ପାଟନା: ବିଚ୍ ରାସ୍ତାରେ ଜେଡିୟୁ ନେତାଙ୍କୁ ଗୁଳି କରି ହତ୍ୟା । ବାଇକରେ ଆସି ଦୁଇ ଜଣଙ୍କୁ ଗୁଳି ମାରିଲେ ଦୁର୍ବୃତ୍ତ । ଏଥିରେ ଜଣେ ଯୁବନେତାଙ୍କ ମୃତ୍ୟୁ ହୋଇଥିବା ବେଳେ ଆଉ ଜଣ ଗୁରୁତର ହୋଇଛନ୍ତି । ଗତକାଲି (ବୁଧବାର) ବିଳମ୍ବିତ ରାତିରେ ବିହାର ରାଜଧାନୀ ପାଟନାରେ ଏଭଳି ଚାଞ୍ଚଲ୍ୟକର ଘଟଣା ଘଟିଛି । ଏପ୍ରିଲ ୨୬(ଶୁକ୍ରବାର) ବିହାରରେ ଦ୍ବିତୀୟ ପର୍ଯ୍ୟାୟ ଲୋକସଭା ନିର୍ବାଚନ ଥିବାବେଳେ ଏହା ପୂର୍ବରୁ ଏଭଳି ହତ୍ୟାକାଣ୍ଡ ସମଗ୍ର ଦେଶରେ ଆଲୋଡନ ସୃଷ୍ଟି କରିଛି ।
ମୃତ ଜେଡିୟୁ ନେତା ସୌରଭ କୁମାର ବୋଲି ଜଣାପଡ଼ିଛି । ତାଙ୍କ ସାଙ୍ଗରେ ଥିବା ଗୁରୁତର ଯୁବକଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।ପୋଲିସର ସୂଚନା ମୁତାବକ, କାଲି ରାତିରେ ସୌରଭ କୁମାର ନିଜ ସାଙ୍ଗ ସହ ଏକ ବିବାହ ଉତ୍ସବରେ ଯୋଗ ଦେଇ ଫେରୁଥିଲେ । ବାଟରେ ଚାରି ଜଣ ଦୁର୍ବୃତ୍ତ ବାଇକରେ ଆସି ସେମାନଙ୍କ ଉପରେ ଅତର୍କିତ ଗୁଳିମାଡ କରିଥିଲେ । ସୌରଭଙ୍କ ଦେହରେ ୫ଟି ଗୁଳି ବାଜିଥିଲା ଏବଂ ଏଥିରେ ତାଙ୍କର ମୃତ୍ୟୁ ହୋଇଯାଛି । ତାଙ୍କ ସହ ଥିବା ସାଙ୍ଗ ମୁନମୁନ କୁମାରଙ୍କ ଦେହରେ ବି ୩ଟି ଗୁଳି ବାଜିଥିଲା । ତାଙ୍କୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି ।
ଜେଡିୟୁର ଯୁବନେତା ସୌରଭ କୁମାର ସକରୌଚା ପଞ୍ଚାୟତର ପୂର୍ବତନ ସରପଞ୍ଚ ପ୍ରାର୍ଥୀ ଥିଲେ । ସେ ପ୍ରପଟି ଡିଲିଂ କାମ ମଧ୍ୟ କରୁଥିଲେ । ତେବେ କିଏ ଏବଂ କାହିଁକି ତାଙ୍କୁ ହତ୍ୟା କଲା ସେନେଇ କିଛି ସ୍ପଷ୍ଟ ସୂଚନା ମିଳିପାରି ନାହିଁ । ନିର୍ବାଚନର ଦିନକ ପୂର୍ବରୁ ଏହି ଜଘନ୍ୟ କାଣ୍ଡ ଚାଞ୍ଚଲ୍ୟ ଖେଳାଇ ଦେଇଛି । ପୋଲିସ ଏନେଇ ଏକ ମାମଲା ରୁଜୁ କରି ଛାନଭିନ୍ ଆରମ୍ଭ କରିଛି ।