁଥିରେ ପାଖାପାଖ୍ ୧୦୦ରୁ ଉର୍ଦ୍ଧ୍ୱ ଲୋକ ପ୍ରାଣ ହରାଇଥିଲେ । ଏହି ଆକ୍ରମଣରେ ଉତ୍ତର ଗାଜାର ଏକ ସ୍କୁଲକୁ ମଧ୍ୟ ଟାର୍ଗେଟ କରାଯାଇଥିଲା । ଯେଉଁଥିରେ ସେଠାରେ ଆଶ୍ରୟ ନେଇଥିବା ୩୩ ଜଣଙ୍କର ମୃତ୍ୟୁ ହୋଇଥିଲା ଏବଂ ୭୦ରୁ ଅଧିକ ଆହତ ହୋଇଥିଲେ । ପାଲେଷ୍ଟାଇନ ସ୍ବାସ୍ଥ୍ୟ ଅଧିକାରୀମାନେ ଏନେଇ ଦେଇଛନ୍ତି । ବର୍ତ୍ତମାନ ସମୟରେ, ଇସ୍ରାଏଲ ଏହାର ଆକ୍ରମଣର ପରିସର ବୃଦ୍ଧି କରିଛି । ଇସ୍ରାଏଲୀ ସେନା କହିଛି ଯେ, ହମାସ ଉପରେ ଚାପ ବୃଦ୍ଧି କରିବା ଏବଂ ଏହାକୁ ସମ୍ପୂର୍ଣ୍ଣ ବିତାଡ଼ିତ କରିବା ପାଇଁ ସେମାନେ ଆକ୍ରମଣକୁ ତୀବ୍ର କରିଛନ୍ତି ।
ପାଲେଷ୍ଟାଇନ ସ୍ବାସ୍ଥ୍ୟ ମନ୍ତ୍ରଣାଳୟର ମୁଖପାତ୍ର ଜାହେର ଅଲ-ୱାହିଦି କହିଛନ୍ତି ଯେ, ଗାଜା ସହରର ତୁଫାହ ଅଞ୍ଚଳର ଏକ ସ୍କୁଲରେ ୧୪ ଜଣ ଶିଶୁ ଏବଂ ୫ ଜଣ ମହିଳାଙ୍କ ମୃତଦେହ ମିଳିଛି । ବିମାନ ଆକ୍ରମଣରେ ଆହତ ହୋଇଥିବା ୭୦ ଜଣ ଆହତଙ୍କ ମଧ୍ୟରୁ କେତେଜଣଙ୍କ ଅବସ୍ଥା ଗୁରୁତର ଥିବାରୁ ଆଗକୁ ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ ବୋଲି ଆଶଙ୍କା ରହିଛି । ଇସ୍ରାଏଲୀ ସେନା କହିଛି ଯେ, ଏହା ଗାଜା ସହରରେ ଥିବା ‘ହମାସ କମାଣ୍ଡ ଆଣ୍ଡ କଣ୍ଟ୍ରୋଲ ସେଣ୍ଟର’ ଉପରେ ଆକ୍ରମଣ କରିଛି । ଗୁରୁବାର ଇସ୍ରାଏଲୀ ସେନା ଉତ୍ତର ଗାଜାର କିଛି ଅଂଶରେ ରହୁଥିବା ଲୋକମାନଙ୍କୁ ଗାଜା ସହରର ପଶ୍ଚିମ ଭାଗରେ ଆଶ୍ରୟ ନେବାକୁ ନିର୍ଦ୍ଦେଶ ଦେଇଥିଲା ।
ଇସ୍ରାଏଲୀ ସେନା ଏହି ଅଞ୍ଚଳରେ ପୂର୍ଣ୍ଣ ବଳରେ କାର୍ଯ୍ୟାନୁଷ୍ଠାନ ନେବାକୁ ଯୋଜନା କରୁଥିବା ଏନେଇ ଚେତାବନୀ ଦେଇଛନ୍ତି । ଯାହା ପରେ ଅନେକ ପାଲେଷ୍ଟାଇନ ନାଗରିକ ସେହି ସ୍ଥାନ ଛାଡ଼ି ଚାଲିଯିବା ଆରମ୍ଭ କରିଛନ୍ତି । ସ୍ଥାନାନ୍ତର ହେବା ସହ ଅନେକ ଲୋକ ନିଜ ନିଜର ଜିନିଷପତ୍ର ସାଙ୍ଗରେ ବୋହି ନେଉଥିଲେ । କିଛି ଲୋକ ପରିବହନ ପାଇଁ ଖଚର ଗାଡ଼ି ବ୍ୟବହାର କରୁଥିଲେ । ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ବୁଧବାର କହିଛନ୍ତି ଯେ, ଇସ୍ରାଏଲ ଗାଜାକୁ ଏକ ନୂତନ ସୁରକ୍ଷା ପଥ ନିର୍ମାଣ କରୁଛି ।
