ନୂଆଦିଲ୍ଲୀ,୨୯।୬: ରାଜସ୍ଥାନର ଜୈସଲମେର ଜିଲ୍ଲାରେ ଭାରତ-ପାକିସ୍ତାନ ସୀମା ନିକଟରେ ଜଣେ ନାବାଳିକା ଓ ଯୁବକଙ୍କ ସଢି ଯାଇଥିବା ଶବ ଉଦ୍ଧାର ହୋଇଛି। ପୋଲିସର କହିବା ଅନୁସାରେ,ମୃତଦେହର ସ୍ଥିତିକୁ ଦେଖି ଲାଗୁଛି ଦୁହିଁଙ୍କ ମୃତଦେହ ପ୍ରାୟ ଏକ ସପ୍ତାହ ପୂର୍ବର। ଏହି ଶବ ଶନିବାର ଉଦ୍ଧାର କରାଯାଇଛି।
ଘଟଣାସ୍ଥଳରୁ ଏକ ପାକିସ୍ତାନୀ ସିମ୍ କାର୍ଡ ସହ ଦୁଇଟି ପରିଚୟ ପତ୍ର ମିଳିଛି । ୧୮ ବର୍ଷର ରବି କୁମାର ଏବଂ ୧୫ ବର୍ଷର ଶାନ୍ତି ବାଇ ବୋଲି ଦୁହିଁଙ୍କ ପରିଚୟ ମିଳିଛି। ଜୈସଲମେରର ଏସପି ସୁଧୀର ଚୌଧୁରୀ କହିଛନ୍ତି, ମୃତଦେହ ସାଧେଓ୍ବାଲା ଅଞ୍ଚଳରେ ମିଳିଛି, ଯାହାକି ଅନ୍ତର୍ଜାତୀୟ ସୀମା ଓ ଭାରତୀୟ କ୍ଷେତ୍ରଠାରୁ ପ୍ରାୟ ୧୦-୧୨ କିଲୋମିଟର ଦୂରରେ ରହିଛି। ମୃତଦେହକୁ ରାମଗଢ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ପଠାଇ ଦିଆଯାଇଛି। ପୋଷ୍ଟମର୍ଟମରେ ମୃତ୍ୟୁର କାରଣ ଜଣାପଡିବ।
ଏସ୍ପି ସୁଧିର ଚୌଧୁରୀ କହିଛନ୍ତି, କାଲି ସକାଳେ ପ୍ରାୟ ୧୧ଟା ବେଳେ ଏକ ସ୍ଥାନୀୟ ନିବାସୀ ସୂଚନା ଦେଇଛନ୍ତି ଯେ, ଅନ୍ତର୍ଜାତୀୟ (ଭାରତ-ପାକିସ୍ତାନ) ସୀମାଠାରୁ କିଛି କିଲୋମିଟର ଦୂରରେ ଜଣେ ଯୁବତୀଙ୍କ ମୃତଦେହ ମିଳିଛି। ଆଜି ବିଏସ୍ଏଫ୍ର ବରିଷ୍ଠ ଅଧିକାରୀ ଅଞ୍ଚଳର ଯାଞ୍ଚ କରୁଛନ୍ତି। ଆମେ ଅନ୍ୟ ଏଜେନ୍ସି ସହ ମଧ୍ୟ ମିଶିକି କାମ କରୁଛୁ। ସେ ଆହୁରି କହିଛନ୍ତି, ଜଣେ ପାକିସ୍ତାନୀ ସିମ୍ କାର୍ଡ ଥିବା ମୋବାଇଲ ଫୋନ୍ ମଧ୍ୟ ଜବତ କରାଯାଇଛି। ତାଙ୍କ ପାଖରେ ଖାଲି ପାଣି ବୋତଲ ଥିଲା। ପ୍ରାରମ୍ଭିକ ଯାଞ୍ଚରୁ ଜଣାପଡିଛି ଦୁହିଁଙ୍କ ମୃତ୍ୟୁ ଡିହାଇଡ୍ରେସନ୍(ପାଣିର ଅଭାବ)ରୁ ହୋଇଥିବ। କିନ୍ତୁ ଦୁହିଁଙ୍କ ମୃତ୍ୟୁର ସଠିକ କାରଣ ପୋଷ୍ଟମର୍ଟମ ପରେ ଜଣାପଡିବ। ଆମେ ସମ୍ଭାବିତ ଦିଗରୁ ଯାଞ୍ଚ କରୁଛୁ।
