ଭୁବନେଶ୍ୱର୧୯/୦୧: ଚଳିତ ବର୍ଷ ଖଣ୍ଡଗିରି ମାଘ ମେଳାଙ୍କୁ ଧୁମଧାମ୍ର ସହିତ ପାଳନ କରାଯିବ । ଆଲୋକମାଳରେ ସଜେଇ ହେବ ଖଣ୍ଡଗିରି ଅଞ୍ଚଳ । ଏହା ସହ ସାଧୁସନ୍ଥକୁ ସ୍ୱାଗତ ପାଇଁ ବ୍ୟାପକ ବ୍ୟବସ୍ଥା କରାଯିବ । ତେବେ ଏଥର ଖଣ୍ଡଗିରି ଯାତ୍ରାରେ ଚାଲିବନି ଅଶ୍ଳୀଳତା। ଏଥିପାଇଁ ଖୁବ୍ଶୀଘ୍ର ଜାରି ହେବ ମାର୍ଗଦର୍ଶିକା । ଅଶ୍ଳୀଳ ନୃତ୍ୟ ବ୍ୟାନ ନେଇ ସରକାର ଏସ୍ଓପି ଆଣିବେ ବୋଲି ସଂସ୍କୃତିମନ୍ତ୍ରୀ ସୂର୍ଯ୍ୟବଂଶୀ ସୁରଜଙ୍କ ସୂଚନା।
ନିକଟରେ ଯାତ୍ରା କମିଟି, କଳାକାର ଓ ମାଲିକମାନଙ୍କ ସହ ସରକାରଙ୍କ ଏକ ବୈଠକ ବସିଥିଲା । ଯାତ୍ରାକୁ ଶୃଙ୍ଖଳିତ କରିବା ସହ ସବୁପ୍ରକାର ସରକାରୀ ସୁବିଧା, ସୁଯୋଗ ବିଷୟରେ ବିସ୍ତୃତ ଆଲୋଚନା ହୋଇଥିଲା । ଅଶ୍ଳୀଳତା ପ୍ରସଙ୍ଗରେ ତୁରନ୍ତ କଠୋର ଆଇନ୍ ନ ଆଣିବାକୁ ସଂସ୍କୃତି ମନ୍ତ୍ରୀଙ୍କୁ ଯାତ୍ରା ଅନୁଷ୍ଠାନମାନଙ୍କ ପକ୍ଷରୁ ଅନୁରୋଧ କରାଯାଇଥିଲା ।
ରବିବାର ଏହି ପ୍ରସଙ୍ଗ ଉପରେ ପ୍ରତିକ୍ରିୟା ରଖି ମନ୍ତ୍ରୀ ଶ୍ରୀ ସୂରଜ କହିଛନ୍ତି, ଖଣ୍ଡଗିରି ମେଳାକୁ ନେଇ ଗୃହ ବିଭାଗ ଓ ପୁଲିସ୍ ବିଭାଗ ତା’ର ଆଇନ୍ ଶୃଙ୍ଖଳା ଦିଗଟିକୁ ଦେଖୁଛି । ଅଶ୍ଳୀଳତା ପ୍ରସଙ୍ଗ ଉପରେ ବି ଆମେ ସଚେତନ ରହିଛୁ । ଏହା ଉପରେ ଆମେ ଖୁବ୍ଶୀଘ୍ର ମାର୍ଗଦର୍ଶିକା ଜାରି କରିବାକୁ ଯାଉଛୁ । ଏନେଇ ଯାତ୍ରା କମିଟି, କଳାକାର ଓ ମାଲିକଙ୍କ ସହ ଆଲୋଚନା କରିଛୁ । ସେମାନଙ୍କର ଅନୁରୋଧ ରହିଥିଲା ଯେ, ତୁରନ୍ତ କିଛି କଠୋର ପଦକ୍ଷେପ ନିଆନଯାଉ ବା ଆଇନ୍ ନ ଅଣାଯାଉ । ତାଙ୍କୁ କିଛି ସମୟ ଦିଆଯାଉ । ତାଙ୍କରି କଥାକୁ ନେଇ ସମୟ ଦିଆଯାଇଛି ଏବଂ ଆମେ ଲକ୍ଷ୍ୟ ରଖିଛୁ ।
ଆସନ୍ତା ଫେବ୍ରୁଆରୀ ୬ରୁ ୧୭ ତାରିଖ ପର୍ଯ୍ୟନ୍ତ ଖଣ୍ଡଗିରି କୁମ୍ଭମେଳା ଅବସରରେ ଚାଲିବ ଯାତ୍ରା ମହାସମର । ୬ ପେଣ୍ଡାଲ୍ରେ ୧୨ ଯାତ୍ରା ପାର୍ଟି ବିଭିନ୍ନ ଯାତ୍ରା ପରିବେଷଣ କରିବେ । ଏହାକୁ ଶାନ୍ତି ଶୃଙ୍ଖଳାରେ ସମାପନ କରିବା ସହ ଖଣ୍ଡଗିରିରେ ଅଶ୍ଳୀଳତାକୁ ପୂରେଇ ନଦେବାକୁ ଗଠିତ ସ୍ୱତନ୍ତ୍ର କୋର୍ କମିଟି ନିଷ୍ପତ୍ତି ନେଇଛି ।
