ନୂଆଦିଲ୍ଲୀ, ୧୫/୧୧: ସିବିଆଇକୁ ଆଉ ଏକ ବଡ ସଫଳତା । ଦେଶ ଛାଡି ପଳାଇଥିବା ପଳାତକ ଅପରାଧୀଙ୍କୁ ଧରିଲା ସିବିଆଇ। କେନ୍ଦ୍ରୀୟ ତଦନ୍ତ ବ୍ୟୁରୋ ୟୁଏଇରେ ଲୁଚି ରହିଥିବା ଜଗଦୀଶ ପୁନେଥାଙ୍କୁ ଭାରତ ଫେରାଇ ଆଣିବାରେ ସଫଳ ହୋଇଛି। ଇଣ୍ଟରପୋଲ୍ ଚ୍ୟାନେଲ ଏବଂ ୟୁଏଇ ଅଧିକାରୀଙ୍କ ସହାୟତାରେ ଗୁରୁବାର ପୁନେଥାଙ୍କୁ ଗିରଫ କରାଯାଇ ଭାରତ ଫେରାଇ ଅଣାଯାଇଥିବା ଜଣାପଡିଛି।
ତେବେ ୨୦୨୧ ମସିହାରେ ଉତ୍ତରାଖଣ୍ଡ ପୁଲିସ ପିଥୋରାଗଡ଼ ପୁଲିସ ଷ୍ଟେସନରେ ଜଗଦୀଶ ପୁନେଥାଙ୍କ ବିରୁଦ୍ଧରେ ଠକେଇ ଏବଂ ଅପରାଧିକ ଷଡ଼ଯନ୍ତ୍ର ମାମଲା ରୁଜୁ କରିଥିଲା। ମାମଲା ରୁଜୁ ହେବା ପରେ, ଅଭିଯୁକ୍ତ ପୁନେଥା ୟୁଏଇ ପଳାଇ ଯାଇଥିଲେ। ୬ ମଇ ୨୦୨୫ ରେ, ଉତ୍ତରାଖଣ୍ଡ ପୁଲିସର ଅନୁରୋଧରେ, କେନ୍ଦ୍ରୀୟ ତଦନ୍ତ ସଂସ୍ଥା ଇଣ୍ଟରପୋଲ ମାଧ୍ୟମରେ ଏକ ରେଡ୍ ନୋଟିସ ଜାରି କରିଥିଲା। ରେଡ୍ ନୋଟିସ ଜାରି ହେବା ପରେ, ସିବିଆଇ ୟୁଏଇ ଅଧିକାରୀଙ୍କ ସହିତ ନିରନ୍ତର ଯୋଗାଯୋଗରେ ରହି ପୁନେଥାଙ୍କୁ ଟ୍ରାକ୍ କରିଥିଲା। ଏହାପରେ ୟୁଏଇ ପୁଲିସ ଜଗଦୀଶ ପୁନେଥାଙ୍କୁ ଗିରଫ କରି ତାଙ୍କୁ ଭାରତ ଫେରାଇ ଆଣିବାର ସମ୍ପୂର୍ଣ୍ଣ ପ୍ରକ୍ରିୟାରେ ସମନ୍ୱୟ କରିଥିଲା। ଉତ୍ତରାଖଣ୍ଡ ପୁଲିସର ଏକ ଦଳ ୟୁଏଇ ଯାଇ ନଭେମ୍ବର ୧୩ ତାରିଖରେ ତାଙ୍କୁ ଦିଲ୍ଲୀ ଆଣିଛି।
ରେଡ୍ ନୋଟିସ୍ ହେଉଛି ଇଣ୍ଟରପୋଲ୍ ପକ୍ଷରୁ ଏକ ଅନ୍ତର୍ଜାତୀୟ ସତର୍କତା, ଯାହା ବିଶ୍ୱର ବିଭିନ୍ନ ପୁଲିସ ଏଜେନ୍ସିଗୁଡ଼ିକୁ ପଠାଯାଏ। ଏହି ନୋଟିସ୍ ଯେ କୌଣସି ଦେଶରେ ଲୁଚି ରହିଥିବା ଅପରାଧୀଙ୍କୁ ଧରିବାରେ ବହୁତ ସହାୟକ। ଭାରତରେ, ସିବିଆଇ ହେଉଛି ଇଣ୍ଟରପୋଲର ଜାତୀୟ ଏଜେନ୍ସି ଏବଂ ଭାରତପୋଲ ସିଷ୍ଟମ ମାଧ୍ୟମରେ ସାରା ଦେଶର ଏଜେନ୍ସିଗୁଡ଼ିକୁ ଇଣ୍ଟରପୋଲ୍ ସମ୍ବନ୍ଧୀୟ ସୂଚନା ପଠାଏ। ସିବିଆଇ ଏବଂ ଇଣ୍ଟରପୋଲ୍ ମଧ୍ୟରେ ସମନ୍ୱୟ ମାଧ୍ୟମରେ, ଗତ କିଛି ବର୍ଷ ମଧ୍ୟରେ ୧୫୦ରୁ ଅଧିକ ପଳାତକ ଅପରାଧୀଙ୍କୁ ଭାରତ ଫେରାଇ ଅଣାଯାଇଛି। ଏହି ପରିପ୍ରେକ୍ଷୀରେ, ଜଗଦୀଶ ପୁନେଥାଙ୍କ ଭାରତ ଫେରିବା କେନ୍ଦ୍ରୀୟ ଏଜେନ୍ସି ପାଇଁ ଏକ ବଡ଼ ସଫଳତା ବୋଲି ବିବେଚନା କରାଯାଉଛି।
