ନୂଆଦିଲ୍ଲୀ,୨୮/୧୧:  ଉତ୍ତରପ୍ରଦେଶର ଝାନସୀ ମେଡିକାଲ କଲେଜରେ ଅଗ୍ନିକାଣ୍ଡ ଘଟି ୧୦ ନବଜାତ ଶିଶୁ ମୃତ୍ୟୁ ଘଟଣା । ଏନେଇ  ଅଧ୍ୟକ୍ଷ ନରେନ୍ଦ୍ର ସିଂହ ସେଙ୍ଗରଙ୍କ ସହ ତିନି କର୍ମଚାରୀଙ୍କୁ ନିଲମ୍ବିତ କରାଯାଇଛି । ତେବେ  ଶିଶୁଙ୍କ ମୃତ୍ୟୁର କାରଣ ସ୍ପଷ୍ଟ ହୋଇନଥିବା ବେଳେ ସରକାରଙ୍କ ଦ୍ୱାରା ଗଠିତ କମିଟିର ରିପୋର୍ଟ ପରେ ଉପମୁଖ୍ୟମନ୍ତ୍ରୀ ବ୍ରଜେଶ ପାଠକ ଏହି ପଦକ୍ଷେପ ନେଇଛନ୍ତି।

ଏନେଇ ଉପମୁଖ୍ୟମନ୍ତ୍ରୀ ବ୍ରଜେଶ ପାଠକ କହିଛନ୍ତି, ତଦନ୍ତ ରିପୋର୍ଟର ସମୀକ୍ଷା ପରେ ଘଟଣାରେ ଦୋଷୀ ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଲୋକଙ୍କ ଦୁଃଖ ହେଉଛି ଆମର ଯନ୍ତ୍ରଣା ଏବଂ ସରକାର ସବୁବେଳେ ସେମାନଙ୍କ ସହ ଛିଡ଼ା ହୋଇଛନ୍ତି। ମେଡିକାଲ କଲେଜର ମୁଖ୍ୟ ଚିକିତ୍ସା ଅଧୀକ୍ଷକ ଡାକ୍ତର ସଚିନ ମହୁରଙ୍କ ବିରୋଧରେ ମଧ୍ୟ ଚାର୍ଜସିଟ୍ ଦାଖଲ କରାଯାଇଛି। ଏହାବ୍ୟତୀତ ଆଉ ୩ ଜଣ ଅଧିକାରୀଙ୍କୁ ନିଲମ୍ବିତ କରାଯାଇଛି। କଲେଜର ଇଲେକ୍ଟ୍ରିକାଲ ବିଭାଗର କନିଷ୍ଠ ଯନ୍ତ୍ରୀ ସଞ୍ଜିତ କୁମାର, ଏନ୍ଆଇସିୟୁ ୱାର୍ଡର ନର୍ସିଂ ଇନ୍ଚାର୍ଜ ସନ୍ଧ୍ୟା ରାୟ ଓ ମୁଖ୍ୟ ଅଧୀକ୍ଷକ ସୁନୀତା ରାଠୋରଙ୍କୁ ନିଲମ୍ବିତ କରାଯାଇଛି। ଅଗ୍ନିକାଣ୍ଡର ତଦନ୍ତ ପାଇଁ ସରକାର ମେଡିକାଲ ନିର୍ଦ୍ଦେଶକ ଶିକ୍ଷା କିଂଜଲ ସିଂହଙ୍କ ଅଧ୍ୟକ୍ଷତାରେ ୪ ଜଣିଆ କମିଟି ଗଠନ କରିଥିଲେ। ଏତଦ୍ ବ୍ୟତୀତ ଅଧିକ ତଦନ୍ତ ଦାୟିତ୍ୱ ସରକାର ଝାନ୍ସି ଡିଭିଜନାଲ କମିଶନରଙ୍କୁ ଦିଆଯାଇଛି।