ନୂଆଦିଲ୍ଲୀ: ଗାଜାରେ ଜୋରଦାର ଆକ୍ରମଣ କରୁଛି ଇସ୍ରାଏଲ । ବୁଧବାର ଗାଜାରେ ଇସ୍ରାଏଲ ଏୟାର ଷ୍ଟ୍ରାଇକ୍ କରିଥିଲା । ଏଥିରେ ୨୯ ଜଣଙ୍କ ମୃତ୍ୟୁ ହୋଇଛି । ଏହି ସମୟରେ ଇସ୍ରାଏଲ ସେନା ଗାଜାରେ ଥିବା ଏକ ଶରଣାର୍ଥୀ କ୍ୟାମ୍ପ ଉପରେ ଆକ୍ରମଣ କରିଛି । ଏଥିରେ ୧୯ ଜଣଙ୍କ ଜୀବନ ଯାଇଥିବା ଜଣାପଡ଼ିଛି । ଇସ୍ରାଏଲ-ହମାସ ଯୁଦ୍ଧ ଜାରି ରହିଥିବା ବେଳେ ଅନେକ ନିରୀହ ଜୀବନ ଯାଉଛି । ଲେବାନନ୍ର ହେଜବୁଲ୍ଲା ସଂଗଠନ ସହ ଯୁଦ୍ଧ ବିରାମ ଉପରେ ରାଜି ହୋଇଥିବା ଇସ୍ରାଏଲ ଗାଜାରେ ଆକ୍ରମଣ ଜାରି ରଖିଛି ।
ସେପଟେ ଆମେରିକାର ବର୍ତ୍ତମାନ ଏବଂ ଆଗାମୀ ସରକାର ଯୁଦ୍ଧ ବନ୍ଦ ଉପରେ ଜୋର ଦେଉଥିଲେ ସୁଦ୍ଧା କୌଣସି ସୁଫଳ ମିଳିପାରି ନାହିଁ । ଗାଜାରେ ଥିବା କମଲ ଆଦ୍ବାନ ହସ୍ପିଟାଲ ଅନୁସାରେ, ଆଜି ଇସ୍ରାଏଲ ସେନା ବିତ୍ ଲାହିୟାରେ ରକେଟ୍ ମାଡ଼ କରିଛି । ୧୯ ଜଣ ମୃତକଙ୍କ ମଧ୍ୟରେ ଗୋଟିଏ ପରିବାରର ୪ ଶିଶୁଙ୍କ ସମେତ ୮ ସଦସ୍ୟ ଅଛନ୍ତି । ମଧ୍ୟ ଗାଜାରେ ନିର୍ମାଣାଧୀନ ଶରଣାର୍ଥୀ କ୍ୟାମ୍ପରେ ରକେଟ ମାଡ଼ କରିଛି ଇସ୍ରାଏଲ । ଏହି ଆକ୍ରମଣରେ ୭ ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ୨ ଶିଶୁ, ସେମାନଙ୍କ ବାପା-ମା ଏବଂ ସଂପର୍କୀୟ ଅଛନ୍ତି । ସେପଟେ କେନ୍ଦ୍ରୀୟ ଗାଜାରୁ ଆତଙ୍କବାଦୀମାନେ ଇସ୍ରାଏଲ ଉପରେ ୪ଟି ରକେଟ୍ ମାଡ଼ କରିଥିବା ଜଣାପଡ଼ିଛି ।
ସୂଚନାଯୋଗ୍ୟ, ଅକ୍ଟୋବର ୭, ୨୦୨୩ରୁ ଆରମ୍ଭ ହୋଇଥିବା ଇସ୍ରାଏଲ ଏବଂ ହମାସ ଯୁଦ୍ଧ ଏବେ ବି ଜାରି ରହିଛି । ଅକ୍ଟୋବର ୭ରେ ଇସ୍ରାଏଲ ଉପରେ ହମାସ ସଂଗଠନ ଆକ୍ରମଣ କରିଥିଲା । ଏହି ଆକ୍ରମଣରେ ସାଧାରଣ ଲୋକଙ୍କ ସମେତ ପ୍ରାୟ ୧୨ ଶହ ଜଣଙ୍କ ଜୀବନ ଯାଇଥିଲା । ହମାସ ଆତଙ୍କବାଦୀ ଶିଶୁଙ୍କ ୨୫୦ ଜଣଙ୍କୁ ବନ୍ଦୀ କରିନେଇଥିଲେ । ଏବେ ବି ୧୦୦ ଜଣ ବନ୍ଦୀ ଗାଜାରେ ଅଛନ୍ତି । ସେଥିମଧ୍ୟରୁ ଅଧିକାଂଶ ଲୋକଙ୍କ ମୃତ୍ୟୁ ହୋଇଥିବା କୁହାଯାଉଛି ।
