ମୁମ୍ବାଇ,୧୨/୮ : ସମାଜବାଦୀ ପାର୍ଟିର ରାଜ୍ୟସଭା ସାଂସଦ ଜୟା ବଚ୍ଚନ ପୁଣି ଥରେ ଚର୍ଚ୍ଚାରେ । ସବୁବେଳେ ନିଜର କ୍ରୋଧ ପାଇଁ ସେ ଚର୍ଚ୍ଚାରେ ରହିଥାନ୍ତି । ଏଥର ବି ସମାନ ସ୍ଥିତି ପାଇଁ ସେ ଚର୍ଚ୍ଚାକୁ ଆସିଛନ୍ତି । ସର୍ବ ସାଧାରଣରେ ନିଜର ହିତାହିତ ଜ୍ଞାନ ହରାଇ ବସିଛନ୍ତି । ଏଥର ସେ ଦିଲ୍ଲୀର କନଷ୍ଟିଚ୍ୟୁସନ୍ କ୍ଲବରେ ତାଙ୍କ ସହ ସେଲ୍ଫି ନେବାକୁ ଚେଷ୍ଟା କରୁଥିବା ଜଣେ ବ୍ୟକ୍ତିଙ୍କୁ ସେ ଧକ୍କା ଦେଇଛନ୍ତି । ଜୟାଙ୍କ ଏହି ଆଚରଣ ଉପରେ ହିମାଚଳ ପ୍ରଦେଶର ମଣ୍ଡି ସାଂସଦ କଙ୍ଗନା ରଣାୱତ ପ୍ରତିକ୍ରିୟା ପ୍ରକାଶ କରିଛନ୍ତି। କଙ୍ଗନା ତାଙ୍କୁ ସବୁଠାରୁ ଖରାପ ମହିଳା ବୋଲି କହିଛନ୍ତି।
ଏହି ଘଟଣାର ଏକ ଭିଡିଓ ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି । ଯେଉଁଥିରେ ବଚ୍ଚନ ସେହି ବ୍ୟକ୍ତିଙ୍କୁ ଧକ୍କା ଦେଉଥିବା ନଜର ଆସୁଛନ୍ତି । ସେ ଏହା ବି କହୁଥିବା ଶୁଣାଯାଉଛି, ‘କ’ଣ କରୁଛନ୍ତି ଆପଣ ? ଏହା କ’ଣ ?’ ବଚ୍ଚନଙ୍କ ସାଥୀ ସାଂସଦ ଏବଂ ଶିବସେନା (ୟୁବିଟି) ନେତ୍ରୀ ପ୍ରିୟଙ୍କା ଚତୁର୍ବେଦୀ ମଧ୍ୟ ସମାଜବାଦୀ ସାଂସଦଙ୍କ ପାଖରେ ଠିଆ ହୋଇଥିବା ଦେଖାଯାଉଛି । ବଚ୍ଚନ ସେହି ବ୍ୟକ୍ତିଙ୍କୁ ଠେଲି ଦେବା ମାତ୍ରେ ଚତୁର୍ବେଦୀ ପଛକୁ ବୁଲି ଚାହିଁଲେ ଏବଂ କ୍ଲବ ଆଡ଼କୁ ଚାଲିଗଲେ।
ଅଭିନେତ୍ରୀ ତଥା ମଣ୍ଡିରୁ ବିଜେପି ସାଂସଦ କଙ୍ଗନା ରଣାୱତ ଜୟା ବଚ୍ଚନଙ୍କୁ 'ସର୍ବାଧିକ ବିକୃତ ଏବଂ ସୁବିଧାପ୍ରାପ୍ତ ମହିଳା' ବୋଲି କହିଛନ୍ତି । କଙ୍ଗନା ଇନଷ୍ଟାଗ୍ରାମ ଷ୍ଟୋରୀରେ ଏକ ଭିଡିଓ ସେୟାର କରିଛନ୍ତି। କ୍ୟାପସନରେ ସେ ଲେଖିଛନ୍ତି, 'ସର୍ବାଧିକ ବିକୃତ ଏବଂ ସୁବିଧାପ୍ରାପ୍ତ ମହିଳା। ଲୋକମାନେ ତାଙ୍କର କ୍ରୋଧ / ଅବାନ୍ତରତାକୁ ସହ୍ୟ କରନ୍ତି କାରଣ ସେ ଅମିତାଭ ବଚ୍ଚନଙ୍କ ପତ୍ନୀ।' ଏଥିରେ କଙ୍ଗନା ସମାଜବାଦୀ ପାର୍ଟିର ଟୋପିକୁ କୁକୁଡ଼ାର କଙ୍ଘା ବୋଲି କହିବା ସହ ସେ ନିଜେ କୁକୁଡ଼ା ପରି ଦେଖାଯାଉଛନ୍ତି। କଙ୍ଗନା ତାଙ୍କର ଆଚରଣକୁ ଲଜ୍ଜାଜନକ କହିଛନ୍ତି।
