ନୂଆଦିଲ୍ଲୀ: ଝାଡଖଣ୍ଡର ପୂର୍ବତନ ସିଏମ ହେମନ୍ତ ସୋରେନଙ୍କ ପତ୍ନୀ କଳ୍ପନା ସୋରେନ ନିର୍ବାଚନ ରାଜନୀତିରେ ପାଦ ରଖିଛନ୍ତି । ଗାଣ୍ଡେୟ ବିଧାନସଭା ଆସନରେ ହେବାକୁ ଥିବା ଉପ-ନିର୍ବାଚନରେ ଝାଡଖଣ୍ଡ ମୁକ୍ତି ମୋର୍ଚ୍ଚା ତାଙ୍କୁ ପ୍ରାର୍ଥୀ ଘୋଷଣା କରିଛି । ଯଦିଓ ତାଙ୍କୁ ନିର୍ବାଚନ ରାଲିରେ ଦେଖିବାକୁ ମିଳିଥିଲା, ତଥାପି ନିର୍ବାଚନ ରାଜନୀତିରେ ସେ ଯୋଗଦେବେ କି ନାହିଁ ସେନେଇ ଅନେକ କଳ୍ପନାଜଳ୍ପନା ଲାଗି ରହିଥିଲା। ବର୍ତ୍ତମାନ ତାଙ୍କୁ ପ୍ରାର୍ଥୀ ଭାବେ ଘୋଷଣା ପରେ ଚିତ୍ର ସମ୍ପୂର୍ଣ୍ଣ ସ୍ପଷ୍ଟ ହୋଇଯାଇଛି । ମେ ୨୦ ରେ ଏହି ଆସନରେ ମତଦାନ ଅନୁଷ୍ଠିତ ହେବ।

ଜେଏମଏମ କହିଛି ଯେ, ଲୋକସଭା ସାଧାରଣ ନିର୍ବାଚନ ୨୦୨୪ ଏବଂ ଗାଣ୍ଡେୟ ବିଧାନସଭା ଉପ-ନିର୍ବାଚନ ୨୦୨୪ ରେ ଝାଡଖଣ୍ଡ ମୁକ୍ତି ମୋର୍ଚ୍ଚାର ପ୍ରାର୍ଥୀଙ୍କ ଅନ୍ତିମ ତାଲିକା ପ୍ରକାଶ ପାଇଛି । ଜାମସେଦପୁର ଲୋକସଭା ନିର୍ବାଚନ ମଣ୍ଡଳୀରୁ ସମୀର ମୋହାନ୍ତି ପ୍ରତିଦ୍ୱନ୍ଦ୍ୱିତା କରିବେ । ସେପଟେ ଗାଣ୍ଡେୟ ବିଧାନସଭା ଆସନରୁ କଳ୍ପନା ସୋରେନଙ୍କୁ ପ୍ରାର୍ଥୀ କରାଯାଇଛି।

ତେବେ ନାମ ଘୋଷଣା ପୂର୍ବରୁ ମଧ୍ୟ କଳ୍ପନା ସୋରେନ ଗାଣ୍ଡେୟ ଆସନ ପାଇଁ ପ୍ରସ୍ତୁତି ଆରମ୍ଭ କରିଥିଲେ । ଏହି ଆସନ ଝାଡଖଣ୍ଡର ଗିରିଡିହ ଜିଲ୍ଲା ଅଧୀନରେ ରହିଛି। ନିକଟରେ କଳ୍ପନା ସେଠାରେ ଜେଏମଏମ କର୍ମୀ ସମ୍ମିଳନୀକୁ ମଧ୍ୟ ସମ୍ବୋଧିତ କରିଥିଲେ ।