ନୂଆଦିଲ୍ଲୀ: ଗାଜା ପଟ୍ଟିରେ ଖାଦ୍ୟ ପାଇଁ ହାହାକାର । ଖାଦ୍ୟ ଖୋଜିବାକୁ ବାହାରକୁ ଯାଇଥିବା ଲୋକଙ୍କ ଉପରେ ଇସ୍ରାଏଲୀ ସେନା ଘନଘନ ଗୁଳିମାଡ କରୁଥିବା ଅଭିଯୋଗ ହୋଇଛି । ଏଥିରେ ୨୩ ଜଣ ପାଲେଷ୍ଟାଇନୀଙ୍କ ମୃତ୍ୟୁ ଘଟିଛି। ଖାଦ୍ୟ ଖୋଜିବା ପାଇଁ ଲୋକମାନେ ଯେତେବେଳେ ରିଲିଫ୍ କେନ୍ଦ୍ରରେ ପହଞ୍ଚିଥିଲେ, ଏହି ସମୟରେ ଇସ୍ରାଏଲୀ ସେନା ଗୁଳିଚାଳନା ଆରମ୍ଭ କରିଥିଲା। ହସ୍ପିଟାଲ ଅଧିକାରୀ ଏବଂ ପ୍ରତ୍ୟକ୍ଷଦର୍ଶୀମାନେ ଏହି ସୂଚନା ଦେଇଛନ୍ତି।
ଗାଜାରେ ୨୦ ଲକ୍ଷରୁ ଅଧିକ ଲୋକ ବାସ କରନ୍ତି ଏବଂ ଏଠାରେ ଦୁର୍ଭିକ୍ଷ ପରିସ୍ଥିତି ଏବେ ଦେଖାଦେଇଛି । ବିଶେଷଜ୍ଞ ମାନେ ପୂର୍ବରୁ ଚେତାବନୀ ଦେଇସାରିଛନ୍ତି ଯେ, ଇସ୍ରାଏଲର ଅବରୋଧ ଏବଂ ଦୀର୍ଘକାଳୀନ ଆକ୍ରମଣ ଯୋଗୁଁ ଏହି ଅଞ୍ଚଳ ଦୁର୍ଭିକ୍ଷର ଦ୍ୱାରଦେଶରେ ପହଞ୍ଚିଛି ।
ଖାଦ୍ୟ ପାଇବାକୁ ଯାଇଥିବା ଜଣେ ବ୍ୟକ୍ତି କହିଛନ୍ତି ଯେ, ହଠାତ୍ ସେଠାରେ ଗୁଳିଚାଳନା ଆରମ୍ଭ ହୋଇଗଲା। ସେ ରକ୍ତରେ ଭିଜିଥିବା ଅତି କମରେ ତିନି ଜଣ ଲୋକଙ୍କୁ ତଳେ ପଡ଼ିଥିବା ଦେଖିଥିଲେ। ସେ କହିଛନ୍ତି, ମୁଁ ସାହାଯ୍ୟ ମଧ୍ୟ କରିପାରିଲି ନାହିଁ, କାରଣ ଲଗାତାର ଗୁଳି ଚାଳନା କରାଯାଉଥିଲା। ଦକ୍ଷିଣ ଗାଜାର ନାସିର ହସ୍ପିଟାଲ କହିଛି ଯେ ଅନେକ ରିଲିଫ୍ କେନ୍ଦ୍ର ନିକଟରୁ ମୃତଦେହ ଅଣାଯାଇଥିଲା। ଏହି ମୃତଦେହ ମଧ୍ୟରୁ ଆଠଟି ଖାନ ୟୁନୁସ ନିକଟରେ ଥିବା ତେଇନା ନାମକ ସ୍ଥାନରୁ ଆସିଥିଲା। ଖାନ ୟୁନୁସ ଗାଜା ମାନବିକ ଫାଉଣ୍ଡେସନ୍ ର ଏକ ରିଲିଫ୍ କେନ୍ଦ୍ର ସ୍ଥାପନ କରିଥାଏ । ଏହି ଫାଉଣ୍ଡେସନକୁ ଆମେରିକା ଏବଂ ଇସ୍ରାଏଲ ସମର୍ଥନ କରନ୍ତି ଏବଂ ଦୁଇ ମାସ ଧରି ଗାଜାରେ ରିଲିଫ୍ ବଣ୍ଟନ କରିଆସୁଛନ୍ତି।
