କାମାକ୍ଷାନଗର,୧୩/୧୧: ଆମ୍ବପଳାସ ଗାଁରେ ପୋଲିସ, ଅବକାରୀ ବିଭାଗ, ବନ ବିଭାଗ ଓ ମାଇନିଂ ଟିମର ବଡ଼ ଧରଣର ଚଢାଉ । ଏହି ଚଢାଉରେ ୧୪ଟି ବାଇକ, ଗୋଟିଏ ସ୍କର୍ପିଓ ଏବଂ ୧୪ ଟନ କୋଇଲା ଜବତ କରାଯାଇଛି । ଏହା ସହ ପ୍ରାୟ ୩ ହଜାର ଲିଟର ଦେଶୀ ମଦ ଏବଂ ମଦ ତିଆର ସାମଗ୍ରୀ ମଧ୍ୟ ଜବତ ହୋଇଛି । ଏଥିରେ ସମ୍ପୃକ୍ତ ଥିବା ଅରୁଣ ମହାପାତ୍ର ଏବଂ କାର୍ତ୍ତିକ ମହାପାତ୍ରଙ୍କୁ ଗିରଫ କରିଛି ପୋଲିସ । ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଆମ୍ବପଳାସ ଗାଁରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ଆମ୍ବପଳାସ ଗାଁରେ କିଛି ଲୋକ ଦୀର୍ଘ ସମୟ ଧରି କୋଇଲା ଚୋରି କରିବା ସହ ଦେଶୀ ମଦ ମଧ୍ୟ ପ୍ରସ୍ତୁତ କରୁଥିଲେ । ଏନେଇ ଏକ ବିଶେଷ ସୂତ୍ରକୁ ଖବର ପାଇଥିଲା ପୋଲିସ । ଖବର ପାଇ ପୋଲିସ, ଅବକାରୀ ବିଭାଗ, ବନ ବିଭାଗ ଓ ମାଇନିଂ ଟିମ୍‌ ମିଶି ଉକ୍ତ ଗାଁରେ ଚଢାଉ କରିଥିଲା । ଦେଶୀ ମଦର ଭୂସ୍ବର୍ଗ ପାଲଟିଥିବା ଆମ୍ବପଳାସ ଗାଁରେ ଚଢାଉ କରି ପ୍ରାୟ ୩ ହଜାର ଲିଟର ଦେଶୀ ମଦ ଏବଂ ମଦ ତିଆର ସାମଗ୍ରୀ ମଧ୍ୟ ଜବତ କରାଯାଇଛି । କେବଳ ସେତିକି ନୁହେଁ, ୧୪ଟି ବାଇକ, ଗୋଟିଏ ସ୍କର୍ପିଓ ଏବଂ ୧୪ ଟନ କୋଇଲା ମଧ୍ୟ ଜବତ ହୋଇଛି । ଏହି ଚଢାଉରେ ୨ ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିବା ବେଳେ କିଛି ମଦ ମାଫିଆ ଘଟଣାସ୍ଥଳରୁ ଖସି ପଳାଇଛନ୍ତି । ସେମାନଙ୍କୁ ଚିହ୍ନଟ କରିଛି ଅବକାରୀ ପୋଲିସ । ଯାହାକୁ ନେଇ ତଦନ୍ତ ଜାରି ରହିଛି ଏବଂ ଖୁବଶୀଘ୍ର ସେମାନଙ୍କୁ ଗିରଫ କରାଯିବ ବୋଲି ଅବକାରୀ ପୋଲିସ ପକ୍ଷରୁ ସୂଚନା ମିଳିଛି।